ឃ្លាំងគ្រឿងសំណង់របស់ ងី ឆែ នៅតែបង្កការភ័យខ្លាចដល់ប្រជាពលរដ្ឋរស់នៅជុំវិញ ខណៈពេលអាជ្ញាធរពាក់ព័ន្ឋមិនខ្វល់ខ្វាយ
ខេត្តព្រះសីហនុៈ MC.ឃ្លាំងសម្ភារៈសំណង់របស់ យីហោ ងី ឆែ កំពុងបង្កការភ័យខ្លាចដល់ប្រជា ពលរដ្ឋនៅជុំវិញ ខណៈពេលរថយន្តដឹកទំនិញរបស់ឃ្លាំងមួយនេះ បានរអិលបុកផ្ទះប្រជាពលរដ្ឋជាច្រើនលើក ច្រើនសារ។ ជាក់ស្តែង នាព្រឹកថ្ងៃទី២៩ ខែមិថុនា ឆ្នាំ២០១៧នេះ រថយន្តដឹកស៊ីម៉ងត៍របស់ឃ្លាំងមួយនេះ បានរអិលបុកផ្ទះអ្នកលក់អង្គរជាលើកទី០២ ប៉ុន្តែសំណាងល្អពុំមានគ្រោះថ្នាក់ដល់អាយុជិវិតមនុស្សណាម្នាក់នោះទេ។
យោងតាមប្រភពពីស្ត្រីម្ចាស់ផ្ទះរងគ្រោះឈ្មោះ សុខសារ៉ន ភេទ ស្រី អាយុ៥០ឆ្នាំ មានទីលំនៅកន្លែងកើតហេតុ ស្ថិតក្នុងភូមិ០១ សង្កាត់លេខ២ ក្រុងព្រះសីហនុ បានអោយដឹងថា បច្ចុប្ប្នន្ននេះ រូបគាត់កំពុងមានការភ័យខ្លាចយ៉ាងខ្លាំង ខណៈពេលផ្ទះរបស់គាត់ត្រូវបានរថយន្តដឹកគ្រឿងសំណង់របស់ឃ្លាំងងី ឆែ បានរអិលបុកទ្វា និងរបងចូលក្នុងផ្ទះជាច្រើនលើក តែសំណាងល្អ ពុំបណ្តាលអោយរូបគាត់ ឬក៏សមាជិកគ្រួសារណាម្នាក់គ្រោះថ្នាក់នោះទេ។ ជាក់ស្តែង នាព្រឹកថ្ងៃទី២៩ ខែមិថុនា ឆ្នាំ២០១៧នេះ រថយន្តដឹកស៊ីម៉ងត៍របស់ឃ្លាំងមួយនេះម៉ាកហ៊ីណូ ពណ៏ប្រផេះពាក់ស្លាកលេខ ព្រះសីហនុ 4A 1927 បើកបរដោយឈ្មោះ ឆាយ សាវិន ភេទប្រុស អាយុ ១៨ឆ្នាំមានទីលំនៅ ភូមិអង្គសុភីឃុំ អង្គសុភី ស្រុកកំពង់ត្រាច ខេត្ត្រកំពតបាន រអិលបុកចូលផ្ទះរបស់គាត់បណ្តាលអោយសម្ភារៈនិងអង្គរនៅក្នុងផ្ទះរបស់គាត់ខូចខាតជាអន្លើៗ។
ប្រភពដដែលបានបន្តថា នៅប៉ុន្មានសប្តាហ៏មុនរថយន្តរបស់ឃ្លាំងគ្រឿងសំណង់មួយនេះ ក៏ធ្លាប់បានរអិលចូលផ្ទះរបស់គាត់ម្តងដែរ ហើយរឿងនេះមិនទាន់ដោះស្រាយចប់នៅឡើយទេស្រាប់តែនៅព្រឹកថ្ងៃកើតហេតុខាលើនេះ បានរអិលម្តងទៀត អាស្រ័យហេតុនេះ ក្នុងនាមរូបគាត់ជាជនរងគ្រោះ សូមអំពាវនាវ និងស្នើសុំយ៉ាងទទួចដល់ស្ថាប័នពាក់ព័ន្ឋ សូមមេត្តាជួយដោះស្រាយនិងពិនិត្យលើឃ្លាំងលក់គ្រឿងសំណង់នេះផង ព្រោះកន្លងមកឃ្លាំងលក់គ្រឿងសំណង់មួយនេះតែងតែបង្កការធុញទ្រាន់ដល់ប្រជាពលរដ្ឋធ្វើដំណើរ ដោយសារតែរថយន្តធំៗរបស់ឃ្លាំងមួយនេះឈប់កណ្តាលផ្លូវ យកផ្លូវធ្វើជាចំណត បង្កការកកស្ទះចរាចរណ៏ជាញឹកញ៉ាប់ផងដែរ។
ជុំវិញបញ្ហានេះ លោកវរៈសេនីយ៍ឯក អ៊ីសុខា ស្នងការរងទទួលផែនសណ្តាប់ធ្នាប់ បានបញ្ជាក់ថា ពាក់ព័ន្ឋទៅនឹងការរិះគន់ទៅលើឃ្លាំងមួយ លោកនឹងកោះហៅម្ចាស់ទីតាំងឃ្លាំងមួយនេះមកអប់រំ ធ្វើការណែនាំ អំពីការលើកដាក់ទំនិញចូលក្នុងឃ្លាំង រីឯចំពោះរថយន្តដែលបង្កការប៉ះពាល់ លោកនឹងដោះស្រាយទៅតាមផ្លូវច្បាប់នៅពេលក្រោយទៀត៕
http://ift.tt/2tnuJ0t
