ខុនដូភ្លោះ ”ផ្កាយ៥” ក្បែរវត្តមហាមន្ត្រីកម្ពស់ ៣៥ជាន់ចំណាយទុន ១០០លានដុល្លារនឹងលេចរូបរាងនៅឆ្នាំ២០១៧
អគារខុនដូភ្លោះកម្ពស់ ៣៥ជាន់ដែលត្រូវបានដាក់ឈ្មោះថា Sky Villa នឹងលេចរូបរាងនៅក្នុងឆ្នាំ២០១៧ ខាងមុខនេះ ដោយគ្រោងចំណាយថវិកាអស់ប្រមាណជា ១០០លានដុល្លារអាមេរិកក្រោមការវិនិយោគផ្ទាល់ពីក្រុមហ៊ុនតៃវ៉ាន់។
អ្នកគ្រប់គ្រងខាងផ្នែកទីផ្សារនៅក្រុមហ៊ុន Crystal Orange Construction កញ្ញា កែវ សុផល្លា ឱ្យThe BNEWS ដឹងនៅរសៀលនេះថា អគារ Sky Villa ដែលជាប្រភេទខុនដូលំដាប់ផ្កាយ “៥” នេះមានកម្ពស់ ៣៥ជាន់ (១៣៩ម៉ែត្រ) មាន ២៥៦បន្ទប់ ដែលទទួលបានការវិនិយោគផ្ទាល់ពីក្រុមហ៊ុនតៃវ៉ាន់ Crystal Orange Construction ក្នុងទឹកប្រាក់ប្រហែល ១០០លានដុល្លារអាមេរិក ហើយគម្រោងសាងសង់នឹងត្រូវបញ្ចប់នៅឆ្នាំ២០១៧ ខាងមុខនេះ។
កញ្ញាបន្តថា អគារ Sky Villa នេះ គឺសាងសង់នៅជិតស្តាតអូឡាំពិកទល់មុខវត្តមហាមន្ត្រីផ្លូវ ១៦៣ ដែលការសាងសង់ចាប់ផ្ដើមដំណើរការកាលពីថ្ងៃទី១៧ ខែតុលា កន្លងទៅនេះ ហើយបើតាមគម្រោងនឹងចំណាយពេល ៣៦ខែសាងសង់លើផ្ទៃដីទំហំ ៦ពាន់ម៉ែត្រការ៉េ។
ប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជាលោក ឧកញ៉ា ចេង ខេង យល់ឃើញថា ការកើនឡើងនៃចំនួនខុនដូនៅក្នុងស្រុក កាន់តែច្រើនវាធ្វើឱ្យវិនិយោគិនបរទេសនឹងមកវិនិយោគកាន់តែច្រើនហើយបណ្ដាក្រុមហ៊ុនអចលនទ្រព្យធំៗក៏សម្លឹងឃើញពីឱកាសវិនិយោគក្នុងទីផ្សារកម្ពុជាផងដែរ។
នាពេលថ្មីៗនេះ ក្រុមហ៊ុនអចលនទ្រព្យលំដាប់ពិភពលោក Century 21 បានចូលមកវិនិយោគនៅក្នុងទីផ្សារកម្ពុជា ហើយក៏បានប្រកាសទទួលស្គាល់អគារខុនដូ កាសាមេរីឌាន(Casa Meridian) ជាខុនដូកម្រិតកំពូលទីមួយនៅក្នុងតំបន់ពាណិជ្ជកម្មនិងជាលំនៅ ស្ថានដ៏គួរឱ្យកត់សម្គាល់មួយនៃទីក្រុងរណបកោះពេជ្រដែលអគារនេះត្រូវបានចំណាយទុនវិនិយោគអស់ ៦៥ លានដុល្លារអាមេរិក។
អគារខុនដូ កាសាមេរីឌាន(Casa Meridian) មានបន្ទប់ចំនួន ៤១៤ មានកម្ពស់ ៣១ជាន់ដោយមានបំពាក់បច្ចេកវិទ្យាទំនើបចុងក្រោយ និងរចនាបថស្ថាបត្យកម្មសម័យទំនើបដែលការសាងសង់នឹងបញ្ចប់នៅ ក្នុងឆ្នាំ២០១៧៕
អត្ថបទ ៖ ចាន់ សុខ នាង
from khmer-press.com http://ift.tt/1te56cC
via IFTTT
