បុរសសតិមិនគ្រប់ រត់ឆ្លងផ្លូវចុះឡើងៗ ត្រូវរថយន្តបុកស្លាប់
ខេត្ដកណ្ដាល ៖ បុរសម្នាក់បានស្លាប់ភ្លាម បន្ទាប់ពីរត់ចូល កណ្ដាលផ្លូវនៅលើផ្លូវជាតិលេខ១ ត្រូវរថយន្ដ បុកចំ ក្បាល បណ្ដាលឲ្យដួលបោកលើថ្នល់កាលពីវេលាម៉ោង៩ និង៣០នាទីព្រឹកថ្ងៃទី២៥ ខែធ្នូ ឆ្នាំ២០១៤ នៅលើកំណាត់ផ្លូវជាតិលេខ១ ចន្លោះគីឡូម៉ែត្រលេខ ៣០-៣១ ភូមិកណ្ដាលក្រោម ឃុំបន្ទាយដែក ស្រុកកៀនស្វាយ ខេត្ដកណ្ដាល ។
ជនរងគ្រោះឈ្មោះ នៅ ខែម ភេទប្រុស អាយុ២៨ឆ្នាំ មានទីលំនៅភូមិក្បាលជ្រោយ ឃុំកំពង់ភ្នំ ស្រុកលើកដែក ខេត្ដកណ្ដាល ។ រថយន្ដបង្កម៉ាកឡិចស៊ីស RX300 ពណ៌ស ពាក់ស្លាកលេខ ភ្នំពេញ 2T-2535 បើកបរដោយឈ្មោះ ហៀប ហាន់ ភេទប្រុស អាយុ៣៥ឆ្នាំ តែនិយាយខ្មែរមិនសូវច្បាស់ មានទីលំនៅ ភូមិដូង សង្កាត់-ខណ្ឌព្រែកព្នៅ ។
តាមប្រជាពលរដ្ឋនៅកន្លែងកើតហេតុបានប្រាប់ថា ជនរងគ្រោះហាក់មានអាការជាមនុស្សមានសតិមិនល្អ ស្លៀកតែខោខ្លីអត់ពាក់អាវដើរទៅដើរមកក្នុងភូមិសាស្ដ្រកើតហេតុប្រមាណ១សប្ដាហ៍ មកហើយ ។ ពេលខ្លះរត់កាត់ផ្លូវជាតិ ហើយពេលខ្លះទៀតត្រូវបានគេចាប់ទាន់ និងពេលខ្លះទៀតអង្គុយនៅកណ្ដាលផ្លូវតែម្ដងធ្វើឲ្យរថយន្ដធ្វើដំណើរឆ្លងកាត់បើកបរគេចគ្រប់ៗគ្នា ។
ប្រភពបន្តថា៖ នៅព្រឹកកើតហេតុ ជនរងគ្រោះបានរត់ឆ្លងផ្លូវពីត្បូងមកជើងគ្រានោះស្រាប់តែមានរថយន្ដឡិច ស៊ីសមួយគ្រឿង បើកក្នុងទិសដៅពីកើតទៅលិចបានបុកចំក្បាលខាងមុខ ឆៀងខាងឆ្វេងបណ្ដាលឲ្យជនរងគ្រោះ ដួលបោកក្បាលលើផ្លូវជាតិស្លាប់ភ្លាម ។ ក្រោយ កើតហេតុអ្នកបើកបររថយន្ដមិនបាន បើករត់នោះទេ គឺឈប់នៅចម្ងាយ៥០០ ម៉ែត្រពីចំណុចបុក ដោយសំអាងថា ករណីនេះគឺកើតឡើងដោយសារជនរង គ្រោះរត់មកចូលរថយន្ដរបស់ខ្លួនឯង។
មានការអះអាងពីក្រុមគ្រួសារជនរងគ្រោះថា៖ ជនរងគ្រោះមិនមែនជាមនុស្សឆ្កូតទេ គឺមានវិបត្ដិផ្លូវចិត្ដ ដោយសារប្រពន្ធរត់ចោល ទើបក្លាយជា មនុស្សបាត់បង់ស្មារតី ។ តែដោយឡែកសមត្ថកិច្ចអះអាងថា ជនរងគ្រោះជាមនុស្សមានសតិមិនប្រក្រតី។
គ្រានោះអ្នកបើកបររថយន្ដត្រូវសមត្ថកិច្ចឃាត់ខ្លួន នៅចម្ងាយ ៥០០ម៉ែត្រ ពីកន្លែងបង្គ្រោះថ្នាក់ ម្ចាស់រថយន្តបានអះអាងថា ករណីនេះគឺកើតឡើង ដោយសារជនរងគ្រោះ រត់ចូលរថយន្ដរបស់ខ្លួន។ តែទោះយ៉ាងណាភាគីខាងរថយន្ដបានព្យាយាមដោះស្រាយបញ្ហាបញ្ចប់ នៅកន្លែងកើតហេតុ ដោយចេញសំណងទៅឲ្យភាគីជនរងគ្រោះ៕
