បុរសម្នាក់ទិញត្រីកំពតពីផ្សារមកស្ងោរហូបពុល តែបញ្ជូនទៅមន្ទីរពេទ្យទាន់
ខេត្តកំពង់ឆ្នាំង៖ បុរសវ័យក្មេងម្នាក់ បានពុលត្រីកំពត ក្រោយពីរូបគេបានទិញត្រីកំពតនោះពីអ្នកនេសាទយកមកស្ងោរជ្រក់ហូបតែម្នាក់ឯង។ ហេតុការណ៍នេះបានកើតឡើងនៅវេលា ម៉ោង៩ និង១០នាទីព្រឹកថ្ងៃទី១០ ខែមីនា ឆ្នាំ២០១៥ ក្នុងផ្ទះជនរងគ្រោះ ក្នុងភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង។
បុរសវ័យក្មេងដែលពុលត្រីកំពតនោះមានឈ្មោះ វ៉ាន់ រដ្ឋា អាយុ២២ឆ្នាំ រស់នៅភូមិសង្កាត់កើតហេតុខាងលើ មានប្រពន្ធជាគ្រូបង្រៀននៅខេត្តកំពត។ មុនពេលពុលត្រីកំពតនោះ រូបគេបានទិញត្រីកំពតចំនួន៤ក្បាលពីអ្នកនេសាទម្នាក់ យកមកស្ងោរជ្រក់ហូបតែម្នាក់ឯងនៅផ្ទះ។ ក្រោយពេលហូបរួច១ម៉ោង ក៍មានអាការៈវិលមុខរកក្អួតចង្អោរ ស្រវាំង ភ្នែក និងស្ពឹកដៃជើងទាំងអស់។ក្រោយពីមានសភាពបែបនេះរូបគេក៍បានអោយអ្នកជិត ខាងជូនមកមន្ទីរពេទ្យបង្អែកខេត្តដើម្បីអោយក្រុមគ្រូពេទ្យជួយសង្គ្រោះ។
ពេលនេះបុរសរូបនេះមានអាការៈធូរស្រាលបន្តិចហើយ ក្រោយពីក្រុមគ្រូពេទ្យជំនាញនៅមន្ទីរពេទ្យខេត្តបានចាក់ថ្នាំបន្សាបជាតិពុល រួចមក។ អ្នកគ្រូពេទ្យនៅក្នុងអាគារ សង្គ្រោះបន្ទាន់បានធ្វើការអំពាវនាវដល់បងប្អូនប្រជានេសាទ ប្រជាកសិករ ដែលរង គ្រោះផ្សេងៗត្រូវតែរូតរះបញ្ជូនអ្នករងគ្រោះមកកាន់មន្ទីរពេទ្យបង្អែកខេត្តជាបន្ទាន់ ដើម្បី គ្រូពេទ្យជួយសង្គ្រោះអាយុជីវិតអោយបានទាន់ពេល៕ ដោយ រិទ្ធិ ជ័យ
http://ift.tt/1EaGVP2
