រដ្ឋមន្ត្រីក្រសួងពាណិជ្ជកម្មថា បើចង់ឱ្យផលិតផលខ្មែរស់ កុំឆ្ងាញ់តែរបស់បរទេស
ភ្នំពេញ៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានលើកឡើងថា បើចង់ឱ្យផលិតផលជាតិរស់ កុំឆ្ងាញ់តែរសជាតិបរទេស ហើយងាកមកជួយ គាំទ្រផលិតផលខ្មែរ កាត់បន្ថយការប្រើប្រាស់ ផលិតផលនាំចូលពីបរទេស ដើម្បីទ្រទ្រង់និរន្តរភាព របស់ផលិតកម្មក្នុងស្រុក សំដៅជំរុញកំណើនសេដ្ឋកិច្ច និងកាត់បន្ថយភាពក្រីក្រ តាមរយៈការបង្កើតឱកាសការងារ និងប្រាក់ចំណូលកាន់តែច្រើនដល់ពលរដ្ឋ និងជាតិ ។
លោករដ្ឋមន្ត្រីបានថ្លែង ក្នុងពិធីបើកព្រឹត្តិការណ៍ ពិព័រណ៍ផលិតផលខ្មែរ ក្នុងយុទ្ធនាការទិញ ផលិតផលខ្មែរ រដូវកាលទី៣ កាលពីរសៀលថ្ងៃទី៧ ខែមិថុនា ឆ្នាំ២០១៨ នៅមន្ទីរពាណិជ្ជកម្ម ខេត្តបន្ទាយមានជ័យថា ក្រសួងពាណិជ្ជកម្ម បានប្រឹងប្រែងបើកទីផ្សារថ្មីៗទាំងក្នុង និងក្រៅប្រទេស ព្រមទាំងការដាក់ចេញនូវព្រឹត្តិការណ៍ “ពិព័រណ៍ពាណិជ្ជកម្ម ផលិតផលខ្មែរ ក្នុងឱកាសយុទ្ធនាការ ទិញផលិតផលខ្មែរ” សំដៅអនុវត្តន៍គោលនយោបាយ ជំរុញការនាំចេញនៅនឹងកន្លែង ។
លោកថា ដើម្បីទាក់ទាញទំនុកចិត្ត និងការគាំទ្រកាន់តែច្រើនពីប្រជាជនខ្មែរ ក៏ដូចជាភ្ញៀវទេសចរបរទេស មកលើផលិតផលក្នុងស្រុក លោកសំណូមពរដល់ផលិតករ និងសហគ្រិនក្នុងស្រុក ត្រូវខិតខំប្រឹងប្រែងពង្រឹង គុណភាពផលិតផលរបស់ខ្លួន ស្របតាមបទដ្ឋានស្តង់ដារអន្តរជាតិ ទាំងការវេចខ្ចប់ ការដាក់ម៉ាក និងការធ្វើទីផ្សារជាដើម ។
រដ្ឋមន្ត្រីបានបញ្ជាក់ថា “ផលិតករ និងសហគ្រិនទាំងអស់ ចាំបាច់ត្រូវចេះអភិវឌ្ឍន៍ផលិតផល ឬសេវាកម្មរបស់ខ្លួន ឱ្យមានគុណភាពខ្ពស់ និងមានតម្លៃសមរម្យទើបអាច ប្រកួតប្រជែងជាមួយទំនិញ នាំចូលពីបរទេស ។ ខ្ញុំមានជំនឿថា ប្រជាពលរដ្ឋខ្មែរនឹងនាំគ្នា គាំទ្រផលិតផលក្នុងស្រុកច្រើនឡើងៗ បើសិនជាផលិតករ និងសហគ្រិនយើងអាចធ្វើបាន ព្រោះនេះគឺជាកត្តាសត្យានុម័ត នៃការប្រកួតប្រជែងទីផ្សារសេរី ដែលយើងទាំងអស់គ្នា ត្រូវតែទទួលស្គាល់” ៕
https://ift.tt/eA8V8J
