តុលាការផ្ដន្ទាទោស មនុស្សប្រុសស្រី៥នាក់ ដាក់ពន្ធនាគារម្នាក់ៗ២៥-៣០ឆ្នាំ ករណីជួញដូរគ្រឿងញៀន១៤គីឡូក្រាម
រាជធានីភ្នំពេញ៖ ចៅក្រមតុលាការសាលាដំបូងរាជធានី ភ្នំពេញប្រកាសសាលក្រម កាលពីព្រឹកថ្ងៃទី០២ ខែមេសា ឆ្នាំ២០១៥ សម្រេចផ្ដន្ទាទោសដាក់ពន្ធនាគារក្នុងម្នាក់ៗពី២៥-៣០ឆ្នាំ និងពិន័យជាប្រាក់ឲ្យបង់ចូលថវិការដ្ឋពី៤០-៥០លានរៀលក្រោមការចោទប្រកាន់ពីបទជួញដូរគ្រឿងញៀនរក្សាទុកអាវុធខុសច្បាប់។
ចៅក្រមតុលាការសាលាដំបូងរាជធានីភ្នំពេញ លោកម៉ុង មុនីសោភា បានគូសបញ្ជាក់ថា កាលពីថ្ងៃទី១៣ ខែមីនា ឆ្នាំ២០១៣កន្លងទៅ ជនជាប់ចោទចំនួន ៥នាក់បានប្រព្រឹត្តអំពើជួញដូរគ្រឿងញៀនទម្ងន់១៤គីឡូក្រាមនៅភូមិក្បាលដំរី សង្កាត់កាកាប ខណ្ឌពោធិ៍សែនជ័យ។
ក្នុងចំណោមជនសង្ស័យទាំង៥នាក់គឺមានតែ២នាក់ប៉ុណ្ណោះ ដែលសមត្ថកិច្ចបានឃាត់ខ្លួននៅថ្ងៃ១៣ ខែមីនា ឆ្នាំ២០១៣។ ចំណែកជនសង្ស័យ៣នាក់ទៀតបានរត់គេចខ្លួន។
សាលក្រមដែលប្រកាសដោយលោកចៅក្រមម៉ុង មុនីសោភា បានសម្រេចផ្ដន្ទាទោសឈ្មោះស៊្រុន ប៊ុនធឿន ភេទប្រុស អាយុ៣២ឆ្នាំ និងឈ្មោះឡុង វណ្ណធី ភេទស្រី អាយុ៤៤ឆ្នាំ ដាក់ពន្ធនាគារក្នុងម្នាក់ៗ២៥ឆ្នាំ និងពិន័យជាប្រាក់ឲ្យបង់ចូលថវិការដ្ឋក្នុងម្នាក់ចំនួន ៤០លានរៀល។
ចំណែកជនជាប់ចោទ៣នាក់ទៀត ដែលបានរត់គេចខ្លួនក៏ត្រូវបានតុលាការសម្រេចផ្តន្ទាទោសកំបាំងមុខដាក់ពន្ធនាគារក្នុងម្នាក់ៗរយៈពេល៣០ឆ្នាំ និងពិន័យជាប្រាក់ក្នុងម្នាក់៥០លានរៀល ព្រមទាំងសម្រេចបង្គាប់ឲ្យសមត្ថកិច្ចសាធារណៈស្វែងរកជនជាប់ចោទមកអនុវត្តតាមសេចក្តីសម្រេចរបស់តុលាការ។
ជនជាប់ទាំង៣នាក់រួមមានៈ ឈ្មោះឆន ដារ៉ា ភេទប្រុស អាយុ២៩ឆ្នាំ ឈ្មោះគង់ ហាំ ភេទប្រុស អាយុ២៦ឆ្នាំ និងឈ្មោះវង្ស ស្រីលក្ខណ៍ ភេទស្រី អាយុ៣២ឆ្នាំ។
តំណាងអយ្យការអមតុលាការបានចោទប្រកាន់ជនជាប់ចោទទាំង៥នាក់ពីបទរក្សាទុក និងជួញដូរគ្រឿងញៀនខុសច្បាប់ បទប្រើប្រាស់អាវុធខុសច្បាប់ និងបទសមគំនិតក្នុងអំពើជួញដូរគ្រឿងញៀននៅចំណុចផ្ទះលេខ៧៣, ៩៧, ៨០ និង៨២ ផ្លូវបេតុង ភូមិក្បាលដំរី សង្កាត់កាកាប ខណ្ឌពោធិ៍សែនជ័យ ឆ្នាំ២០០៨ ដោយក្នុងនោះសមត្ថកិច្ចបានរឹបអូសថ្នាំញៀនប្រភេទម៉ាទឹកកក និងយ៉ាម៉ាទម្ងន់១៤គីឡូក្រាម ព្រមទាំងសម្ភារៈថ្លឹងគ្រឿងញៀនមួយចំនួនធំ៕សីហា
http://ift.tt/1ENMrKz
