សមត្ថកិច្ចសង្កាត់លេខ៤ម្នាក់ជួបគ្រោះថ្នាក់ចរាចរណ៍រងរបួសធ្ងន់ ខណៈពេលចុះទៅបង្ក្រាបក្រុមក្មេងទំនើង

ខេត្តព្រះសីហនុៈ MC.សមត្ថកិច្ចប៉ូលីសសង្កាត់លេខ៤ម្នាក់រួមជាមួយយុវជនម្នាក់ទៀតបានរងរបួសធ្ងន់ក្នុងហេតុការណ៏គ្រោះថ្នាក់ចរាចរណ៏ ខណៈពេលបំពេញភារៈកិច្ច កាលពីវេលាម៉ោង ២១និង៤៥នាទីយប់ថ្ងៃទី១១មិថុនាឆ្នាំ២០១៧ នៅចំនុចកំណាត់ផ្លូវអូពីរស្ថិតក្នុងក្រុម៤០ភូមិ០៥ សង្កាត់ លេខ៤ក្រុងព្រះសីហនុ។

យោងតាមប្រភពមន្ត្រីនគរបាលចរាចរណ៏បានបង្ហើបអោយដឹងថា នៅវេលាម៉ោងកើតហេតុខាងលើមានករណីគ្រោះថ្នាក់ចរាចរណ៏មួយកើតឡើង បណ្តាលអោយសមត្ថកិច្ចសង្កាត់លេខ០៤ម្នាក់បានរងរបួសធ្ងន់ (សង្ឃឹមរស់តិចតួច) ខណៈពេលធ្វើដំណើរចុះបំពេញភារកិច្ចបង្ក្រាបក្រុមក្មេងទំនើងដែលបានបង្កការអុកឡុកក្នុងភូមិសាស្ត្រសង្កាត់លេខ៤ ប៉ុន្តែជាអកុសលក៏បានជួបគ្រោះថ្នាក់ចរាចរណ៏តែម្តង។

ប្រភពសមត្ថកិច្ចដដែលបានបន្តថាហេតុការណ៏នេះ បង្កឡើងរវាង ម៉ូតូម៉ាហុងដាពណ៏ខ្មៅរបស់សមត្ថកិច្ចឈ្មោះ ឆាយ សុគន្ឋ ភេទ ប្រុស អាយុ៣១ឆ្នាំមានទីលំនៅសង្កាត់លេខ៤ ក្រុងព្រះសីហនុបានជិះចេញពីក្នុងភូមិក្នុងទិសពីលិចទៅកើតហើយបានបត់ឆ្វេងឆ្ពោះទៅកាន់ទីតាំងកើតហេតុ ក្រុមក្មេងទំនើងកាប់គ្នា ប៉ុន្តែមិនទាន់បានឆ្លងផ្លូវផងក៏ត្រូវបានម៉ូតូយុវជនម្នាក់ជិះម្នាក់ឯងឈ្មោះ លឹម អាយុ២៤ឆ្នាំជិះម៉ូតូម៉ាកហុងដាសេ១២៥ពណ៏ពាក់ ស្លាកលេខព្រះសីហនុ 1D7077 ក្នុងទិសដៅពីជើងទៅត្បូងបានបុកពេញទំហឹងបណ្តាលអោយដួលបោកក្បាលជាមួយថ្នាល់រងរបួសធ្ងន់ទាំងសងខាង។

ភ្លាមៗនោះជនរងគ្រោះទាំងពីរដោយសារស្ថានភាពរបួសធ្ងន់ពេក ត្រូវបានរថយន្តសង្គ្រោះឯកជន ជួយដឹកបញ្ជូនទៅសង្គ្រោះនៅមន្ទីពេទ្យបង្អែកខេត្ត ប៉ុន្តែគេនៅពុំទាន់ដឹងជោគវាសនាជនរងគ្រោះទាំងពីរសង្ឃឹម ឬមិនសង្ឃឹមនោះទេ។

ក្រោយកើតហេតុបន្ទាប់ពីវាស់វែងពិនិត្យកន្លែងកើតហេតុរួច ម៉ូតូទាំងពីរគ្រឿងត្រូវបានសមត្ថកិច្ចចរាចរណ៏ យកទៅរក្សាទុកនៅការិយាល័យចរាចរណ៏ផ្លូវគោកខេត្ត រង់ចាំការដោះស្រាយនៅពេលបន្ទាប់៕