យុវជនម្នាក់ត្រូវគេចាក់មួយដែកឆាបធ្លាយពោះស្លាប់ភ្លាមៗ ក្នុងជំលោះរាំធុងបាស់ពេលយប់
ខេត្តកំពង់ឆ្នាំង៖ យុវជនម្នាក់បានដេកដួលស្លាប់ធ្លាយពោះដោយសារគេចាក់នឹងដែកឆាប នៅនឹងកន្លែងកើតហេតុខណៈពេលរូបគេព្យាយាមចូលទៅឃាត់យុវជន២ក្រុមឈ្លោះគ្នាដែលផ្ទុះការបើកឆាកប្រយុទ្ធយ៉ាងច្របូកច្របល់ក្នុពិធីរាំធុងបាស់ពេយប់នៅសាលាបុណ្យ កាលពីវេលាវេលាម៉ោង១០ និង១៥នាទីយប់ថ្ងៃទី០៦ ខែកម្ភៈ ឆ្នាំ២០១៥ នៅសាលាបុណ្យអូរសណ្តាន់ចាស់ស្ថិតក្នុងភូមិអូរសណ្តាន់ចាស់ ឃុំទឹកហូត ស្រុករលារប្អៀរ ខេត្តកំពង់ឆ្នាំង។
សមត្ថកិច្ចមូលដ្ឋានបានអោយដឹថា៖ យុវជនរងគ្រោះមានឈ្មោះ គល់ យ៉ា អាយុ២៥ឆ្នាំ មានប្រពន្ធឈ្មោះ យ៉ង់ ហុង អាយុ២៣ឆ្នាំ មានកូនប្រុសម្នាក់ រស់នៅក្នុងភូមិគោកស្តៅ ឃុំទឹកហូត ស្រុករលារប្អៀរ ខេត្តកំពង់ឆ្នាំង។
យុវជនឈ្មោះ អ៊ន សុភី អាយុ១៩ឆ្នាំ មានទីលំនៅក្នុងភូមិអូរសណ្តាន់ចាស់ ឃុំទឹកហូត ដែលជាសាក្សីក្នុងហេតុការណ៏ចខាងលើនេះ បានរៀបរាប់អោយអ្នកយកព័ត៌មានដឹងថា៖ នៅយប់កើតហេតុជនរងគ្រោះបានទៅចូលរួមរាំលេងកំសាន្តជាមួយ និងរូបគេ នៅក្នុងកម្មវិធីបុណ្យ ពេលកំពុងតែរាំលេងក៏មានជម្លោះរវាងយុវជន២ក្រុមនៅក្នុងវង់រាំ បន្ទាប់ពីឃើញដូច្នេះជនរងគ្រោះក៏បានរត់ទៅឃាត់គេ ដើម្បីកុំអោយមានការឈ្លោះប្រកែកគ្នា ខណៈកំពុងតែចូលទៅឃាត់ ក៏ស្រាប់តែឃើញយុវជនម្នាក់ក្នុងចំនោមយុវជនទាំង២ក្រុមនោះ បានចាក់មកលើយុវជនរងគ្រោះមួយដែកឆាបមុខ៣ ចំដោះខាងឆ្វេងជំរៅ៣សង់ទីម៉ែត្រ បណ្តាលអោយប្រកាច់ស្លាប់ភ្លាមៗនៅនឹងកន្លែងតែម្តង។
លោក យឹម សុផល នាយផ្នែកព្រហ្មទណ្ឌនៃអធិការដ្ឋាននគបាលស្រុករលាប្អៀរបានអោយដឹងថា៖ ក្រោយពីកើតហេតុលោកបានដឹកនាំកម្លាំងចុះទៅពិនិត្យនៅកន្លែងកើត ហេតុភ្លាមៗ តែពេលនោះជនល្មើសបានរត់គេចខ្លួនបាត់ទៅហើយ សមត្ថកិច្ចក៏បានកសាងសំណុំរឿងតាមផ្លូវច្បាប់តាមចាប់ជនល្មើស។ ចំណែកសពជនរងគ្រោះបានប្រគល់ជូនក្រុមគ្រួសារទទួលយកទៅធ្វើបុណ្យតាមប្រពៃណី។
ព្រឹកឡើងថ្ងៃទី០៧ ខែកុម្ភៈ ឆ្នាំ២០១៥ សមត្ថកិច្ចបានស្រាវជ្រាវចាប់ឃាត់ខ្លួនជនល្មើសឈ្មោះ ម៉ាង រី (ហៅពៅ) អាយុ៣០ឆ្នាំបាននៅចំណុចភូមិប៉ាហ៊ី ឃុំទឹកហូត ខណៈដែលជនល្មើសកំពុងសំរាកព្យាបាលរបួសនៅផ្ទះពេទ្យឯកជននៅទីនោះ។ នៅចំពោះមុខសមត្ថកិច្ចជនល្មើសបានសរភាពថា៖ រូបគេមានទីលំនៅក្នុងភូមិអូរសណ្តាន់ចាស់ ឃុំទឹកហូត ស្រុករលាប្អៀរ។ មូលហេតុនាំអោយគេចាក់ទៅលើជនរងគ្រោះ មកពីជនរងគ្រោះបានវាយ និងចាក់ខ្លួននឹងដែកខៃចំកំពួនជើងគេមុន និងវាយមកលើរូបគេយ៉ាងចាស់ដៃទៀតផង ពេលជនរងគ្រោះ និងបក្ខពួកប្រតាយប្រតប់ជាមួយ និងខ្លួន ពេលនោះគេក៏ចេះតែចាក់ៗទៅមិនដឹងថាត្រូវចំអ្នកណាទេ ព្រោះបក្ខពួកខាងជនរងគ្រោះមានគ្នាច្រើនមកវាយរូបគេតែម្នាក់ឯង។
ទោះជនល្មើសឆ្លើយការពារខ្លួនក៏ដោយ សមត្ថកិច្ចបានកសាងសំណុំរឿងនេះបញ្ជូនទៅស្នងការដ្ឋាននគរបាលខេត្ត ដើម្បីអោយការិយាល័យជំនាញកសាងសំណុំរឿងបន្ថែមបញ្ជូនជនល្មើសទៅកាន់តុលាការខេត្តចាត់ការបន្ត តាមផ្លូវច្បាប់៕ ដោយ រិទ្ធិ ជ័យ
