ក្រសួងមហាផ្ទៃ ទទួលយកពាក្យសុំបង្កើត គណបក្សអំណាចពលរដ្ឋខ្មែរ
Monday 15/12/2014 Time : 03 : 56 pm
ភ្នំពេញ៖ នៅថ្ងៃទី១៥ ខែធ្នូ ឆ្នាំ២០១៤ បានបោះត្រាទទួលពាក្យសុំបង្កើតគណបក្ស ឈ្មោះ “អំណាចពលរដ្ឋខ្មែរ” ដែលមានលោក សួនសេរីរដ្ឋា ជាប្រធាន។ ប៉ុន្តែការសម្រេចអនុញ្ញាតឲ្យឬមិនអនុញ្ញាតឲ្យបង្កើតគណបក្សនោះនៅមិនទាន់មានការសម្រេចពីរដ្ឋមន្ត្រីក្រសួងមហាផ្ទៃនៅឡើយទេ។
លោក សួន សេរីរដ្ឋា ប្រធានចលនាអំណាចពលរដ្ឋខ្មែរនិងជាតំណាងស្ថាបនិក បានដាក់ពាក្យសុំបង្កើតគណបក្សអំណាចពលរដ្ឋខ្មែរជូនលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ កាលពីថ្ងៃទី៦ខែសីហា ឆ្នាំ២០១៤ ហើយត្រូវបាននាយកដ្ឋានកិច្ចការនយោបាយក្រសួងមហាផ្ទៃវាយត្រាទទួលលើពាក្យស្នើសុំនោះ កាលពីថ្ងៃទី១៥ ខែធ្នូ ឆ្នាំ២០១៤។
ក្នុងពាក្យសុំបង្កើតគណបក្សនយោបាយ លោក សួន សេរីរដ្ឋាបានជម្រាបជូនលោករដ្ឋមន្ត្រីក្រសួងមហាផ្ទៃថា “ខ្ញុំបាទ នាងខ្ញុំនិងប្រជាពលរដ្ឋខ្មែរទាំង ៨០នាក់ បានឯកភាពគ្នាផ្តួចផ្តើមបង្កើតគណបក្ស អំណាចពលរដ្ឋខ្មែរ សរសេរជាអក្សរកាត់គ.អ.ព.ខ ដែលមានទីស្នាក់ការកណ្តាល តាំងនៅផ្ទះលេខ៣ ផ្លូវលេខ២សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។អាស្រ័យដូចបានជម្រាបជូនខាងលើ សូមឯកឧត្តមឧបនាយករដ្ឋមន្ត្រីមេត្តាអនុញ្ញាតឲ្យគណបក្សអំណាចពលរដ្ឋខ្មែរបានបង្កើតដោយក្តីអនុគ្រោះ”។
ទាក់ទង ការស្នើសុំបង្កើតគណបក្សអំណាចពលរដ្ឋខ្មែរនេះនៅមិនទាន់មានការឆ្លើយតបពីលោកឧបនាយករដ្ឋមន្ត្រី ស ខេងរដ្ឋមន្ត្រីក្រសួងមហាផ្ទៃ នៅឡើយទេ។
លោកសួនសេរីរដ្ឋា ដែលកំពុងរស់នៅអាមេរិកជាអ្នកផ្តួចផ្តើមបង្កើតចលនាអំណាចពលរដ្ឋខ្មែរក្នុងបំណងផ្តួលរំលំរដ្ឋាភិបាលកម្ពុជា ដែលដឹកនាំដោយសម្តេចហ៊ុនសែន។ថ្មីៗនេះ តុលាការសាលាដំបូងរាជធានីភ្នំពេញ បានបើកសវនាការកាត់ទោសកំបាំងមុខ ប្រឆាំងលោក សួន សេរីរដ្ឋា ពីបទក្បត់ជាតិ ផងដែរ៕
ដោយ ៖ សូសៀង
រៀបចំដោយៈ ភក្ដី
By: khmeronlinenews.com
http://ift.tt/eA8V8J
