ច្រកទ្វារទ្វេភាគីណាំលៀ គ្រប់គ្រងដោយលោក សំរិត ណយ នៅតែលូចលាក់បង្ហូរឈើទៅវៀតណាម អាជ្ញាធរខេត្តមណ្ឌលគិរីបរាជ័យការទប់ស្កាត់ ការជួញដូរ និង ការលួចកាប់ឈើ នៅតំបន់ដែនជម្រកសត្វព្រៃភ្នំព្រេច និងតំបន់អភិរក្សជីវៈចម្រុះកែវសីម៉ា
ខេត្តមណ្ឌលគិរី៖ រថយន្តដឹកឈើប្រណីត៣គ្រឿងលោតឆ័ត្រ ត្រូវបានមន្ត្រីរដ្ឋបាលព្រៃឈើ សហការជាមួយនគរបាលប្រឆាំងបទល្មើសសេដ្ឋកិច្ច ខេត្តមណ្ឌលគិរីចាប់បង្ក្រាប ដែលរថយន្តទាំងនោះត្រូវបានគេដឹងថា បម្រុងឆ្លងដែនទៅប្រទេសវៀតណាម តាមច្រកទ្វារទ្វេរភាគីណាំលៀ ក្នុងទឹកដីនៃឃុំប៊ូស្រា ស្រុកពេជ្រាដា គ្រប់គ្រងដោយលោក សំរិត ណយ ដែលបានបើភ្លើងខៀវត្រៀមចាំបើកបារ៉ាស់រួចជាស្រេចទៅហើយនោះ។ ការចាប់បង្ក្រាបដោយចៃដន្យនេះបានធ្វើឡើងកាលពីព្រឹកថ្ងៃទី២១ ខែឧសភា ឆ្នាំ២០១៥ ត្រង់ចំណុចអូរទេរ ក្នុង ភូមិពូក្រូច ឃុំស្រែអំពូម ស្រុកពេជ្រាដា ខេត្តមណ្ឌលគិរី និងបានរឹបអូសរថយន្តដឹកឈើទាំង៣គ្រឿង យកមករក្សាទុកនៅខណ្ឌរដ្ឋ បាលព្រៃឈើមណ្ឌលគិរី ដើម្បីចាត់ការតាមច្បាប់ ។ ប៉ុន្តែករណីនេះប្រភពបង្ហើបថា រថយន្តដឹកឈើប្រណីតល្មើសច្បាប់មានជំនួន៤គ្រឿង ត្រូវរបូតរលូតទៅវិញ១គ្រឿងដោយរលូន។
បើយោងតាមសេក្ដីរាយការណ៍មួយបានឲ្យដឹងថា៖ ការចាប់បង្ក្រាបរថយន្តដឹកឈើខាងលើនេះ គឺបង្ក្រាបបាន៤គ្រឿង ប៉ុន្តែ មន្ត្រីដែលបានចុះទៅបង្ក្រាប បានដោះលែងមួយគ្រឿង ហើយរថយន្តដឹកឈើល្មើសដែលគេដោះលែងនោះ ជាប្រភេទរថយន្តម៉ាក់ឡង់ គ្រីស័រពណ៌ ស ត្រូវបានគេស្គាល់ថា ជារថយន្តរបស់កូនប្រុសមន្ត្រីនគរបាលដ៏មានឥទ្ធិពលមួយរូបនៅខេត្តមណ្ឌលគិរី ។ ដែលប្រការនេះបានធ្វើឲ្យមានការរិះគន់ថា ការអនុវត្តច្បាប់ជាធរមាននៅចំពោះករណីជួញដូរឈើល្មើសច្បាប់ នៅខេត្តមណ្ឌលគិរីនេះពុំទាន់ស្មើគ្នាចំពោះមុខច្បាប់នៅឡើយទេ គឺសែស្រឡាយ ឬអ្នកមានតួនាទី មានអំណាច ប្រព្រឹត្តល្មើសច្បាប់នៅមានឱកាសរួចខ្លួនពីការពិន័យ ឬផ្តន្ទាទោស។
