សមត្ថកិច្ចចាប់បានចោរ៣នាក់ដែលបានបាញ់សម្លាប់អ្នករត់តាក់ស៊ីប្លន់យករថយន្តហាឡិនដ័រនៅកំពង់ឆ្នាំងកាលពីយប់ថ្ងៃទី១៦ខែកក្កដា
ខេត្តកំពង់ឆ្នាំង៖ សមត្ថកិច្ចក្រសួងមហាផ្ទៃពីថ្ងៃទី១៩ ដល់ថ្ងៃទី២០ ខែកក្កដានេះ បានស្រាវជ្រាវចាប់បានក្រុមចោរប្លន់៣នាក់ដែលបានបាញ់សម្លាប់ អ្នករត់តាក់ស៊ី ឈ្មោះ អៀង ចត្រា ហៅចិត្ត អាយុ៤៣ឆ្នាំ រស់នៅភូមិចំការចេកខាងជើង សង្កាត់ផ្ទះព្រៃ ក្រុងពោធិសាត់ ខេត្តពោធិសាត់ ដោយប្លន់យករថយន្តម៉ាកហាយឡិនដ័រ ពណ៌ខ្មៅ ពាក់ស្លាកលេខ ភ្នំពេញ 2J.1125 ១គ្រឿងយកទៅបាត់ កាលពីម៉ោង៧និង៣០នាទីយប់ ថ្ងៃទី១៦ ខែកក្កដា នៅចំណុចផ្លូវលំចូលភូមិគោកស្តៅ ឃុំទឹកហូត ស្រុករលាប្អៀរ ក្បែរផ្លូវជាតិលេខ៥ ចន្លោះគីឡូម៉ែត្រលេខ៧០និង៧១។
ក្រុមចោរប្លន់ទាំង៣នាក់នេះមាន៖ ១ឈ្មោះ ប៉ែន សុខន អាយុ៣៥ឆ្នាំ ជាជនដៃដល់ រស់នៅភូមិទួលសង្កែ សង្កាត់ឬស្សីកែវ ក្រុងភ្នំពេញ ២ឈ្មោះ សុវណ្ណ ឧត្តម អាយុ២៤ឆ្នាំ រស់នៅភូមិព្រៃខ្មែរ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង ៣ឈ្មោះ រ៉ា ឌីម៉ា អាយុ១៩ឆ្នាំ ជាអ្នកជួលរថយន្ត រស់នៅភូមិប៉ែន ឃុំលាជ ស្រុកភ្នំក្រវាញ ខេត្តពោធិសាត់។
ជនល្មើសបានសារភាពថា៖ នៅម៉ោង៥ល្ងាចថ្ងៃទី១៦ ខែកក្កដា គេបានទូរសព្ទ័ជួលរថយន្តជនរងគ្រោះ ក្នុងតម្លៃ១៤ម៉ឺនរៀល ពីក្រុងភ្នំពេញទៅខេត្តពោធិសាត់ ។ ពេលជិះមកដល់ចំនុចកើតហេតុ គេបានអោយម្ចាស់រថយន្តឈប់នោម ខណៈនោះឈ្មោះ ប៉ែន សុខន បានយកកាំភ្លើងរឺវ៉ុលវែ បាញ់ក្បាលជនរងគ្រោះកំពុងឈរនោម ចំពីក្រោយធ្លាយទៅថ្ងាស់ស្លាប់នៅកន្លែងកើតហេតុ បន្ទាប់មកពួកគេបានជិះរយន្តទៅទីក្រុងភ្នំពេញវិញ ដោយបានដោះផ្លាកលេខរថយន្តទុក ហើយបានពាក់ផ្លាកអង្គការ N GO ជំនួសវិញ ដើម្បីរកម៉ូយលក់ ហើយដល់ថ្ងៃទី១៩ និងថ្ងៃទី២០ ខែកក្កដា ក៏ត្រូវសមត្ថកិច្ចចាប់ខ្លួនបានទាំង៣នាក់តែម្តង។
នៅម៉ោង៥និង៣០នាទីល្ងាច ថ្ងៃទី២១ ខែកក្កដា នេះសមត្ថកិច្ចនគរគលបាលខេត្តកំពង់ឆ្នាំង បានទទួលយកជនល្មើសទាំង៣នាក់ និងរថយន្តជាវត្ថុតាងមកដល់ខេត្ត និងត្រៀមកសាងសំណុំរឿងបញ្ជូនទៅតុលាការខេត្តចាត់ការតាមនិតិវិធី៕ ( ឈៀង ថារិទ្ធ )
http://ift.tt/2txXAQF
