បង្ក្រាបក្រុម ចោរឆក់៦នាក់ ក្នុងខណ្ឌចំនួន៥ ក្រោយធ្វើ សកម្មភាព តាមផ្លូវសាធារណៈ
(ភ្នំពេញ)៖ ប្រតិបត្ដិការរបស់កម្លាំងនគរបាលល្បាត របស់ខណ្ឌមួយចំនួនរួមមាន ខណ្ឌដូនពេញ ៧មករា ទួលគោក ឫស្សីកែវ និងខណ្ឌជ្រោយចង្វារ បានបង្ក្រាបនិងចាប់ខ្លួន មុខសញ្ញាឆក់ ៦នាក់ ក្រោយពីពួកគេបានធ្វើសកម្មភាពតាមដងផ្លូវសាធារណៈ ក្នុងនោះមានឆក់កាបូប និងឆក់ទូរស័ព្ទជាដើម ។ លោក ជួន ណារិន្ទ ស្នងការរង និងជាប្រធានការិយាល័យ នគរបាលព្រហ្មទណ្ឌរាជធានីភ្នំពេញ បានបញ្ជាក់ថា តាមរយៈការចុះល្បាតរបស់មន្ដ្រីនគរបាលតាមបណ្ដាខណ្ឌ លើការពង្រឹងបញ្ហាសន្ដិសុខ តាម ការណែនាំពីសំណាក់ស្នងការនគរបាល រាជធានីភ្នំពេញនោះ ជនសង្ស័យ៦នាក់ អមដោយម៉ូតូជិះធ្វើសកម្មភាព ត្រូវបានបង្ក្រាបនិងចាប់ខ្លួន ក្រោយពីពួកគេបានឆក់យកទូរស័ព្ទ និងកាបូបរបស់ប្រជាពលរដ្ឋ ធ្វើដំណើរតាមដងផ្លូវ ។
ជនសង្ស័យ ៦នាក់ត្រូវចាប់ខ្លួន ក្នុងនោះ ចាប់បាននៅ ខណ្ឌ៧មករា ២នាក់ នៅខណ្ឌឫស្សីកែវ និង ខណ្ឌជ្រោយចង្វារ ២នាក់ ខណ្ឌទួលគោកម្នាក់ និង ខណ្ឌដូនពេញម្នាក់ ដកហូតទ្រព្យសម្បត្ដិ ប្រគល់ជូនជនរងគ្រោះវិញ ។
លោក ជួន ណារិន្ទ ធ្លាប់បានបញ្ជាក់ថា ជនសង្ស័យដែលជា មុខសញ្ញាឆក់ មាន៣ប្រភេទ គឺឆក់ដោយប្រដាប់អាវុធ ឆក់ដោយថ្មើជើង និងឆក់ដោយមានមធ្យោបាយធ្វើសកម្មភាព។
លោក បានបន្ដទៀតថា នៅពេលនេះនគរបាលជំនាញព្រហ្មទណ្ឌ និងនគរបាលតាមបណ្ដាខណ្ឌ បាននឹងកំពុងបញ្ចេញប្រតិបត្ដិការតាមស្រាវជ្រាវ និងទប់ស្កាត់ សកម្មភាពឆក់ទាំងនេះ តាមរយៈការបង្កើនចុះល្បាត ក្នុងភូមិសាស្ដ្រ ទាំងថ្ងៃទាំងយប់ ខណៈដែលបញ្ហានេះ ហាក់បីដូចជាមានការកើនឡើងគួរឱ្យកត់សម្គាល់ ។ បច្ចុប្បន្នជនសង្ស័យទាំង៦នាក់ ត្រូវបានយកទៅសួរនាំ នៅតាមអធិការដ្ឋាននគរបាលខណ្ឌ ដើម្បីកសាងសំណុំរឿងបញ្ជូនទៅកាន់តុលាការ៕
ប្រភព៖ FRESHNEWS
from Khmernote - The best entertainment website in Cambodia http://ift.tt/1GiPmKx
