រូបចម្លាក់បុរាណ «សត្វមករ» ដ៏ធំមួយត្រូវបានប្រទះឃើញក្នុងតំបន់ឧទ្យានជាតិព្រះជ័យវរ្ម័ន-នរោត្តមភ្នំគូលែន

រូបចម្លាក់បុរាណ «សត្វមករ» ដ៏ធំមួយ Kulen

សៀមរាប​៖​ ​មន្ទីរ​បរិស្ថាន​ខេត្តសៀមរាប​ ​និង​អ្នកជំនាញ​បុរាណវិទ្យា​ ​បាន​និង​កំពុង​សិក្សា​ស្រាវជ្រាវ​លើ​រូបចម្លាក់​បុរាណ​ ​«​សត្វ​មករ​»​ ​ដ៏​ធំ​មួយ​ដែល​ពុំ​ធ្លាប់​ឃើញ​ពីមុន​មក​ ​ក្រោយពី​ប្រជាពលរដ្ឋ​បាន​ប្រទះឃើញ​ក្នុង​តំបន់​ឧទ្យានជាតិ​ព្រះ​ជ័យវរ្ម័ន​-​នរោត្តម​ភ្នំ​គូលែន​ ​ស្ថិត​ក្នុង​ឃុំ​បឹងមាលា​ ​ស្រុក​ស្វាយលើ​ ​ខេត្តសៀមរាប​។​

​ប្រធានមន្ទីរ​បរិស្ថាន​ខេត្តសៀមរាប​ ​លោក​ ​ស៊ុន​ ​គង់​ ​បាន​ឲ្យដឹង​កាលពី​ថ្ងៃ​ចន្ទ​ថា​ ​រូបចម្លាក់​បុរាណ​ដែល​ជា​បំណែក​ក្បាល​នៃ​«​សត្វ​មករ​»​នេះ​ ​ត្រូវ​បាន​ប្រជាពលរដ្ឋ​ម្នាក់​ប្រទះឃើញ​ ​កាលពី​ថ្ងៃសៅរ៍​ ​ហើយ​មន្ត្រី​ជំនាញ​ក៏បាន​ចុះទៅ​ពិនិត្យ​ទីតាំង​នោះ​ ​កាលពី​ថ្ងៃអាទិត្យ​។​ ​លោក​បន្ត​ថា​ ​តាមរយៈ​ការពិនិត្យ​របស់​មន្ត្រី​ជំនាញ​ឃើញថា​ ​រូបចម្លាក់​ក្បាលសត្វ​មករ​ ​ធ្វើឡើង​ពី​ថ្មភក់​ ​នៅ​អំឡុង​សតវត្សរ៍​ទី៦​ ​ហើយ​ដងខ្លួន​ត្រូវ​បាន​បែកបាក់​ជា​បំណែ​កៗ​ ​ក្នុង​នោះ​មន្ត្រី​ជំនាញ​បាន​រក​ឃើញ​បំណែក​ដងខ្លួន​ ​ចំនួន១៣ដុំ​ទៀត​ ​នៅ​ក្បែរ​នោះ​ផង​ដែរ​។​ ​

លោក​មានប្រសាសន៍​ថា​៖​ ​«​បើ​តាម​អ្នកជំនាញ​ ​រូបចម្លាក់​សត្វ​មករ​នេះ​ ​មាន​ទំហំ​ធំ​ដែល​យើង​មិនធ្លាប់​បានឃើញ​ពីមុន​មក​ ​ក្នុង​នោះ​មាន​បណ្តោយ​ប្រវែង​ប្រមាណ​ ​២.១៤ម៉ែត្រ​ ​កម្ពស់​ប្រមាណ​ ​០.៩៧ម៉ែត្រ​»​។​

