ស្ត្រីម្នាក់ ចាញ់បោកគេទាំងព្រឹក យកមាស៧ជីទៅដូរយកសំណរបានមួយកញ្ចប់
ខេត្តព្រះសីហនុ៖ ស្ត្រីម្នាក់មកទិញម្ហូបនៅផ្សារ បានចាញ់បោកក្រុមទម្លាក់សំណរបំភាន់ដូរយកមាសអស់ចំនួន៧ជីមាស ទាំងព្រឹកនៅក្នុងផ្សារលើក្រុងព្រះសីហនុ ដែលករណីនេះតែងតែកើតឡើងគ្រប់ទិសទី តែស្ត្រីចាញ់បោកគេរូបនេះគាត់ទើបតែជួប។ ហេតុការណ៍នេះបានកើតឡើងវេលាម៉ោង៩ និង៤៩នាទីថ្ងៃទី២៤ ខែធ្នូ ឆ្នាំ២០១៤។
តាមការអះអាងរបស់ស្ត្រីរងគ្រោះ ឈ្មោះ កៅ ចាន់ ធឿន ភេទ ស្រីអាយុ២៥ឆ្នាំ មានទីលំនៅផ្ទះជួលផ្ទះជួល ស្ថិតក្នុងសង្កាត់លេខ៣ ក្រុងព្រះសីហនុ បាននិយាយទាំងសោកស្តាយថា នៅថ្ងៃកើតហេតុ ខណៈពេលមកផ្សារក្រុងព្រះសីហនុ ដើម្បីទិញម្ហូប ក៏ស្រាប់មានមនុស្សស្រីមិនដែលស្គាល់ម្នាក់មកប្រាប់ថា កុំអោយគាត់និយាយ មនុស្ស២នាក់ដែលឈរជិតយើង បានរើសបានកញ្ចប់មាសមួយកញ្ចប់ពីអ្នកមកលក់មាសទិញដី ចាំគាត់សុំពួកគេចែកគ្នា។
ស្ត្រីរងគ្រោះបានបន្តថា៖ បន្ទាប់មកស្ត្រីរូបនោះបានទៅនិយាយជាមួយមនុស្សប្រុសទាំង២នាក់ផ្សេងទៀតដែលអះអាងថាជាអ្នករើសបានកញ្ចប់មាសរួចក៏បបួលចែកគ្នា។ ហើយនៅពេលនោះគាត់បានទាមទារចែកនៅក្នុងផ្សារ តែបែរជាស្ត្រីសង្ស័យបាននិយាយថា៖ មិនអាចចែកគ្នានៅក្នុងផ្សារបាននោះទេចាំយើងទៅចែកគ្នានៅកន្លែងស្ងាត់។
ស្ត្រីរងគ្រោះបានឲ្យដឹងទៀតថា៖ បន្ទាប់មកស្ត្រីសង្ស័យ និងបុរសម្នាក់បានជិះម៉ូតូចេញទៅមុនទៅអោយរូបគាត់ជិះម៉ូតូជាមួយបុរសម្នាក់ទៀតតាមក្រោយ រហូតមកដល់កន្លែងស្ងាត់ចំណុចផ្លូវឡើងវត្តលើ ក្បែរហាងតាផលលើភ្នំស្ថិតក្នុងសង្កាត់លេខ១ ស្ត្រីសង្ស័យបាននិយាយថា ឥឡូវមិនបាច់ចែកគ្នាទេ មាសនៅក្នុងថង់នោះអោយគាត់យកទាំងអស់ តែអោយគាត់ដោះខ្សែរក ខ្សែរដៃ និងជញ្ជៀនមកអោយពួកគេមក កុំនៅយូប្រយ័ត្នម្ចាស់គេមកទាន់។ និយាយបណ្តើរស្ត្រីសង្ស័យបានមកដោះសម្ភារៈក្នុងខ្លួនបណ្តើរ រួចជិះម៉ូតូចេញបាត់ទៅបន្សល់ទុកបុរស់ឌុបគាត់ឃើញដូចនោះគាត់បានអោយបុរសនៅជាមួយគាត់ឌុបរូបគាត់ដេញតាមម៉ូតូស្ត្រីនិងបុរសសង្ស័យ ប៉ុន្តែបុរសដែលឌុបគាត់ជិះដេញតាមបានបន្តិចក៏ឈប់ ហើយនិយាយថា រញ៉េរញ៉ៃណាស់ឈប់ដេញហើយ សូមចុះពីលើម៉ូតូខ្ញុំទៅ រួចក៏ជិះម៉ូតូចេញបាត់ទៅបន្សល់ទុកគាត់កណ្តាលផ្លូវម្នាក់ឯងទាំងការហួសចិត្ត។
ក្រោយកើតហេតុ ស្ត្រីរងគ្រោះបានដាក់ពាក្យបណ្តឹងនៅសង្កាត់លេខ១ក្រុងព្រះសីហនុ ចំណែកជនសង្ស័យទាំង៣នាក់គេចខ្លួនបាត់ដោយសុវត្តិភាពដោយនាំទៅជាមួយមាស៧ជី ប៉ុន្តែសមត្ថកិច្ចកំពុងស៊ើបនិងស្វែងរកចាប់ខ្លួនជនកំហូចទាំងនោះ៕ ដោយ កោះរ៉ុង
