ជិះម៉ូតូដឹកឈើបើកលឿនដួលស្លាប់ខ្លួនឯងគួរឲ្យអាសូរ!
ខេត្តក្រចេះ៖ យុវជនម្នាក់រកស៊ីដឹកឈើតាមម៉ូតូ ត្រូវបានគេប្រទះឃើញសាកសពនៅក្បែរគំនរឈី កាលពីវេលាម៉ោង១០ និង១៥នាទី ថ្ងៃទី៨ ខែមិថុនា ឆ្នាំ២០១៧ ដែលធ្លាក់ពីលើផ្លូវតាមបណ្ដោយផ្លូវជាតិលេខ៧ស្ដិតនៅភូមិសំបួរ ឃុំស្វាយជ្រះ ស្រុកស្នួល ខេត្តក្រចេះ។
នគរបាលស្រុកស្នួលបានឲ្យដឹងថា ករណីនេះបង្កឡើងដោយជនរងគ្រោះជិះម៉ូតូដួលខ្លួនឯងបណ្ដាលឲ្យស្លាប់តែម្ដង តែមិនដឹងតាំងម៉ោងប៉ុន្មាននោះទេ លុះដល់វេលាម៉ោង១០និង១៥នាទី ទើបពលរដ្ឋប្រទះឃើញ។ គេដឹងថាជនរងគ្រោះមានឈ្មោះ ស្លិន ជុះ ភេទប្រុសអាយុ១៨ឆ្នាំ ជនជាតិខ្មែរឥស្លាម រស់នៅភូមិសំបួរ ឃុំស្វាយជ្រះ ស្រុកស្នួល ខេត្តក្រចេះ។
នគរបានបន្ដទៀតថាម៉ូតូជនរងគ្រោះម៉ាកវេវឆ្លាម ពណ៌ខ្មៅ គ្មានស្លាកលេខ ត្រូវបានកម្លាំងនគរបាលយកទៅរក្សាទុកនៅអធិការដ្ឋាននគរបាលស្រុកស្នួល ។ ចំណែកសាកសពសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។
សូមបញ្ជាក់ថា ករណីគ្រោះចរាចរណ៍ដោយសារដឹកឈើតាមម៉ូតូដួលដោយខ្លួនឯងបណ្ដាលស្លាប់នេះ មិនមែនជាលើកទី១ទេ គឺបានកើតមានឡើងជាច្រើនលើករួចមកហើយ នៅក្នុងទឹកដីខេត្តក្រចេះ ៕
http://ift.tt/2rTdmBE
