១នាក់ជាជាងកាត់សក់ និង១នាក់ទៀតជាកម្មករសំណង់ឆ្លៀតលក់ថ្នាំញៀនរកប្រាក់បន្ថែម
ខេត្តព្រះសីហនុ៖ មុខសញ្ញាដ៏សកម្មលក់ចែកចាយថ្នាំញៀនចំនួន២នាក់ ត្រូវបានសមត្ថកិច្ចនគរបាលប្រឆាំងគ្រឿងញៀនខេត្តព្រះសីហនុ ចាប់ខ្លួនកាលពីវេលាម៉ោង២៣យប់ ថ្ងៃទី៦ ខែកញ្ញា ឆ្នាំ២០១៧ស្ថិតនៅក្រុមទី៩ ភូមិ៣សង្កាត់លេខ៣ ក្រុងព្រះសីហនុ (តំបន់ភូមិថ្មី)។
ជាមួយនឹងការឃាត់ខ្លួនជនសង្ស័យ បានដកហូតថ្នាំញៀនមេតំហ្វេតាមីនចំនួន២កញ្ចប់ ទម្ងន់៣.៣៦ក្រាម និងទូរសព្ទ័ដៃ២គ្រឿង។
លោកឧត្តមសេនីយ៍ត្រីស៊ុន សុផាត ស្នងការរងទទួលផែនប្រឆាំងបទល្មើសបានឲ្យដឹងថា៖ ជនសង្ស័យទី១-ឈ្មោះគង់ ឈិន ភេទប្រុស អាយុ៥២ឆ្នាំ ស្រុកកំណើតនៅភូមិក្រាំងត្នោត ឃុំសន្លុង ស្រុកទ្រាំង ខេត្តតាកែវ បច្ចុប្បន្ននៅក្រុមទី៩ ភូមិ៣ សង្កាត់លេខ៣ (តំបន់ភូមិថ្មី) មុខរបរជាងកាត់សក់ តែឆ្លៀតលក់ថ្នាំញៀន។ ទី២-ឈ្មោះឆេង ឡី ភេទប្រុស អាយុ២៣ឆ្នាំ មានស្រុកកំណើត និងទីលំនៅដូចគ្នា មុខរបរកម្មករសំណង់។
ជនទាំងពីរសមត្ថកិច្ចបានកសាងសំណុំរឿងតាមនីតិវិធី បញ្ជូនទៅតុលាការ៕ ទន់ សុខ
http://ift.tt/2j4PTgb
