កញ្ញា រិទ្ធ ថារី អាយុ ២៥ឆ្នាំ ដោយសារតែ ទាស់សំដីជាមួយគូដណ្តឹង យកផ្លែស្វាយជ្រលក់ជាមួយថ្នាំកណ្តុលញ៉ាំ សម្លាប់ខ្លួន ធ្វើឲ្យអ្នកមានគុណទាំងទ្វេបង្ហូរទឺកភ្នែកសោកស្តាយ
ខេត្តកណ្តាល ៖ គ្រាន់តែទាស់សម្តីជាមួយនឹងគូដណ្តឹង នារីវ័យ ២៥ឆ្នាំម្នាក់បានសម្រេចចិត្តសម្លាប់ខ្លួនដោយថ្នាំបំពុលសត្វកណ្តុរ ដែលធ្វើឲ្យអ្នកមានគុណទាំងទ្វេ ព្រមទាំងបងប្អូនសាច់ញាតិហូរទឹកភ្នែកយ៉ាងអាឡោះអាល័យ។ ហេតុការណ៍នេះបានកើតឡើងកាលពីថ្ងៃទី១៤ ខែធ្នូ នៅភូមិព្រែកតាទន់ ឃុំព្រែកប្រសព្វ ស្រុកខ្សាច់កណ្តាល ខេត្តកណ្តាល។
អធិការស្រុកខ្សាច់កណ្តាល លោក ម៉ែន សុឃឿន បានឲ្យដឹងថា ជនរងគ្រោះមានឈ្មោះ រិទ្ធ ថារី អាយុ២៥ឆ្នាំ។ លោកថា ជនរងគ្រោះបានទាស់សម្តីជាមួយគូដណ្តឹងដែលមានឈ្មោះ យន រិទ្ធី អាយុ២៥ឆ្នាំដូចគ្នា ក្រោយមកគេក៏ឃើញជនរងគ្រោះយកផ្លែស្វាយទៅញ៉ាំក្នុងបន្ទប់ នៃផ្ទះជីដូន ដោយជ្រលក់ជាមួយថ្នាំកណ្តុរ។ បន្ទាប់មកក៏មានការភ្ញាក់ផ្អើល ហើយក៏ត្រូវក្រុមគ្រួសារដឹកយកទៅសង្គ្រោះនៅមន្ទីរពេទ្យ តែអកុសល្យជនរងគ្រោះក៏ដាច់ខ្យល់ស្លាប់។
លោកអធិការថា យោងតាមការពិនិត្យរបស់សមត្ថកិច្ច ជនរងគ្រោះពិតពុលថ្នាំកណ្តុរ មែន ហើយក៏ប្រគល់សពឲ្យក្រុមគ្រួសារទទួលយកទៅធ្វើបុណ្យទាំងសោកសៅ។ លើផែនដីយើងនេះមនុស្សភាគច្រើនធ្វើអ្វីៗគ្រប់យ៉ាងដើម្បីទំនុកបំរ៉ុងឲ្យជីវិតបានរស់ ហើយមិនគូរមានមនុស្ស បំផ្លាញជីវិតដ៏មានតម្លៃរបស់ខ្លួន ដែលជាទីស្រឡាញ់របស់អ្នកមានគុណ បងប្អូននោះឡើយ ៕
