ទីតាំងលក់ថ្នាំញៀន២កន្លែងត្រូវបានបង្ក្រាប ចាប់បានជនល្មើស ២នាក់ និងថ្នាំម៉ាទឹកក៣៣៧០ក្រាម
ខេត្តកំពង់ឆ្នាំង៖ អនុវត្តតាមគោលការដឹកនាំរបស់គណៈបញ្ជាការឯកភាខេត្ត ដើម្បីលុបបំបាត់អោយអស់ខ្សែរយៈមេជួញដូរ និងចែកចាយថ្នាំញៀននោះ ទីតាំងចែកចាយជួញដូរ២កន្លែងត្រូវបានលោក យូ ទិត្យវឌ្ឍនៈ ព្រះរាជអាជ្ញាអមសាលាដំបូងខេត្ត បញ្ជាអោយលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្ត ដឹកនាំកម្លាំងចម្រុះខេត្ត ចុះបង្ក្រាបជាលទ្ធផល គឺចាប់ បានជនល្មើស២នាក់ និងថ្នាំញៀនម៉ាទឹកកកទម្ងន់៣៣៧០ក្រាម។ ប្រតិបត្តការរបស់ សមត្ថ កិច្ចចំរុះបានធ្វើឡើងនៅព្រឹកថ្ងៃទី០៧ ខែកុម្ភៈ ឆ្នាំ២០១៥ នៅក្នុងភូមិដំណាក់ពពូល សង្កាត់ កំពង់ឆ្នាំង ក្រុងកំពង់ឆ្នាំង។
សមត្ថកិចនគរបាលការិយាល័យប្រឆាំងគ្រឿងញៀនខេត្តបានអោយដឹងថា៖ នៅពេលទទួល បានព័ត៌មានពីទីតាំង និងការចែកចាយជួញថ្នាំញៀនរបស់ជនល្មើសដោយភ្នាក់ងារសម្ងាត់រួចមក លោក ឯក ស៊ុនរស្មី បានដឹកនាំកំលាំងសមត្ថកិច្ចចំរុះប្រមាណជាង៣០នាក់ ចុះទៅឡោមព័ទ្ធ និងបង្ក្រាបទីតាំងទាំង២ខាងលើ ដោយមានការចូលរួមពីអាជ្ញាធរមូលដ្ឋានផងដែរ។ ទីតាំងទី១គឺនៅកន្លែងចិញ្ចឹមជ្រូក ជាទីតាំងសំរាប់ពួកគេចែកចាយ និងសេពថ្នាំញៀននៅក្នុងទីតាំងទី១នេះ សមត្ថកិច្ចចំរុះចាប់បានអ្នកចែកចាយថ្នាំញៀនម្នាក់ឈ្មោះ ខៀវ ប៊ុនថៃ អាយុ២៥ឆ្នាំ រស់នៅក្នុងភូមិ ដំណាក់ពពូល សង្កាត់កំពង់ឆ្នាំង ដោយដកហូតបាននូវសម្ភារៈជក់ ថង់ច្រកថ្នាំសំរាប់ចែកចាយមួយចំនួន ដាវសាំមូរ៉ៃ១ដើម អាវុធកែច្នៃបាញ់(ស្នរឬកំពួច)ចំនួន២ដើម កំពួចចំនួន៤ដើម និងកញ្ចក់ម៉ូតូចំនួន៤ ដែលពួកគេបានលាក់ទុកក្នុងទីតាំងខាងលើនោះ។
នៅទីតាំងទី២ គឺចំណុចផ្ទះក្បឿង២ខ្នងដែលជាផ្ទះរបស់ឳពុកម្តាយជនល្មើសឈ្មោះ សុខ សុថេន អាយុ២៧ឆ្នាំ ជាមេចែកចាយថ្នាំញៀនដ៍សកម្មក្នុងខេត្តកំពង់ឆ្នាំង តែរូបគេបានគេចខ្លួនបាត់ខណៈសមត្ថកិច្ចចម្រុះកំពុងបង្ក្រាបនៅទីតាំងទី១ ដោយយកទៅជាមួយនូវលុយមួយចំនួន ម៉ូតូហុងដាសេ១២៥១គ្រឿង និងមានកាំភ្លើងខ្លី១ដើមទៀតផង។ ក្នុងទីតាំងនេះសម្ថកិច្ចឆែកឆេរ រកឃើញថ្នាំញៀនម៉ាទឹកកកទម្ងន់៣៣៧០ក្រាម(ជញ្ជីងថ្លឹងថ្នាំញៀន១) ដែលមានតម្លៃប្រមាណជាង២ពាន់ដុល្លា ស្លាកលេខរថយន្តមួយ និងបានរកឃើញបៀរនីឡុងជាច្រើនហ៊ូ ដែលគេ សង្ស័យថាផ្ទះខាងលើនេះគឺជាកន្លែងបើកវង់ល្បែងស៊ីសងទៀតផង។
ដោយឡែកជនសង្ស័យ ឈ្មោះ ប៊ិន បូរី ហៅឃ្លាច រស់នៅក្នុងភូមិកណ្តាល សង្កាត់កំពង់ ឆ្នាំង បានរត់គេចពីសមត្ថកិច្ចកន្លងមក នៅវេលាម៉ោង៣និង៤៥នាទីល្ងាចថ្ងៃដែល ក្នុងករណី គ្រោះ ថ្នាក់ ចរាចរណ៍មួយ កើតឡើងរវាងម៉ូតូ និងម៉ូតូ ក្នុងពេលសមត្ថកិច្ចនគរបាលចុះទៅជួយ អន្តរាគម សមត្ថកិច្ចបានឃើញក៏ដេញចាប់ខ្លួនជនសង្ស័យខាងលើបានគេពូកែខាងលួចមាន់ និងក៏ជាមុខសញ្ញាចែកចាយថ្នាំញៀនម្នាក់ដែរ។ ជនសង្ស័យទាំង២នាក់ រួមនឹងវត្ថុតាងត្រូវបានសមត្ថកិច្ចនគរបាលប្រឆាំងគ្រឿងញៀនខេត្ត កសាងសំណុំរឿងតាមនីតិវិធីបញ្ជូនទៅសាលាដំ បូងខេត្ត ចោទប្រកាន់ និងផ្តន្ទាទោសតាមផ្លូវច្បាប់៕ ដោយ រិទ្ធិ ជ័យ
