ក្រុមចោរវ័យក្មេងៗប្លន់ម៉ូតូនៅភ្នំពេញបានពីរលើកបាន២គ្រឿងលក់ស៊ីចាយនៅភ្នំពេញ១គ្រឿង និងមកលំហែរនៅមាត់សមុទ្របម្រុងលក់១គ្រឿងទៀតតែត្រូវប៉េអិមព័ទ្ធចាប់ខ្លួនបាន៦នាក់(ស្រី២នាក់)
ខេត្តព្រះសីហនុ៖ ជនសង្ស័យជាក្រុមចោរប្លន់ម៉ូតូនៅរាជធានីភ្នំពេញ ដែលមានបក្ខពួកសរុបចំនួន៦នាក់ ក្នុងនោះមានប្រុស៤នាក់ និងនារីវ័យក្មេង២នាក់ ខណៈដែលពួកគេ លាក់ខ្លួននៅក្រុងព្រះសីហនុបន្ទាប់ពីធ្វើសកម្មភាពប្លន់ម៉ូតូ២ដងនៅក្នុងក្រុងភ្នំពេញ ត្រូវកម្លាំងកងរាអាវុធហត្ថក្រុងព្រះសីហនុចាប់ឃាត់ ខ្លួនបាននៅរសៀលថ្ងៃទី២៣ ខែកុម្ភៈនេះ ដោយដកហូតបានម៉ូតូ៣គ្រឿង និងសម្ភារៈវត្ថុតាងមួយចំនួនទៀត។ ការឃាត់ខ្លួនជនសង្ស័យខាងលើនេះធ្វើឡើងនៅវេលាម៉ោង១៥ និង២០នាទី រសៀលថ្ងៃទី២៣ ខែកុម្ភៈ ឆ្នាំ២០១៦ នៅចំណុចក្នុងបរិវេណដីអនុក្រិត្យលេខ៧៦(ព្រៃអាកាស្យា) ស្ថិតក្នុងភូមិ១ សង្កាត់លេខ១ ក្រុងព្រះសីហនុ។
យោងតាមប្រភពពីមន្ត្រីកងរាជអាវុធម្នាក់បានអះអាងថា ចំពោះមូលហេតុដែលឈានដល់ការឃាត់ខ្លួននេះ គឺដោយសារនៅប៉ុន្មានថ្ងៃមុនឃាត់ខ្លួន ជនសង្ស័យនេះបានចូលមកស្នាក់ក្នុងភូមិសាស្ត្រខាងលើដោយមានលាក់លៀម និងមានភាពមិនប្រក្រតីកម្លាំងរបស់លោក ក៏បានរាយការណ៍ទៅកាន់លោកមេបញ្ជាការ អំពីសកម្មភាពនេះទើបលោកឧត្តមសេនីយ៍ បានបញ្ជាអោយលោកវរសេនីយ៍ត្រី ហ៊ត សីហា មេបញ្ជាការមូលដ្ឋានកងរាជអាវុធហត្ថក្រុងព្រះសីហនុ ដឹកនាំកម្លាំងចុះទៅកាន់កន្លែងមានការសង្ស័យ ខណៈពេលកម្លាំងកងរាជអាវុធហត្ថចុះទៅដល់ភ្លាមក្រុមជនសង្ស័យទាំង៦នាក់បានរត់គេចខ្លួន ទើបកម្លាំងធ្វើការឡោមព័ទ្ធតែម្តង នឹងបានឃាត់ខ្លួនមនុស្សចំនួន៦នាក់ រួមជាមួយម៉ូតូ៣គ្រឿង ក្នុងនោះម៉ូតូនៃអំពើប្លន់មាន១គ្រឿង និង២គ្រឿងជាមធ្យោបាយធ្វើសកម្មភាព ទូរស័ព្ទចំនួន៦គ្រឿង។
ប្រភពបានឲ្យដឹងថា បន្ទាប់ពីធ្វើការឃាត់ខ្លួន ជនសង្ស័យឈ្មោះ សួ ទីទី ភេទប្រុស អាយុ១៩ឆ្នាំ មានទីលំនៅសង្កាត់ស្ទឹងមានជ័យ បានសារភាពថា ពួកខ្លួនចំនួន៣នាក់ក្នុងចំណោម៦នាក់ដែលបានឃាត់ខ្លួននេះ ធ្លាប់បានធ្វើសកម្មភាពប្លន់នៅភ្នំពេញចំនួន២លើក គឺនៅមុខពេទ្យរ៉ុស្សី១លើក និងបឹងត្របែកចំនួន១លើក បានម៉ូតូចំនួន២គ្រឿងក្នុងនោះ១គ្រឿងលក់នៅភ្នំពេញ និង១គ្រឿងទៀតបំណងយកមកលក់នៅកំពង់សោម។ ដោយក្នុងសកម្មភាពទាំង២លើកនោះពួកខ្លួនមានគ្នា៦នាក់ (នៅចំពោះមុខ៣នាក់ និងនៅភ្នំពេញ៣នាក់ ស្រីម្នាក់)។
