នារីជាសន្តិសុខរោងចក្រស៊ិនតាយម្នាក់ រងការវាយប្រហារដោយទឹកអាស៊ីតទាំងព្រឹកព្រលឹម ខណៈនាងដើរទៅធ្វើការ
ភ្នំពេញ៖កម្មការិនីម្នាក់ ជាសន្តិសុខនៅរោងចក្រស៊ិនតាយ ក្នុងសង្កាត់ចោមចៅ ត្រូវបាននារីមិនស្គាល់អត្ថសញ្ញាណម្នាក់យកទឹកអាស៊ីតចាក់ស្រោចលើខ្លួនទាំងព្រលឹមបង្កឲ្យមានការភ្ញាក់ផ្អើល។ ហេតុការណ៍វាយប្រហារដោយទឹកអាស៊ីដនេះបានកើតឡើងនៅវេលាម៉ោង ៦ និង១០នាទី ព្រឹកថ្ងៃទី០៦ ខែមីនា ឆ្នាំ២០១៥នេះ ក្នុងពេលដែលនារីរងគ្រោះរូបនោះដើរទៅធ្វើការដល់ចំណុចមុខផ្សារកាណាស៊ីធីខណៈនោះជនបង្កបានរត់គេចខ្លួនបាត់។
នារីរងគ្រោះដោយសារជះទឹកអាស៊ីតនោះមានឈ្មោះថា អានី អាយុ ២០ឆ្នាំ ស្នាក់នៅផ្ទះជួលភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។ ករណីនៃការវាយប្រហារដោយជះទឹកអាស៊ីតភ្លាមៗនោះ ពុំទាន់ដឹងពីមូលហេតុនៅឡើយទេ។ ប៉ុន្តែអ្នកនៅកន្លែងកើតហេតុបានដាក់ការសង្ស័យថា អាចបណ្តាលមកពីស្នេហាត្រីកោណ ។ បន្ទាប់ពីគេជះទឹកអាស៊ីតដាក់ស្រោចរលេះរលួយពេញខ្លួន ប្រជាពលរដ្ឋនៅក្បែរកន្លែងកើតហេតុនោះ បាននាំគ្នាបាញ់ទឹកស្រោចលើខ្លួននារីរងគ្រោះ ដើម្បីបន្សាបអាស៊ីត។ ហើយបន្ទាប់មកបានបញ្ជូនទៅសង្គ្រោះបន្ទាន់នៅមន្ទីរពេទ្យរុស្ស៊ី៕
http://ift.tt/1zU4QgB
