ឆេះរថយន្តទូរីសដឹកផលនេសាទ១គ្រឿងបានឆេះឌីសនិងរាលដាលឆេះរថយន្តខ្ទេចទាំងស្រុង ព្រោះតែបើកឡើងពីផ្លូវកំពង់ឃុំឆ្នុកទ្រូរអិលខ្លាំងពេក
ខេត្តកំពង់ឆ្នាំង៖ រថយន្តទូរីស ដឹកផលនេសាទ មួយគ្រឿងត្រូវបានឆេះឌីស បង្កអោយភ្លើងរាលដាលឆេះរថយន្តខ្ទេចទាំងស្រុង ដោយសារតែបើកបរលើផ្លូវរអិលរោទ៍ម៉ាស៊ីនខ្លាំង។ ហេតុការណ៍នេះបានកើតឡើងនៅវេលាម៉ោង៧និង១០នាទីព្រឹកថ្ងៃទី១៩ ខែកក្កដា ឆ្នាំ២០១៧ នៅលើកំណាត់ផ្លូវលេខ៥២ ចុះទៅមាត់កំពង់ ស្ថិតក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូរណ៌ ។
ម្ចាស់រថយន្តរងគ្រោះ ឈ្មោះ គូ ដែលមានទីលំនៅក្នុងភូមិពន្លៃ ឃុំពន្លៃ ស្រុកបរិបូណ៌ បានអោយដឹងថាៈ រថយន្តគាត់ម៉ាកសាំយ៉ុង ពណ៌ សំបកឪឡឹក ពាក់ស្លាកលេខភ្នំពេញ 2A.0906 ។ មុនពេលកើតហេតុ គាត់ដឹកអ្នកដំណើរ ៤ទៅ៥នាក់ ជាអាជីវករដឹក ត្រី អន្ទុង ខ្យង និងពស់ព្រលិត មានទម្ងន់សរុប ជាង៧០០គីឡូក្រាម ដោយចេញពីមាត់កំពង់ទឹកឆ្នុកទ្រូ ឡើងមកផ្សារពន្លៃ ឆ្ពោះទៅក្រុងភ្នំពេញ ដូចរាល់ថ្ងៃ ។ប៉ុន្តែពេលមកដល់កន្លែងកើតហេតុ ដែលជាផ្លូវទើបចាក់ថ្មី មានសភាពរអិលខ្លាំង និងផុងផងនោះ គាត់បានប្រឹងរោទ៍ម៉ាស៊ីនរថយន្តខ្លាំងៗ បណ្តាលអោយឆេះឌីសរថយន្ត រួចក៏ឆ្លងឆេះរាលដល់ រថយន្តទាំងមូលតែម្តង ប៉ុន្តែនៅក្នុងហេតុការណ៍នេះ មិនមានអ្នកណារងរបួសនោះទេ ព្រោះពេលកើតហេតុ បាននាំគ្នាចុះចេញពីរថយន្តអស់ គឺខូចខាតរថយន្តទូរីស១គ្រឿង និងឆេះ ផលនេសាទក្នុងរថយន្តទាំងស្រុងតែម្តង ។
ដោយឡែក នៅពេលកើតហេតុនេះមិនឃើញមានរថយន្តពន្លត់អគ្គីភ័យរបស់អធិការនគរបាលស្រុកបរិបូណ៌ទៅជួយពន្លត់ទេ ព្រោះបើទៅក៍មិនទាន់ដែរ ហើយបញ្ហាមួយទៀត គឺផ្លូវលំបាកខ្លាំង ព្រោះផ្លូវទើបតែចាក់ដីថ្មី មានសភាពរអិលខ្លាំង និងផុងផងដែរ ៕ ( ឈៀង ថារិទ្ធ )
http://ift.tt/2u9RfK3
