ក្រុមអាវុធហត្ថលើផ្ទៃដឹកនាំដោយ លោក ស្វាយ សុវណ្ណា ប្រចាំនៅតំបន់អភិរក្សជីវៈចំរុះសីមា ដេញបាញ់ឡានដឹកឈើ២-៣ដុំ យ៉ាងសាហាវ ដោយសារតែភ្លេចចូលបង់លុយដូចសព្វមួយដង
ខេត្តមណ្ឌលគិរី៖ មន្ត្រីអាវុធហត្ថលើផ្ទៃ បំរើការនៅតំបន់អភិរក្សជីវៈចម្រុះ WCS រង់ការចោទប្រកាន់ថា បានបាញ់ប្រហារទៅលើរថយន្តដឹកឈើរបស់ឈ្មួញជាច្រើនគ្រាប់ កាលយប់ពីថ្ងៃទី១៧ មេសា ឆ្នាំ២០១៥ ត្រង់ចំណុច អង់តែង ទឹកខួប តាមបណ្ដោយផ្លូវជាតិលេខ ៧៦ ក្នុងស្រុកកែវសីមា។ ហើយករណីនេះត្រូវបានលោក ស្វាយ សុវណ្ណា ប្រធានក្រុមក្ដាប់រួមប្រចាំស្នាក់ការអភិរក្ស មានប្រតិកម្មយ៉ាងខ្លាំង ចំពោះការចេញផ្សាយរបស់ Fresh News ចំពោះករណីផ្ទុះអាវុធក្នុងការបង្ក្រាបបទល្មើសព្រៃឈើ។
លោកបានបន្តថា ឈ្មួញឈើមិនមែនដឹកឈើ២ដុំដូចដែលសារព័ត៌មានមួយចំនួនក្នុងស្រុកចុះផ្សាយនោះទេ នៅលើរថយន្ត មានកំណាត់ឈើ៥ដុំធំៗស្មើនឹង០.៦ម៉ែត្រគូប។ នៅពេលសមត្ថកិច្ចបង្ក្រាបរថយន្តដឹកឈើខុសច្បាប់ខាងលើ ត្រូវបានក្រុមឈ្មួញនិងគ្នីគ្នា នាំគ្នាបើករថយន្តដេញបុក និងកៀររថយន្តសមត្ថកិច្ច ព្រមទាំងបាញ់មកលើសមត្ថកិច្ចមួយគ្រាប់ទៀតផង។ ហើយលោកបញ្ជាក់ថា ក្រុមឈ្មួញ មិនមែនរកដូរបាយទេ គឺឈ្មួញឈើដ៏សកម្មទៀតផង ។
បើតាមការដកស្រង់សម្ដីអ្នកបើករថយន្តដឹកឈើ ដែលមានឈ្មោះ រ៉េត បញ្ញា ភេទប្រុស អាយុ២១ឆ្នាំ បានឲ្យដឹងថា ជារៀងរាល់ថ្ងៃ ខ្លួនដឹកឈើបន្តិចបន្តួចគ្រាន់ដូរបាយ ហើយធ្លាប់បង់លុយឲ្យ លោក ស្វាយ សុវណ្ណា រាល់ដង ទើបតែថ្ងៃនេះ ភ្លេចបង់ទើបមានការបាញប្រហារលើឡានរបស់គាត់ ហើយថែមទាំងចោទថា ខ្លួនបានបាញ់តដៃជាមួយសមត្ថកិច្ចទៅវិញ។
ដោយឡែក លោក មាគ វុឌ្ឃី ប្រធានគំរោង គ្រប់គ្រង់ព្រៃការពារ និងតំបន់អភិរក្សជីវៈចម្រុះកែវសីមា មណ្ឌលគិរី ក្រចេះ អោយដឹងដែរថា ពិតជាមានការផ្ទុះអាវុធនៅពេលបង្ក្រាបបទល្មើសព្រៃឈើពិតមែន ហើយមន្ត្រីជំនាញរបស់លោក ចាប់បានរថយន្តកាម៉ារីហើម១គ្រឿង មានដឹកឈើចំនួន៥ដុំ ស្មើនឹង0.៦ម៉ែត្រគូប ហើយមុននឹងឈានដល់ការផ្ទុះអាវុធ គឺដោយសារឈ្មួញ ព្យាយាមបើករថយន្តកៀរ រថយន្តរបស់មន្ត្រីអាវុអហត្ថដែលបម្រើនៅទីនេះទំលាក់ជ្រោះទើបសមត្ថកិច្ចបង្ខំចិត្ត ប្រើសិទ្ធការពារខ្លួនតែប៉ុណ្ណុះ ៕ ដោយ ឦសាន២
http://ift.tt/1Hj3JA4
