ប្រជាពលរដ្ឋ​ភូមិ​ទី​១​សង្កាត់​ខ្សា​ម​រាប់រយ​គ្រួសារ​សំណូមពរ​លោក​អភិបាលក្រុង​កំពង់ឆ្នាំង​និង​សមត្ថកិច្ច​ជួយ​ណែនាំ​រថយន្ត​ដឹក​ដី​កុំអោយ​បើក​លឿន​នាំអោយ​ដី​ហុយ​ប៉ះពាល់​សុខភាព

ខេត្តកំពង់ឆ្នាំង៖ ប្រជាពលរដ្ឋក្នុងភូមិទី១ សង្កាត់ខ្សាម ក្រុងកំពង់ឆ្នាំង រស់នៅតាមផ្លូវលំគ្រួស ក្រហមជាច្រើនគ្រួសារ នៅព្រឹកថ្ងៃទី២០ ខែធ្នូ ឆ្នាំ២០១៧នេះ បាននាំគ្នាដាក់ធុងទឹក កៅអី ឬសំបកកង់រថយន្ត នៅក្នុងផ្លូវលំគ្រួសក្រហម តាមមុខផ្ទះគ្រប់ៗគ្នា ក្នុងគោលបំណងកុំអោយរថយន្តដឹកដី បើកបរលឿនៗពេលដែលនាំអោយដីហុយចូលផ្ទះប៉ះពាល់ដល់សុខភាពកូនចៅ។

រឿនេះពួកគាត់ក៏ធ្លាប់បានសំណូមពរផងដែរដល់សមត្ថកិច្ច តែគ្មានប្រសិទ្ធភាពឡើយ។

លោក សេង សារុន ជាប្រជាពលរដ្ឋម្នាក់រស់នៅក្នុងភូមិ សង្កាត់ខាងលើ បានអោយដឹងថា៖ ជារៀងរាល់ថ្ងៃមានរថយន្តដឹកដីមិនដឹងជារបដស់ក្រុមហ៊ុនណាខ្លះទេ ជាច្រើនគ្រឿងបានបើកបរដឹកដីលឿនៗធ្វើអោយដីលើផ្លូវគ្រួសក្រហមក្នុងភូមិហុយខ្លាំងណាស់ ចូលផ្ទះសម្បែងប្រជាពលរដ្ឋគ្រប់ៗគ្នា ធ្វើអោយកូនចៅឈ្លក់ ហូបបាយទឹកក៏មិនកើត រស់នៅហាលខោអាវក៏ពិបាកដែរ ពួកគាត់ធ្លាប់សំណូមពរដល់នគរបាលប៉ុស្តិ ណកឬបាលក្រុងផងដែរ ប៉ុន្តែគ្មានអ្នកណាជួយឃាត់រថយន្តណែនាំពោយពួកគាត់ឡើយ ហេតុនេះហើយមានតែនាំគ្នាដាក់សម្ភារៈនៅក្នុងផ្លូវមុខផ្ទះរៀងៗខ្លួន ដើម្បីកុំរថយន្តទាំងនោះបើកលឿនៗពេក។

ទាក់ទងនិងបញ្ហានេះ ប្រជាពលរដ្ឋក៏សុំសំណូមពរផងដែរដល់ លោកអភិបាលក្រុងកំពង់ឆ្នាំង មេត្តាជួយណែនាំដល់ម្ចាស់ក្រុមហ៊ុនឡានដឹកដី ឬជួយណែនាំដល់សមត្ថកិច្ចនគរបាលក្រុងអោយជួយឃាត់រថយន្តដឹកដីទាំងនោះណែនាំកុំអោយបើកបរលឿនៗពេក បើពុំនោះទេអ្នកស្រុកក្នុងភូមិពិតជាគ្មានអ្នកណារស់នៅបានឡើយ។

លោក យិន សាវ៉ែន អភិបាលក្រុងកំពង់ឆ្នាំង នៅរសៀលថ្ងៃទី២០ ខែធ្នូនេះបាននិយាយអោយដឹងថា៖ នៅល្ងាចថ្ងៃទី១៩ ខែធ្នូ នេះលោកក៏បានទទួលដំណឹងនេះដែរ និងនៅព្រឹកមិញលោកនិងក្រុមការងាររបស់ក្រុងកំពង់ឆ្នាំង ក៏បានចុះទៅមើលផ្លូវលេខ១ក្នុងភូំិទី១សង្កាត់ខ្សាមនេះផងដែរ។ ទាក់ទងនិងរឿងនេះក្រុមការងាររបស់ក្រុងកំពង់ឆ្នាំងក៏បានធ្វើការប្រជុំពិភាក្សាគ្នារកដំណោះស្រាយផងដែរ ដោយមានគំនិតគិតថា នឹងហៅអ្នកបើកបររថយន្តដឹកដីមកប្រជុំណែនាំ អោយពួកគាត់បើកបរបន្ថយល្បឿន ឬអ្នករកស៊ីដឹកដីគួរតែសហការគ្នានិងនាំគ្នាដឹកទឹកមកស្រោចនៅលើផ្លូវគ្រួសក្រហមខាងលើនេះ ដើម្បីកុំអោយដីហុយប៉ះពាល់ការរស់នៅប្រជាពលរដ្ឋ។ ដូច្នេះរឿងនេះលោក និងក្រុមការងាររបស់ក្រុងកំពង់ឆ្នាំងនឹងចាត់ការដោះស្រាយជូនប្រជាពលរដ្ឋក្នុងពេលឆាប់ៗនេះហើយ ។

ទន្ទឹមគ្នានេះដែលលោកអភិបាលក្រុងកំពង់ឆ្នាំង សូមអំពាវនាវដល់អ្នកបើកបររថយន្តដឹកដីទាំងអស់មេត្តាកុំបើកបររថយន្តលឿនៗពេក គួរតែគិតគូរដល់ផលប៉ះពាល់របស់ប្រជាពលរដ្ឋដែលរស់នៅតាមដងផ្លូវគ្រួសក្រហមនៅក្នុងក្រុងកំពង់ឆ្នាំងផង៕ រឹទ្ធិ ជ័យ