សមត្ថកិច្ចកងរាជអាវុធហត្ថស្រុកបរិបូណ៌ ស្ទាក់ចាប់បានរថយន្ត១គ្រឿង ដឹកឈើម្រះព្រៅភ្នំ២២ដុំ តែម្ចាស់វាមិនបានចាប់ខ្លួនទេ
ខេត្តកំពង់ឆ្នាំង៖ ឈើម្រះព្រៅភ្នំចំនួន២០ដុំធំៗ និងឈើធ្នង់ចំនួន២ដុំធំៗ ដឹកតាមរថយន្តនីសសាន់ មួយគ្រឿងត្រូវបានកងរាជអាវុធហត្ថស្រុកបរិបូណ៌ ស្ទាក់ចាប់បានតាមបញ្ជារបស់ លោកព្រះរាជអាជ្ញាខេត្ត ហើយបានបញ្ជូនមកសាលាដំបូងខេត្តកំពង់ឆ្នាំង។ ការ ស្ទាក់ចាប់រថយន្តខាងលើនេះបានធ្វើឡើងនៅវេលាម៉ោង១០ និង៣០នាទីព្រឹក ថ្ងៃទី២៣ ខែធ្នូ ឆ្នាំ២០១៤ នៅចំណុចផ្ទះខ្មោច ក្នុងភូមិថ្មី ឃុំផ្សារ ស្រុកបរិបូណ៌។
លោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកំពង់ឆ្នាំង បានអោយដឹងថា៖ក្រោយពីបានទទួលព័ត៌មានពីបណ្តាញរបស់សមត្ថកិច្ច លោកបានចាត់តាំងអោយលោក គិត គន្ធា មេបញ្ជារការកងរាជអាវុធហត្ថស្រុកបរិបូណ៌ តាមដានរថយន្តសង្ស័យមួយគ្រឿង ដែលបើកបរមកពីស្រុកភ្នំក្រវាញឆ្ពោះទៅក្រុងភ្នំពេញ។ ក្នុងពេលម៉ោងខាងលើ សមត្ថកិច្ចកងរាជអាវុធហត្ថស្រុក បានធ្វើការស្ទាក់ឆែកឆេររថយន្តខាងលើ ខណៈសមត្ថកិច្ចឃាត់រថយន្តជាប់អ្នកបើកបរក៍បានចុះរត់គេចខ្លួនបាត់ សមត្ថកិច្ចបានពិនិត្យឃើញនៅលើរថយន្តមានឈើម្រះព្រៅភ្នំ និងឈើធ្នង់ធំៗចំនួន២២ដុំ ហើយបានបញ្ជូនរថយន្តនេះមកកាន់សាលាដំបូងខេត្តកំពង់ឆ្នាំង។
នៅរសៀលថ្ងៃទី២៣ ខែធ្នូ ឆ្នាំ២០១៤ លោក ឯក ស៊ុនរស្មី ព្រះរាជអាជ្ញារងបានប្រគ ល់ឈើទាំង២២ដុំខាងលើនេះ និងរថយន្តម៉ាកនីសសាន់ ពណ៌ទឹកប្រាក់ ពាក់ស្លាកលេខធ៤៣០៨ភព២ អោយលោក ហោ តារា នាយផ្នែករដ្ឋបាលព្រៃឈើកំពង់ឆ្នាំងដើម្បីកសាងសំណុំរឿងតាមនីតិវិធីច្បាប់។
ពលរដ្ឋបានឃើញហេតុការណ៍នោះបានមានយោបល់ថា គេដឹងថាសមត្ថកិច្ចធ្លាប់ចាប់បង្ក្រាបជាហូរហែមែន តែមិនដែលឃើញស្រាវជ្រាវចាប់ម្ចាស់យកមកដោះស្រាយតាមផ្លូវច្បាប់នោះទេបានត្រឹមតែចាប់ឡានចាប់ឈើ ដូយ៉ាងករណីខាងលើនេះគេមិនសង្ឃឹកឡើយថាសមត្ថកិច្ច ចាប់ខ្លួនម្ចាស់ឡាន និងឈើនេះយកមកផ្តន្ទាទោសឡើយ បន្ទាប់ពីចាប់និយកទៅគ្រប់គ្រង នឹងស្ងាត់ដូចចោរលួចសេះហើយ៕ ដោយ រិទ្ធិ ជ័យ
