ស្ត្រីជនជាតិវៀតណាមទិញឥវ៉ាន់ បន្លំលួចខ្សែត្រូវប៉ូលិសឃាត់ខ្លួន
ខេត្តព្រះសីហនុ៖ ស្ត្រីជាជនជាតិវៀតណាមម្នាក់ជាប់ចោទលួចផ្តាច់យកខ្សែក ពីទារកម្នាក់ ត្រូវមន្ត្រីប៉ុស្តិ៍រដ្ឋបាលសង្កាត់លេខ៤ នាំខ្លួនទៅកាន់អធិការដ្ឋាននគរបាលក្រុងព្រះសីហនុ កាលពីវេលាម៉ោង ២១ និង០០នាទីយប់ថ្ងៃទី៧ ខែកុម្ភៈ ឆ្នាំ២០១៦ បន្ទាប់ទទួលបានពាក្យបណ្តឹងពីក្រុមគ្រួសារទារករងគ្រោះ ពាក់ព័ន្ធករណីអំពើលួចខ្សែរករភ្លាមៗនោះ។
លោក លុយ ហាំង នាយប៉ុស្តិ៍រដ្ឋបាលសង្កាត់លេខ៤ បានឲ្យដឹងថា ក្រោយ ពីទទួលពាក្យបណ្តឹងផ្ទាល់មាត់ករណីលួចខ្សែកពីលោក ស៊ុន វិបុល អាយុ២៧ ត្រូវជាឪពុក និង លោកស្រី ឈ្មោះ អ៊ូ សុខា អាយុ២១ ជាម្តាយរបស់កុមារឈ្មោះ អឿន វរៈបុទ្រ ភេទប្រុស អាយុ០១ខួប មានទីលំនៅផ្ទះជួលក្រុម៤៨ ភូមិ៥ សង្កាត់លេខ៤ រូបលោក បានចុះទៅដល់តាំងកើតហេតុភ្លាម និងបានឃាត់ខ្លួនស្ត្រីជាប់ចោទឈ្មោះ មុំ ថាវី អាយុ៥១ឆ្នាំ មានទីលំនៅក្បែរកន្លែងកើតហេតុ បញ្ជូនទៅកាន់អធិការដ្ឋាននគរបាលក្រុងព្រះសីហនុ ដើម្បីសាកសួរបន្ត ។
ជុំវិញករណីនេះ ស៊ុន វិបុល អាយុ២៧ ត្រូវជាឪពុកកុមាររងគ្រោះបានរៀបរាប់ថា នៅមុនកើតហេតុ ស្ត្រីសង្ស័យបានមកទិញស្រាបៀរមួយកំប៉ុងនៅតូបមុខផ្ទះ បន្ទាប់មកបានអោយលុយ២០ដុល្លាមកអោយគាត់អាប់ ប៉ុន្តែខណៈពេលគាត់កំពុងហៀបអាប់លុយ ស្រាបតែស្ត្រីសង្ស័យ បានដើរទៅក្រោយតូប ហើយបានបន្លំឆក់ខ្សែរករ កូនប្រុសរបស់គាត់ដែលកំពុងដេកអង្រឹង តែត្រូវបានអ្នកជិតខាងឃើញទាន់ បានស្រែកឆោឡោ ទើបធ្វើស្ត្រីសង្ស័យភ័យស្លន់ស្លោ រត់គេចខ្លួន ទៅកាន់ផ្ទះជួលក្បែរនោះ។ ឃើញដូចនេះ រូបលោក ក៏បានទូរស័ព្ទទៅលោក មេប៉ុស្តិ៍មកជួយអន្តរាគមន៏ ហើយបានឃាត់ខ្លួនតែម្តង៕ សមុទ្រខៀវ
http://ift.tt/23WrW8X
