បុរសម្នាក់បាក់កជើងខាងស្ដាំ និងរយះប្រអប់ជើងស្ដាំ ខណៈកំពុងជិះម៉ូតូ ត្រូវរថយន្តបញ្ច្រាសទិសគ្នាបុកចំពេញទំហឹង
ខេត្តបន្ទាយមានជ័យ៖ បុរសម្នាក់ ជិះម៉ូតូមួយគ្រឿងម៉ាក ហុងដាឌ្រីមC125 ត្រូវរថរថយន្ត ISUZU មួយបាំងកន្លះធ្វើដំណើរបញ្ច្រាសទិសគ្នាក្នុងល្បឿនលឿនបុកចំពេញទំហឹងបណ្តាលឲ្យរងរបួសធ្ងន់បាក់ កជើងខាងស្ដាំ និងរយះប្រអប់ជើងស្ដាំ ។ ដោយម៉ូតូ និងរថយន្តខូចខាតដូចគ្នា ហេតុការណ៍នេះបានកើតឡើងនៅវេលាម៉ោង ១០ព្រឹក ថ្ងៃទី០១ ខែកុម្ភៈ ឆ្នាំ២០១៥ នៅលើផ្លូវជាតិលេខ 56A ត្រង់ចំណុចភូមិគោកតាឯក ឃុំតាបែន ស្រុកស្វាយចេក ខេត្តបន្ទាយមានជ័យ ។
លោក សន គឹមសួគ៌នាយការិយាល័យនគរបាលចរាចរណ៍ផ្លូវជើងគោក ខេត្តបន្ទាយមានជ័យ បានប្រាប់អោយដឹងថា គ្រោះ ថ្នាក់ ចរាចរណ៍នោះបង្កឡើងដោយរថយន្ត ISUZU មួយបាំងកន្លះពណ៌ស្ករ ពាក់ស្លាកលេខបាត់ដំបង 2A-2160 សេរីឆ្នាំ1997 ចង្កូតស្ដាំ បើកបរដោយឈ្មោះឈុន ឆវី ភេទប្រុស អាយុ៣៤ឆ្នាំ រស់នៅភូមិរ៉ាឃុំធិបតី ស្រុកម៉ោងឫស្សី ខេត្តបាតដំបង បើកក្នុង ទិសដៅពីត្បូងទៅជើងបានបុកជាមួយម៉ូតូមួយគ្រឿងម៉ាក ហុងដាឌ្រីមC125 ពណ៌ខ្មៅ សេរីឆ្នាំ២០១០ ពាក់ស្លាកលេខ បន្ទាយ មានជ័យ 1E-5248 បើកបរទិសដៅបញ្ច្រាសទិសគ្នា ដោយឈ្មោះតុំ សុធា ភេទប្រុស អាយុ២៨ឆ្នាំ រស់នៅភូមិគោករកា ឃុំតាបែន ស្រុកស្វាយចេក ខេត្តបន្ទាយមានជ័យ បណ្តាលឲ្យរងរបួសធ្ងន់បាក់កជើងខាងស្ដាំ និងរយះប្រអប់ជើងស្ដាំ ។
លោកបានបន្តទៀតថា បន្ទាប់ពីកើតហេតុ បុរសម្ចាស់រថយន្ត ISUZU ត្រូវបានឃាត់ខ្លួន រីឯជនរង គ្រោះត្រូវបានសាច់ញាតិដឹកយកទៅសង្គ្រោះមន្ទីរពេទ្យមិត្តភាពកម្ពុជា ជប៉ុនមង្គលបូរី។ ចំណែករថយន្ត និងម៉ូតូសមត្ថកិច្ច យកទៅរក្សាទុកនៅអធិការដ្ឋាននគរបាលស្រុកស្វាយចេករង់ចាំធ្វើការដោះស្រាយតាមច្បាប់៕ ដោយ យីហាំង
