ប្តីប្រពន្ធ និងកូនស្រី២នាក់ស្លាប់យ៉ាងអាណោចអាធ័មក្នុងអណ្តាតភ្លើងឆេះផ្ទះម៉ោង៤ទៀបភ្លឺ
ភ្នំពេញ៖ ក្នុងហេតុការណ៍អគ្គិភ័យឆេះលំនៅដ្ឋានថ្មក្រោមឈើលើយ៉ាងកំណាចបានឆក់យកជីវិត មនុស្ស៤នាក់ គឺប្តីប្រពន្ធ និងកូនស្រី២នាក់ ក្នុងគ្រួសារមួយ បានស្លាប់យ៉ាងអាណោចអាធ័ម ក្នុងភ្នក់ភ្លើងឆេះទាំងមូលនៃតួផ្ទះ កាលពីវេលាម៉ោង៤និង៣០នាទីទៀបភ្លឺ ថ្ងៃទី២១ ខែឧសភា ឆ្នាំ២០១៥ នៅចំណុចផ្លូវ៩២ ភូមិច្រេះ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ខណៈអ្នកភូមិក្បែរខាង ជាពិសេសគ្រួសារជនរងគ្រោះកំពុងលង់លក់ក្នុងដំណេក។
ជាជំហានដំបូងសមត្ថកិច្ចអះអាងថា អគ្គិភ័យនេះអាចបណ្តាលមកពីទុស្សេខ្សែភ្លើង ផ្តើមចេញពីផ្ទះសង់អំពីឈើលើ ថ្មក្រោម របស់ជនរងគ្រោះ និងរាលដាលឆាបឆេះបន្តទៅលំនៅដ្ឋានចំនួន២ទៀត ។ ដោយសារស្ថានភាពភ្លើងមានលក្ខណៈសន្ធោសន្ធៅខ្លាំង ណាមួយស្ថានីយ៍ អន្តរាគមន៍នៅឆ្ងាយ ហើយការផ្ដល់ព័ត៌មានអោយសមត្ថកិច្ចមានភាពយឺតយ៉ាវ និងខ្វះកិច្ចសហការពីប្រជាពលរដ្ឋជិតខាងនៅក្នុងមូលដ្ឋានកើតហេតុ ទើបបណ្តាលឲ្យមនុស្ស៤នាក់បានស្លាប់ ទាំងគ្រួសារ ។
សមត្ថកិច្ចបានបញ្ជាក់ថា៖ ជនរងគ្រោះដែលស្លាប់ទាំងនោះឈ្មោះ គឹម ចាន់រ័ត្ន អាយុ៣៧ឆ្នាំ ជាប្តី មុខរបរលក់ដូរ, ឈ្មោះ សែន សុផល អាយ៣៦ឆ្នាំ ជាប្រពន្ធ មុខរបរជាគ្រូបង្រៀន និងកូនស្រី២នាក់ ឈ្មោះ គឹម ណារី អាយុ១០ឆ្នាំ និងឈ្មោះ គឹម សួស្តី អាយុ៨ឆ្នាំ ត្រូវជាកូន ។ ឪពុកម្តាយបានស្លាប់នៅខាងក្រោម ចំណែកកូនស្រីទាំង២បានស្លាប់នៅជាន់ឡៅតឿ ។ សមត្ថកិច្ចជំនាញសន្និដ្ឋានជាជំហានដំបូងថា ករណីអគ្គីភ័យនេះ បណ្ដាលមកពីឆ្លងចរន្តភ្លើង។ បើទោះជាយ៉ាងណា សមត្ថកិច្ចក៏នៅតែមិនទាន់ហ៊ានសន្និដ្ឋានបានថា ហេតុការណ៍នេះ ជាករណីឃាតកម្ម នោះទេ៕ គិរី
http://ift.tt/1INFDhT
