ក្នុងចំណោមមិត្តភក្តិ៨នាក់ផឹកស្រាហ្គោលអស់ចំនួន១១ដប ចេញពីផឹកបើកឡានបុករបាំងពុះចែកទ្រូងផ្លូវបាក់អស់១ផ្ទាំង ខ្ទេចកំពិតមុខរថយន្តយ៉ាងដំណំ
ខេត្តព្រះសីហនុ៖ រថយន្តមួយគ្រឿងបានរងការខូចខាត មួយកំណាត់មុខបន្ទាប់ពីអ្នកបើកបរជាជនជាតិចិនស្រវឹងជោគជាំ បើកបុករបាំងពុះទ្រូងចែកផ្លូវកាលពីវេលាម៉ោង២ និង១៥នាទីទៀបភ្លឺឈានចូលថ្ងៃទី២៣មេសារឆ្នាំ២០១៥ នៅត្រង់ចំណុចផ្លូវកែងអតីតតុលាកាចាស់ ស្ថិតក្នុងភូមិ៤ សង្កាត់លេខ៤ ក្រុងព្រះសីហនុ។ #សមត្ថកិច្ចចរាចរណ៍ផ្លូវគោកខេត្តព្រះសីហនុបានអោយដឹងថា រថយន្តដែលបើកបុករបាំងពុះទ្រូងចែកផ្លូវនេះមានម៉ាកស្តារិច ពណ៌ស ពាក់ស្លាកលេខភ្នំពេញ2A-5516 បើកបរដោយបុរសជនជាតិចិនឈ្មោះ waing bai hai អាយុ២៥ឆ្នាំ ស្នាក់នៅសង្កាត់លេខ៤ ក្រុងព្រះសីហនុ រួមដំណើរជាមួយបុរសជនជាតិចិនម្នាក់ទៀតមិនស្គាល់ឈ្មោះ។
ក្រោយកើតហេតុសមត្ថកិច្ចបាននាំយកបុរសជនជាតិចិន ទៅការិយាល័យចរាចរណ៍ ផ្លូវគោកដើម្បីវាស់សារធាតុស្រវឹង ហើយបានរកឃើញមានសារជាតិស្រវឹងរហូតដល់0.51មីលីលីត្រខ្សល់ ទើបសមត្ថកិច្ចឃាត់ខ្លួនរក្សាទុកនៅការិយាល័យរងចាំការដោះស្រាយតាមផ្លូវច្បាប់បើទោះបីមិនបណ្តាលអោយគ្រោះថ្នាក់ដល់មនុស្សណាម្នាក់យ៉ាងណាក៏ដោយ។
អ្នកបានឃើញហេតុការណ៍បានអះអាងថា នៅមុនកើតហេតុគេបានឃើញរថយន្តមួយគ្រឿងនេះបើកបរលើដងផ្លូវឯករាជ្យនេះ ជាច្រើនសារក្នុងល្បឿនដូចហោះ រហូតដល់ម៉ោងកើតហេតុ ត្រង់ចំណុចផ្លូវកោង ដោយសារល្បឿនលឿនពេកទើបធ្វើអោយរថយន្តបទពុំទាន់ក៏ជ្រុលទៅបុករបាំងចែកផ្លូវបាក់អស់មួយផ្ទាំង ហើយរថយន្តរងការខូចខាតស្ទើរមួយកំណាត់មុខ។
ដោយឡែក ស្ត្រីបរើការនៅខារ៉ាអូខេ ឃីងផារ៉ូបានអោយដឹងថា បុរសជនជាតិចិនដែលបើករថយន្តបុកឃើនចែកផ្លូវនេះសុទ្ឋស្រវឹងជោគជាំខ្លាំងណាស់ព្រោះពួកគេបានផឹកស្រា ហ្គោល អស់ចំនួន១១ដប ក្នុងចំណោមមនុស្សតែប្រមាណ៧ទៅ៨នាក់តែប៉ុណ្ណោះ ហើយបានគិតលុយចេញមុនកើតហេតុប្រមាណជាងកន្លះម៉ោងតែប៉ុណ្ណោះ នេះសំណាងហើយពុំបានបើកបុកមនុស្ស ឬអ្នកធ្វើតំណើរតាមផ្លូវ។
បច្ចុប្បន្នទាំងមនុស្ស ទាំងរថយន្ត កំពុងត្រូវបានសមត្ថកិច្ចរក្សាទុកនៅការិយាល័យចរាចរណ៍ផ្លូវគោកខេត្តរងចាំចាត់ការតាមផ្លូវច្បាប់៕ ដោយ សមុទ្រខៀវ
http://ift.tt/1yWQfro