លោក ហេង ចន្ត្រា នាយរងផ្នែករដ្ឋបាលព្រៃឈើស្រុកពេជ្រាដាបានថ្លែងឲ្យដឹងថា៖ រថយន្តដឹកឈើទាំងបីគ្រឿង ដែលបង្ក្រាបបាន ខាងលើនេះ មានម៉ាក់ហ្វររេនន័រ មួយគ្រឿង ម៉ាក់ឡិចស៊ីស RX300 ពណ៌ខ្មៅមួយគ្រឿង និងមួយគ្រឿងទៀតម៉ាក់ហ៊ីយ៉ាន់ដាយ ពណ៌ត្រីអ៊ី ពាក់ស្លាក់លេខ ខម022-3947 ជាកម្មសិទ្ធរបស់មន្ត្រីយោធាកងទ័ពជើងអាកាសម្នាក់ឈ្មោះ ស៊ីន ដែលជាម្ចាស់សិប្ប កម្ម គ្មានច្បាប់ មួយកន្លែងក្នុងឃុំស្រែអំពូម ស្រុកពេជ្រាដា ។ ហើយលោកបានឲ្យដឹងទៀតថា ចំពោះការចោទប្រកាន់ថាលោក បានដោះលែងរថយន្ត ល្មើសមួយគ្រឿងនោះ គឺមិនពិតទេ ដោយរថយន្តដែលលោកបានដោះលែងនោះ មិនមានផ្ទុកឈើឡើយ ជារថយន្តទទេ។
ប្រភពពីប្រជាពលរដ្ឋបានឲ្យដឹងថា បច្ចុប្បន្នជារៀងរាល់យប់ តូចធំទាំងខ្សែៗដឹកឈើបរណីត ទៅកាន់ប្រទេសវៀតណាមតាមច្រក ទ្វារទ្វេរភាគីណាំលៀដោយរលូន គ្រប់គ្រងដោយលោក សំរិត ណយ ដែលទើបតែឡើងកាន់តំណែងថ្មីៗនេះ ហើយគោលការប្រយុទ្ធប្រឆាំងបទល្មើសព្រៃឈើ របស់លោក អេង ប៊ុនហៀង អភិបាលខេត្តមណ្ឌលគិរី និងការប្តេជ្ញាចិត្តការពារព្រៃឈើ របស់លោក កែប កត់ នាយខណ្ឌរដ្ឋបាលព្រៃឈើខេត្តមណ្ដលគិរី លោក ឈិត សុផល ប្រធានមន្ទីរបរិស្ថានខេត្តមណ្ឌលគិរី ពុំមានលទ្ធផលអ្វីទាល់តែសោះ ស្របពេលមន្ត្រីជាឈ្មួញរកស៊ីឈើដឹកទៅវៀតណាមតាមច្រករបៀងនានា ក៏ មានផ្ទុះឡើងនៃការសម្រុកលួចកាប់ឈើ ក្រៅដែនដីក្រុមហ៊ុន និងដីសម្បទានដែលរដ្ឋាភិបាលបានដកហូត នៅតំបន់ដែនជម្រកសត្វព្រៃភ្នំព្រេច និងតំបន់អភិរក្សជីវៈចម្រុះកែវសីម៉ា ដែលប្រព្រឹត្តឡើងដោយ ឧកញ៉ាដែលគេស្គាល់ឈ្មោះ លឹម ប៊ុណ្ណា (ហៅខ្នា) ឧកញ៉ា ថៃ ឧកញ៉ា សឹង សំអុល ឧកញ៉ា ឌីឌុក…ធ្វើឡើងតាមអំពើចិត្ត ៕ ដោយ ឦសាន២
http://ift.tt/1FCFwmE
