រថយន្តដឹកដែកធ្ងន់បានបើកលឿនឡើងចិញ្ចើមផ្លូវបុករះរបងសាលាបំពេញវិជ្ជានិងរបងកាកបាទក្រហមខេត្តខូចខាតអស់ជាង៣៧ម
ខេត្តកំពង់ឆ្នាំង៖ របងសាខាកាកបាទក្រហមខេត្ត និងរបងសាលាបំពេញវិជ្ជាប្រវែង៣៧ម៉ែត្របានរងការខូចខាតទាំងស្រុង ដោយសាររថយន្តចំណុះ៨តោនមួយគ្រឿងបានដឹកដែកធ្ងន់ សង្ស័យបើកងោកបានរេចង្កូតបុករះ ។ហេតុការណ៍នេះបានកើតឡើងនៅវេលាម៉ោង១០និង៤០នាទីយប់ថ្ងៃទី២៣ ខែមិថុនា ឆ្នាំ២០១៧ នៅលើកំណាត់ផ្លូវជាតិលេខ៥ ស្ថិតក្នុងនៅភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចនគរបាលក្រុងកំពង់ឆ្នាំងបានអោយដឹងថា៖ រថយន្តបង្កហេតុខាងលើ ពណ៌ស ពាក់ស្លាកលេខ ចង្កូតស្ដាំPSHN 0184 បើកបរដោយឈ្មោះ កែវ ថាច អាយុ៤៧ឆ្នាំ រស់នៅខេត្តកំពង់ចាម ដោយគេបានដឹកដែកពេញរថយន្ត បើកបរពីភ្នំពេញទៅខេត្តបាត់ដំបង។ លុះមកដល់ចំណុចកើតហេតុជាចំណុចផ្លូវកោង ដោយសារតែគេបើកលឿនពេក និងទំនងជាបើ កងោគផងនោះយកចង្កូតមិនទាន់ រថយន្តក៏បានបុករះរបងសាលាបំពេញវិជ្ជាខូចអស់៣៧ម៉ែត្រ បុកដង្គោលភ្លើងដែកដួលអស់១ដើម បុកផ្លាកគណៈបក្សប្រជាជនខូចអស់១ផ្ទាំងធំ និងបុកធ្លាយចូលទៅក្នុងរបងសាខាកាកបាទក្រហមខេត្តកំពង់ឆ្នាំង ហើយទើបជាប់ផុងទៅមុខលែងរួច។ ប៉ុន្តែនៅក្នុងហេតុការណ៍នេះមិនបង្កគ្រោះថ្នាក់ដល់អ្នកធ្វើដំណើរណាឡើយ។
សមត្ថកិច្ចបានអោយដឹងទៀតថា៖ នៅក្រោយពេលកើតហេតុអ្នកបើកបររថយន្ត ត្រូវបានសមត្ថកិច្ចឃាត់ខ្លួនបញ្ជូនមកអធិការនគរបាលក្រុងកំពង់ឆ្នាំង ដើម្បីធ្វើកំណត់ហេតុតាមផ្លូវច្បាប់ នឹងរង់ចាំធ្វើការដោះស្រាយម្ចាស់ស្ថាប័នរងគ្រោះ។
នៅចំពោះមុខសមត្ថកិច្ច និងមហាជនអ្នកបើកបររថយន្តបាននិយាយថា មកពីគាត់បើកគេចរថយន្តតូច១គ្រឿងមកពីមុខទើបើកឡើងលើចិញ្ចើមផ្លូវមានគ្រោះថ្នាក់បែបនេះ។ ប៉ុន្តែសមត្ថកិច្ច និងមហាជនភាគច្រើននិយាយថាករណីនេះមកពីគេបើកបរងោកងុយច្រើនជាង៕ ( ឈៀង ថារិទ្ធ )
http://ift.tt/2s6FSDt