រូបចម្លាក់បុរាណ «សត្វមករ» ដ៏ធំមួយ Kulen - mountain

​លោក​បន្ត​ថា​៖​ ​«​រូប​សំណាក់​សត្វ​មករ​ ​រួម​និង​បំណែក​ដងខ្លួន​ទាំង ១៣ដុំ​នោះ​ ​គឺ​យើង​មិនទាន់​មានការ​រើ​ ​កកាយ​ចេញពី​ទីតាំង​នោះ​នៅឡើយ​ ​ដោយ​យើង​ប្រាប់​ទៅ​មន្ត្រី​ឧទ្យានុ​រក្ស​ជួយការ​ពារ​ ​ដើម្បី​រក្សាទុក​ឲ្យ​ខាង​មន្ត្រី​ជំនាញ​មក​ពី​ក្រសួង​ស្ថាប័ន​ពាក់ព័ន្ធ​ ​ចុះ​មក​សិក្សា​លម្អិត​ពី​ប្រវត្តិ​ទីតាំង​នោះ​ ​និង​រៀប​ចំ​បង្គុំ​រូប​បែកបាក់​នោះ​ឡើងវិញ​»​។​

​លោក​ ​ស៊ុន​ ​គង់​ ​បាន​បន្ថែម​ថា​ ​នៅ​ទីតាំង​នោះ​ ​ក្រុម​អ្នកជំនាញ​ពុំ​បាន​រក​ឃើញ​គ្រឹះ​ប្រាសាទ​ណាមួយ​នោះ​ទេ​ ​ដែលតា​មកា​រស​ន្និ​ដ្ឋាន​ ​គឺ​បុព្វបុរស​ខ្មែរ​នាសម័យនោះ​ ​កសាង​រូបចម្លាក់​នេះ​ដាក់​នៅ​លើ​ផ្ទាំងសិលា​(​ថ្ម​)​ប៉ុណ្ណោះ​។​

លោក​ ​ឈឹម​ ​សំរិទ្ធី​ ​ឬ​ក្នុង​ហ្វេ​សប៊ុ​ក​ដាក់ឈ្មោះ​ ​Rithy​ ​Angkor​ ​អាយុ​ ​៣៨ឆ្នាំ​ ​រស់នៅ​ខេត្តសៀមរាប​ ​មានមុខ​របរ​ជាជាង​ចម្លាក់​ ​ដែល​បាន​ប្រទះឃើញ​រូបចម្លាក់​បុរាណ​ ​«​សត្វ​មករ​»​ ​នេះ​ ​បាន​ឲ្យដឹង​ថា​ ​រូបលោក​ ​បាន​ប្រទះឃើញ​រូបចម្លាក់​នេះ​ ​កាលពី​ថ្ងៃសៅរ៍​ ​ខណៈ​ពេល​ដែល​រូបលោក​ដើរទៅ​ក្នុង​ព្រៃ​នៃ​ឧទ្យា​ជាតិ​ព្រះ​ជ័យវរ្ម័ន​-​នរោត្តម​ភ្នំ​គូលែន​ ​ដើម្បី​ស្វែងរក​ឬស្សី​ ​និង​វត្ថុ​ស័ក្​ត​សិទ្ធិ​មួយចំនួន​។​ ​លោក​បន្ត​ថា​៖​ ​«​ខ្ញុំ​ជា​មនុស្សម្នាក់​ដែល​ចូលចិត្ត​ដើរ​ក្នុង​ព្រៃ​ ​ដើម្បី​រក​អ្វី​ដែ​លប្លែ​កៗ​ ​ដូចជា​ ​វត្ថុ​ក្នុង​ដើម​ឬស្សី​ ​ខ្លឹមឈើ​ ​និង​វត្ថុ​ស័ក្​ត​សិទ្ធ​មួយចំនួន​ដែល​ជា​ជំនឿ​របស់​ខ្មែរយើង​ ​ហើយក៏​បាន​ជួបប្រទះ​រូបចម្លាក់​ដ៏​កម្រ​នេះ​តែម្តង​»​។​

