លោកយាយជនជាតិព្រៅទូរគត់ម្នាក់អាយុ១១០ឆ្នាំកំពុងរស់នៅក្នុងស្ថានភាពទីទ័លក្រលំបាកបំផុតនៅស្រុកតាវែង
ខេត្តរតនគិរី៖ លោកយាចាស់ជរាជាងគេម្នាក់អាយុ១១០ឆ្នាំ ជនជាតិព្រៅ មានទីលំនៅសព្វថ្ងៃរស់នៅជាមួយក្មួយប្រុសម្នាក់នៅភូមិតាវែង ឃុំតាវែង ស្រុកតាវែង ខេត្តរតនគិរី។
តាមការអោយដឹងពីលោកអាំង ភឿក អធិការនគរបាលស្រុកបានអោយយកព័ត៌មានដឹងថា លោកយាយចាស់ជរាជាងកេមានឈ្មោះ ញី ផ្លែន អាយុ១១០ឆ្នាំ ជនជាតិព្រៅ មានប្តីបានស្លាប់ចោលទៅតាំងពីជំនាន់ លន់ ណុល មកម្លេះ ហើយមានកូនស្រីម្នាក់មានប្តី ប៉ុន្តែស្លាប់ចោលគាត់។ លោកយាយរស់ នៅដ៏ កំសត់ទីទ័លក្រជាមួយចៅប្រុសម្នាក់មានឈ្មោះ ចាន់ ថា ភេទប្រុស អាយុ៣៥ឆ្នាំ ជនជាតិព្រៅទីលំនៅ សព្វថ្ងៃនៅភូមិ ឃុំខាងលើ។ លោកអធិការបន្តទៀតថា ស្ថានភាពនិងជីវភាពរបស់លោកយាយបច្ចុប្បន្នកំពុងជួបការលំបាកយ៉ាងខ្លាំង ដោយចៅរបស់លោកយាយក៏មានជីវភាពយ៉ាប់យឺនដែរ សព្វថ្ងៃពួកគាត់អាស្រ័យផលលើដំណាំបន្តិបន្តួចក្នុងចំការប៉ុណ្ណោះ ចំណែកដីស្រែកាលពីដើមមានមួយកន្លែង ប៉ុន្តែបច្ចុប្បន្នក្រុមហ៊ុនហ៊ុំព័ទ្ធយកអស់ទៅហើយ ការអាស្រ័យផលដំណាំបន្តិបន្តួចលើចំការ គឺជួបផលលំបាក មិនគ្រប់គ្រាន់នោះឡើយ ដូច្នេះការរស់នៅជីវភាពប្រចាំថ្ងៃ បានព្រឹកខ្វះល្ងាចក្រតោកយ៉ាកគួរសម។
ចំណែកលោកជូង ប្ល៊ៀវ មេភូមិទីរួមស្រុកតាវែង បានអោយដឹងនៅថ្ងៃទី១៤ ខែធ្នូ ឆ្នាំ២០១៤ នេះថាលោកយាយអាយុ១១០ឆ្នាំ ឈ្មោះ ញី ផ្លែន ពិតជាក្រលំបាកប្រាកដមែន ហើយលោកចង់ផ្សព្វផ្សាយដំណឹងទាំងនេះជាយូរមកហើយដែរ ប៉ុន្តែគ្មាឱកាសទាល់តែសោះ មិនដឹងថាផ្សព្វផ្សាយចេញតាមរយៈរបៀបណាទេ? លោកយាយសព្វថ្ងៃរស់នៅអាស្រ័យជាមួយចៅប្រុសម្នាក់ប៉ុណ្ណោះ។ ហើយចៅប្រុសមានផ្ទះសាងសង់ដោយមានទំហំទទឹង២ម៉ែត្រ បណ្តោយ៣ម៉ែត្រ ប្រក់ស្បូវ ជញ្ជាំងប៉ាទាំឫស្សី នៅពេលភ្លៀងធ្លាក់ផ្ទះនេះធ្លុះធ្លាយលិចពីមុខពីក្រោយសឹងតែពុំមានកន្លែងដេកនោះទេ។ ប្រជាពលរដ្ឋដែលជាអ្នកស្រុកភូមិជាមួយលោកយាយតែងនឹងអាណិតអាសូរលោកយាយគ្រប់ៗរូប ប៉ុន្តែខាងអាជ្ញាធរមូលដ្ឋានជាពិសេសលោកម៉ួង ប៉ាង អភិបាលគណៈអភិបាលស្រុកតាវែង បែរជាមើលរំលងទៅវិញ ។
ប្រជាពលរដ្ឋនៅភូមិតាវែង ឃុំតាវែងលើ សំណូមពរដល់សប្បុរសជន មេត្តាជួយដល់ក្រុមគ្រួសារលោកយាយអាយុ១១០ឆ្នាំ ដែលកំពុងជួបការលំបាកទីទ័លក្រជាងគេនៅមានជីវិតនេះផង៕ ដោយ លី វណ្ណៈ