យោងតាមប្រភពពីលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ បានថ្លែងប្រាប់ ថាជនសង្ស័យទាំង៦នាក់ ដែលកម្លាំងរបស់លោក ធ្វើការស្រាវជ្រាវស៊ើបអង្កេតកន្លងមក គឺជាក្រុមប្លន់នៅរាជធានីភ្នំពេញ ហើយបានមកពួនសង្ងំលាក់ខ្លួនក្នុងបរិវេណដីអនុក្រិត្យលេខ៧៦ (ព្រៃអាកាស្យា)។ ក្នុងការឡោមព័ទ្ធចាប់ខ្លួននោះដែរកម្លាំងរបស់លោកបានរកឃើញវត្ថុតាងមួយចំនួន និងម៉ូតូចំនួន៣គ្រឿង។
លោកឧត្តមសេនីយ៍ត្រី ហេង ប៊ុនទី បានបញ្ជាក់ថា ជនសង្ស័យទាំង៦នាក់ដែលកម្លាំង របស់លោកឃាត់ខ្លួននោះមាន៖ ទី១ឈ្មោះ សេង មិថុនា ភេទប្រុស អាយុ១៦ឆ្នាំ មានទី លំនៅ ខណ្ឌសែនសុខ រាជធានីភ្នំពេញ មានមុខរបរជាបុគ្គលិកផ្សារហេងលី, ទី២ឈ្មោះ ហេង ជីវង្ស ភេទប្រុស អាយុ១៦ឆ្នាំ មុខរបរមិនពិតប្រាកដ មានទីលំនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ, ទី៣ឈ្មោះ ហង្ស ដារ៉ាតា ភេទប្រុស អាយុ១៧ឆ្នាំ មានមុខរបរលក់មាន់ មានទីលំនៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ, ទី៤ឈ្មោះ សួទីទី ភេទប្រុស អាយុ១៩ឆ្នាំ មានទីលំនៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ , ទី៥ឈ្មោះ ឡុង កញ្ញា ភេទស្រី អាយុ១៧ មុខរបរសិស្ស មានទីលំនៅសង្កាត់គ្រាំងធ្នង់ ខណ្ឌពោធិសែនជ័យ រាជធានីភ្នំពេញ និង ទី៦ឈ្មោះ សាន្ត ដានីតា ភេទស្រី អាយុ១៦ឆ្នាំមុខរបរសិស្ស ខណ្ឌច្បារអំពៅ រាជធានីភ្នំពេញ។
បច្ចុប្បន្នជនសង្ស័យទាំង៦នាក់ ពាក់ព័ន្ធករណីប្លន់នៅភ្នំពេញ កំពុងត្រូវបានកម្លាំងកងរាជអាវុធក្រុងព្រះសីហនុ ធ្វើការសាកសួរ និងកសាងសំណុំរឿងមកកាន់ទីបញ្ជាការដ្ឋានកងរាជអាវុធហត្ថខេត្ត ដើម្បីបន្តនិតិវិធីតាមផ្លូវច្បាប់។ ដោយឡែកជនសង្ស័យនៅភ្នំពេញ៣នាក់ (ស្រីម្នាក់)សមត្ថកិច្ចកំពុងអនុវត្តជំនាញស្វែងរកចាប់ខ្លួន៕ សមុទ្រខៀវ
http://ift.tt/20T7pxG
