ឡានយីឌុបផ្ទុកដំឡូងមីពេញលើសចំណុះឡើងចំណោតមិនរួច រអិលថយក្រោយក្រឡាប់៣ត្រឡប់
ខេត្តរតនគិរី៖ បង្កាន់ដៃផ្លូវជាតិលេខ៧៨ចំនួនប្រាំផ្ទាំងត្រូវរងនូវការខ្ទេចរួញបង្កឡើងដោយរថយន្តធនធ្ងន់ផ្ទុកដំឡុងមី ឡើងចំណោទមិនរួចរអិលបុកកំទេច ហើយរថយន្តក្រឡាប់៣ត្រឡប់ កាលពីវេលាម៉ោងប្រមាណ១២យប់ថ្ងៃទី៣១ ខែមករា ឆ្នាំ២០១៦ តែសំណាងល្អតៃកុងរថយន្ត និងអ្នករួមដំណើរមិនបានប៉ះពាល់ដល់អាយុជីវិត។ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើងនៅតាមបណ្តោយ ផ្លូវជាតិលេខ៧៨ ត្រង់ចំណុចលូកាត់ទទឹងផ្លូវ(ហៅថាអូរទ្រាវ) ស្ថានភាពផ្លូវឡើង និងចុះចំណោត ស្ថិតក្នុងភូមិភ្នំ សង្កាត់យក្ខឡោម ក្រុងបានលុង ខេត្តរតនគិរី។
តាមប្រភពពីនៅកន្លែងកើតហេតុបានអោយដឹងថា កាលពីវេលាម៉ោងខាងលើ គេឃើញរថយន្តប្រភេទយីឌុប ពណ៌ខៀវ ពាក់ស្លាកលេខ3B-6516 ភព ផ្ទុកដំឡូងមីបើកបរក្នុងទិសដៅពីកើតមកលិចក្នុងល្បឿនលឿន ខណៈផ្លូវចុះចំណោតភ្នំ សង្ស័យតៃកុងរថយន្តខ្វះជំនាញបើកបរ មិនសាងលេខបម្រុងបន្ថែមល្បឿនអូរតូឡើងចំណោតអោយផុត ជាចៃដន្យរថយន្តផ្ទុកធ្ងន់ឡើងចំណោតអត់រួចជាប់គាំងសាងលេខមិនចូលបង្កអោយរថយន្តថយក្រោយយ៉ាងលឿនត្រឡប់ក្រោយវិញបុករះបង្កាន់ដៃផ្លូវខ្ទេចអស់ចំនួនប្រាំផ្ទាំងក៏ក្រឡាប់ទៅក្នុងជ្រោះនោះតែម្តង។
ប្រភពបានបន្តទៀតថាអ្នករួមដំណើរក្នុងរថយន្តមានចំនួន៣នាក់ ប្រុស២ ស្រី១ មិនស្គាល់អត្តសញ្ញណឡើយ ជិះម៉ូតូគេចចេញពីកន្លែងកើតហេតុបាត់ស្រមោល។ ចំណែករថយន្តខូចខ្ទេចស្ទើតែទាំងស្រុង។លុះព្រឹកឡើងត្រូវនឹងថ្ងៃទី០១ ខែកុម្ភៈ ឆ្នាំ២០១៦សមត្ថកិច្ចនគរបាលចរាចរណ៍ជើងគោក នៃស្នងការដ្ឋាននគរបាលខេត្តស្ទួចយករថយន្តបង្កទៅរក្សាទុកដើម្បីចាត់ការណ៍បន្តតាមនិតិវិធីច្បាប់។ សូមបញ្ជាក់ផងដែរថា ករណីគ្រោះថ្នាក់ចរាចរណ៍នេះមិនមែនទើបកើតឡើងលើកទី១នោះទេ នៅចំណុច និងទីតាំងដដែលខាងលើនេះគឺជាលើកទី៤មកហើយ៕ លី វណ្ណៈ
http://ift.tt/20j2Wt5
