ដំណាំឫស្សីកំពុងមានទីផ្សារខ្លាំងនៅក្នុងប្រទេសកម្ពុជា គ្រាដែលផលិតផលពីឫស្សី កំពុងមានការពេញនិយមពីប្រជាពលរដ្ឋ និងភ្ញៀវទេសចរណ៍
ខេត្តព្រះសីហនុ៖ ស្ថិតក្នុងភាពជឿជាក់ លោក ឈុន សារុំ ជាម្ចាស់ចំការឫស្សីដ៏ធំប្រចាំខេត្តព្រះសីហនុ មុនតំបូងគេបង្អស់បានថ្លែងដោយមោទនៈថា គិតមកដល់ពេលនេះការដាំឫស្សីរបស់លោក ទើបតែមានរយៈពេល១៩ខែតែប៉ុណ្ណោះ ប៉ុន្តែអ្វីដែលធ្វើអោយរូបគាត់ មានភាពជឿជាក់នោះ គឺឫស្សីរបស់គាត់បានហុចផលអោយរហូត៥០ %ហើយ។
ថ្លែងប្រាប់បណ្តាញព័ត៌មានក្នុងស្រុកនាព្រឹកថ្ងៃទី២៦ ខែកុម្ភៈនេះ លោក ឈុន សារុំ បានបញ្ជាក់អោយដឹងថា ដោយមើលឃើញអំពីតម្រូវការមួយចំនួន ក៏ដូចជាទីផ្សារគ្រឿងសង្ហារិមធ្វើពីដើមឫស្សីមានការកើនឡើង ពីមួយថ្ងៃទៅមួយថ្ងៃ និងទីផ្សារទំពាំងមានការពេញនិយមយកទៅបរិភោគ លោកបានសម្រេចចិត្តចាប់យកអាជីបធ្វើចំការឫស្សីលើផ្ទៃដីសរុប៣០ហិកតា ចំនួន១៥០០០គុម្ព ដែលជាមុខរបរខុសប្លែកពីកសិករដ៏ទៃដាំដំណាំផ្សេងៗ ដូចជា ដូងក្រអូប ស្វាយ ក្រូច …..។ល។
រហូតមកដល់ពេលនេះ អ្វីដែលធ្វើអោយរូបលោកមានភាពជឿជាក់ និងមោទនៈបំផុតនោះគឺ ការដាំដុះរបស់លោកត្រឹមតែ១៩ខែតែប៉ុណ្ណោះ(១ឆ្នាំកន្លះ) ដំណាំឬស្សីរបស់លោក បានហុចផលរហូតដល់៥០ % ដែលតាមរយៈការទទួលផលនេះសបញ្ជាក់ថា ដំណាំឫស្សី ជាដំណាំមួយប្រភេទងាយទទួលផល និងងាយស្រួលដាំដុះបំផុត។
លោកបន្តថា គិតត្រឹមខែមករារហូតដល់ប៉ុន្មានខែទៀត លោក ពុំបានធ្វើការផ្គត់ផ្គង់ទំពាំងនៅតាមទីផ្សារ (ផ្សារទំនើប) ទៀតទេ គ្រាតម្លៃទំពាំងរបស់លោកបានកើនតម្លៃរហូត៣ដុល្លាក្នុងមួយគីឡូក្រាមនោះ គឺលោកទុកវាយកផលជាដើមឫស្សី នឹងបំបែកជាកូនឫស្សីសម្រាប់លក់វិញ ក្នុងតម្លៃកូនឫស្សីមួយដើម១ម៉ឺនរៀល។
ស្តែងចេញពីការស្រឡាញ់ដើមឫស្សីនេះ នាពេលបច្ចុប្បន្នលោកបានសម្រេចចិត្តបើកភោជនីយដ្ឋានមានឈ្មោះថា ភូមិដើមឫស្សី ដែលនៅក្នុងភោជនីយដ្ឋាន តុបតែងដោយដើមឫស្សី។ រីឯម្ហូបអាហារពិសេសប្រចាំហាង គឺខទំពាំង សម្លរប្រហើរកូន ត្រីស្រែ ទំពាំងស្រស់ និងទំពាំងឆាសាច់គោជាដើម ….៕ សមុទ្រខៀវ
http://ift.tt/1n4ybG6
