ស្លាកយីហោកាស៊ីណូកំពុងសោមស៊ីធីទុស្សេឆេះ ភ្ញៀវផ្អើលរត់ចេញសុទ្ធតែខ្មែរ
ខេត្តព្រះសីហនុ៖ ហេតុការណ៍ទុស្សេចរន្តអគ្គិនីនៅលើស្លាកយីហោកាស៊ីណូ << កំពង់សោម ស៊ីធី >> បានបង្កឱ្យមានមានការភ្ញាក់ផ្អើល ដល់បុគ្គលិកក្នុងកាស៊ីណូនាំគ្នាយកបំពង់ឧស្ម័នពន្លត់អគ្គិភ័យមក បាញ់ពន្លត់អស់ប្រមាណជាច្រើនបំពង់ក្នុងរយៈពេល១០នាទី ក៏បានរលត់តែម្តង ពុំមានបណ្តាលឱ្យឆាបឆេះទៅអាគារកាស៊ីណូនោះទេ ។ ហេតុការណ៍នេះកើតឡើងកាលពីវេលាម៉ោង ៦ល្ងាច ថ្ងៃទី១៤ធ្នូ ២០១៤ នៅចំណុច កាស៊ីណូ<< កំពង់សោមស៊ីធី >> នៅតាមបណ្តោយមហាវិថីឯករាជ្យ ក្បែររង្វង់មូលតោពីរ ក្នុងភូមិ៤ សង្កាត់៤ ក្រុង-ខេត្តព្រះសីហនុ ។
យោងតាមប្រភពអ្នកបានឃើញហេតុការណ៍បាននិយាយថា៖ ខណៈពេលប្រជាពលរដ្ឋកំពុងធ្វើដំណើរតាមផ្លូវជាធម្មតា គេបានឮសម្លេងទុស្សេចរន្តអគ្គីសនីនៅលើស្លាកយីហោរបស់កាស៊ីណូ បន្ទាប់មកក៏បានលេចចេញជាអណ្តាតភ្លើងឆេះយ៉ាងសន្ធោរន្ធៅ នៅត្រង់ចំណុចអក្សរ(ស៊ីធី) ខណៈពេលនោះភ្ញៀវជាច្រើនបានរត់ចេញចែកជើងគ្នា ក្នុងពេលនោះដែរគេឃើញបុគ្គលិកកាស៊ីណូជាច្រើនបានយកបំពងពន្លត់អគ្គីភ័យមកបាញ់ពីលើផងពីក្រោមផង ទើបធ្វើភ្លើងរលត់ទៅវិញនៅប៉ុន្មាននាទីក្រោយបន្តិច។
នៅក្នុងហេតុការណ៍ទុស្សេចរន្តអគ្គិសនីនេះផង ដែរគេឃើញរថយន្តពន្លត់អគ្គិភ័យមួយគ្រឿងបានចេញអន្តរាគមន៍ តែមិនបានបាញ់ពន្លត់ទេ ដោយសារតែក្រុមបុគ្គលិកសណ្ឋាគារសហការគ្នាយកបំពង់ឧស្ម័នពន្លត់ អគ្គិភ័យមកបាញ់ពន្លត់ឱ្យរលត់ទៅវិញក្នុងរយៈពេលប្រហែល១០នាទី។ ប៉ុន្តែអ្វីដែលជាការចាប់អារម្មណ៍ខ្លាំងពីមហាជនចោមរោមមើលហេតុការណ៍នោះ គឺក្រុមអ្នកចូលទៅលេងល្បែងនៅក្នុងកាស៊ីណូខាងលើ ដែលមើលទៅសុទ្ធសឹងតែជាជនជាតិខ្មែរ នាំគ្នារត់ចែកជើងគ្នាចេញពីក្នុងកាស៊ីណូទាំងអារម្មណ៍ភ័យស្លន់ស្លោ ដែលគេសង្ស័យ ថាអ្នកលេងល្បែងនៅទីនោះ ខ្មែរសុទ្ធ៕ ដោយ កោះរ៉ុង
