រថយន្តកាមរីឆ្លាមរបស់មន្ត្រីកងរាជអាវុធហត្ថម្នាក់បើកបុករះកង់ និងម៉ូតូពីក្រោយពេញទំហឹងមនុស្សប្រុសស្រី២នាក់ បានស្លាប់និងរបួសម្នាក់ធ្ងន់ធ្ងរ
ខេត្តកំពង់ឆ្នាំង៖ គ្រោះថ្នាក់ចរាចរណ៍ដ៏រន្ធត់បណ្តាលអោយនារីជិះកង់ម្នាក់បានបាក់កស្លាប់ភ្លាមៗនៅនឹងកន្លែងកើតហេតុ និងបុរសអ្នកបើកម៉ូតូម្នាក់ទៀតបានស្លាប់ពេលដឹកទៅមន្ទីរពេទ្យខេត្តនិងស្ត្រីជាប្រពន្ធជិះពីក្រោយម៉ូតូបានរងរបួសធ្ងន់ដោយសាររថយន្តកាមរីឆ្លាមមួយគ្រឿងបើកបរដោយមន្ត្រីកងរាជអាវុធហត្ថម្នាក់ បើកបុករះកង់ និងម៉ូតូពីក្រោយពេញទំហឹងក្នុងទិសដៅស្របគ្នា។ ហេតុការណ៍នេះបានកើតឡើង នៅម៉ោង២ និង៣០នាទីរសៀលថ្ងៃទី២០ ខែកុម្ភៈ ឆ្នាំ២០១៦ នៅលើផ្លូវជាតិលេខ៥ ចន្លោះគីឡូម៉ែត្រលេខ៨៥ និង៨៦ នៅមុខស្ថានីយ៍ប្រេងតេលា ក្នុងភូមិព្រៃពួច ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។
លោក សឿង រុន នាយនគរបាលចរាចរណ៍ស្រុករលាប្អៀរបានអោយដឹងថា៖ មុនពេលកើតហេតុគេបានឃើញរថយន្តបង្កម៉ាកកាមរីឆ្លាម ពណ៌ស្លាបក្អែក ពាក់ស្លាកលេខកំពង់ស្ពឺ2A-០០០8 បានបើកបរយ៉ាងលឿនក្នុងទិសដៅពីត្បូងទៅជើងលុះមកដល់ចំណុចកើតហេតុរថយន្តបង្កបានបុករះ កង់មួយគ្រឿងនិងម៉ូតូមួយគ្រឿងដែលកំពុងធ្វើដំណើរស្របទិសគ្នាពីខាងក្រោយយ៉ាងពេញទំហឹងបណ្តាលអោយនារីរងគ្រោះកំពុងជិះកង់ឈ្មោះ ហេង សាក់រាជ្យសី អាយុ១៤ឆ្នាំ រស់នៅភូមិព្រៃពួច ឃុំជ្រៃបាក់ ស្រុករលាប្អៀរបាក់កស្លាប់ភ្លាមៗនៅកន្លែងកើតហេតុ។ ចំណែកបុរសអ្នកបើកម៉ូតូសង់កូរ៉េ ឈ្មោះ ឆេង ហ៊ួរ អាយុ៦៣ឆ្នាំ រស់នៅភូមិជ្រោយខ្សាច់ ឃុំបាក់ដាវ ស្រុកខ្សាច់ កណ្តាលខេត្តណ្តាល បានស្លាប់ពេលដឹកដល់មន្ទីរពេទ្យខេត្ត និងស្ត្រីជាប្រពន្ធ ឈ្មោះ អ៊ុយ សុន អាយុ៦៥ឆ្នាំជិះពីក្រោយរងរបួសធ្ងន់ ពួកគាត់មានមុខរបរជាអ្នកយកភាស៊ីនៅផ្សារព្រៃខ្មែរ ។
ក្រោយពេលកើតហេតុអ្នកបើកបររថយន្តបង្កបានចុះរត់គេចខ្លួនបាត់ទុករថយន្តចោលនៅកន្លែងកើតហេតុ ដោយនៅលើរថយន្តសមត្ថកិច្ចពិនិត្យឃើញ មានអាវចំណាំងផ្លាតមួយ និងអាវកងរាជអាវុធហត្ថមួយដែលមានប៉ាក់ឈ្មោះ ហ៊ុយ សំផន អត្តលេខ២២៥៧៥៥ ដោយសមត្ថកិច្ចបានសន្និដ្ឋានថាអ្នកបើកបររថយន្តបង្កជាមន្ត្រីអាវុធហត្ថ តែងតែបើកបរល្បាតនៅលើផ្លូវជាតិលេខ៥ជាប្រចាំ ប៉ុន្តែគេមិនទាន់ដឹងថាគេធ្វើការនៅក្នុងអង្គភាពកងរាជអាវុធហត្ថខេត្តណានៅឡើយ។ ចំណែកករណីគ្រោះថ្នាក់ចរាចរណ៍នេះអាចបង្កឡើងដោយការបើកបរក្នុងភាពងោគងុយ ឬស្រវឹងពីព្រោះរថយន្តនេះបានបុករះកង់ និងម៉ូតូរបស់ជនរងគ្រោះនៅលើចិញ្ចើមផ្លូវកៀនខាងស្តាំដៃទាំងកំរោលតែម្តង។
សពជនរងគ្រោះទាំង២នាក់ត្រូវបានក្រុមគ្រួសារយកទៅធ្វើបុណ្យតាមប្រពៃណី នៅលំនៅដ្ឋាន ចំណែកស្ត្រីរងរបួសធ្ងន់ធ្ងរបានសំរាកព្យាបាលនៅមន្ទីរពេទ្យខេត្ត។ ដោយឡែកមធ្យោបាយទាំង៣គ្រឿងមាន កង់ ម៉ូតូ និងរថយន្តបង្ក បានខូតខាតធ្ងន់ធ្ងរដូចគ្នា ត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្ត កសាងសំណុំរឿងតាមនិតិវិធី។ ទោះយ៉ាងណា៕ ពលរដ្ឋក្នុងខេត្តកំពង់ឆ្នាំងមិនចង់ឃើញមិនចង់ឮ ថាសំណុំរឿងគ្រោះថ្នាក់ចរាចរណ៍មួយនេះអូសបន្លាយជាប់គាំងមិនអនុវត្តតាមច្បាប់ចំពោះជនល្មើនរូបនោះទេ៕ រិទ្ធិ ជ័យ
http://ift.tt/1QvKcSM