​លោក​បន្ថែម​ថា​៖​ ​«​ក្រោយពី​បានឃើញ​រូបចម្លាក់​នេះ​ ​ខ្ញុំ​ក៏បាន​ជូន​ក្រុម​មន្ត្រី​បរិស្ថាន​ ​និង​អ្នក​បុរាណវិទ្យា​ចុះទៅ​ទីតាំង​នោះ​ ​និង​ជួយ​រក​បំណែ​ក​ខ្លះ​ៗ​នៃ​រូបចម្លាក់​នេះ​ដែរ​ ​គឺ​យើង​បាន​រក​ឃើញ​បំណែក​តួខ្លួន​មួយចំនួន​ធំ​ដែរ​ ​នៅ​បាត់​តែ​​ប្រ​ម៉ោយ​ទេ​»​។​

​បើ​តាម​ការ​លើក​ឡើង​តៗ​គ្នា​ពី​ប្រវត្តិ​សត្វ​មករ​នេះ​ ​បាន​ឲ្យដឹង​ថា​ ​រូបរាង​របស់​សត្វ​នេះ​ ​មាន​ក្បាល​ ​និង​ដងខ្លួន​ជា​សត្វ​នាគ​ ​ត្រចៀកជ្រូក​ ​ធ្មេញ​ក្រពើ​ ​ប្រមោយដំរី​ ​ភ្នែក​ស្វា​ ​ស្រកាត្រី​ ​ជើង​រាជសីហ៍​ ​និង​កន្ទុយក្ងោក​។​

អ្នកនាំពាក្យ​អាជ្ញាធរ​ជាតិ​អប្សរា​ ​លោ​ក​ឡុង​ ​កុសល​ ​បាន​មានប្រសាសន៍​ថា​ ​ក្រុមការងារ​ជំនាញ​របស់​អាជ្ញាធរ​ជាតិ​អប្សរា​ ​បាន​ចុះ​កាន់​ទីតាំង​នោះ​កាលពី​ថ្ងៃម្សិលមិញ​នេះ​ ​ដោយ​រៀបចំ​ដាក់បញ្ចូល​ទីតាំង​នោះ​ទៅ​ក្នុង​ផែនទី​បុរាណវិទ្យា​បន្ថែម​ ​ដើម្បី​ងាយស្រួល​ក្នុង​ការស្រាវជ្រាវ​លម្អិត​។​ ​តែ​យ៉ាងណា​ ​លោក​នៅ​ពុំ​ទាន់​អាច​បញ្ជាក់​បន្ថែម​លម្អិត​ពី​ប្រវត្តិរូប​ចម្លាក់​នេះ​បាន​នៅឡើយ​។​ ​លោក​បន្ត​ថា​៖​ ​«​នៅ​តំបន់​ឧទ្យា​ជាតិ​ភ្នំ​គូលែន​នោះ​ ​សំបូរ​ទៅ​ដោយ​សំណល់​បុរាណវិទ្យា​ជាច្រើន​ ​ទាំង​នៅ​លើ​ដី​ ​និង​ក្រោម​ដី​ ​ដូច្នេះ​សូម​អំពាវនាវ​ដល់​ប្រជាពលរដ្ឋ​ ​ជាពិសេស​អ្នក​រស់នៅ​តំបន់​នោះ​ ​ជៀសវាង​ការ​ជីកកកាយ​ ​ឬ​ឈូស​ឆាយ​ទីតាំង​បុរាណ​ដ្ឋាន​ ​ហើយ​ប្រសិនបើ​ប្រទះឃើញ​វត្ថុបុរាណ​ទាំងនោះ​ ​សូម​រាយការណ៍​មក​ខាង​មន្ត្រី​ជំនាញ​ ​និង​សមត្ថកិច្ច​ ​ដើម្បី​ធ្វើការ​សិក្សា​ស្រាវជ្រាវ​ ​និង​ថែរក្សា​ទុក​សម្រាប់​មនុស្ស​ជំនាន់​ក្រោយ​»​៕​