លោក ភិន យ៉ាន ប្រធានពន្ធនាគារ ខេត្តឧត្តរមានជ័យ និងលោក យ៉េន ឆៃ ល្បីខាងរត់ការឲ្យឈ្មួញរកស៊ីដឹកឈើខុសច្បាប់ ដោយមិនកោតក្រែងច្បាប់ទម្លាប់បន្តិចសោះឡើយ
ខេត្តឧត្តរមានជ័យ ៖ លោក ភិន យ៉ាន ប្រធានពន្ធនាគារ ខេត្តឧត្តរមានជ័យ និងលោក យ៉េន ឆៃ ជាមន្ត្រីល្បីល្បាញបំផុតពាក់ព័ន្ធជំនួញឈើខុសច្បាប់ក្នុងខេត្តនេះ ចេញមុខរត់ការ បង់លុយឲ្យសមត្ថកិច្ចចម្រុះនៅតាមដងផ្លូវ ដោយមិនដែលឃើញ មានសមត្ថកិច្ចផ្នែកណាមួយហ៊ានប៉ះពាល់ដល់ សកម្មភាពដឹកជញ្ជូនឈើខុសច្បាប់ ជាហូរហែរបស់បក្ខពួកគាត់ម្តងណាឡើយ ដោយម្នាក់ៗចាំទទួលប្រាក់យ៉ាងស្រក់ទឹកមាត់ពីលោក ភិន យ៉ាន និងលោក យ៉េន ឆៃ រហូតដល់ជួយមើលផ្លូវ និងសម្រួលឲ្យការដឹកជញ្ជូនឈើនោះទៅដោយរលូន។
ប្រភពមួយបានបង្ហើបឲ្យដឹងថា ចាប់តាំងពីថ្ងៃទី០១ ខែមករា ឆ្នាំ២០១៥ រហូតមកទល់ពេលនេះ លោក ភិន យ៉ាន និងលោក យ៉េន ឆៃ បានរត់ការឲ្យ រថយន្តដឹកឈើអត់ច្បាប់ ចេញពីស្រុកត្រពាំងប្រាសាទ ខេត្តឧត្តរមានជ័យ ចំនួន៨ គ្រឿង សុទ្ធតែរថយន្តយីឌុបខ្នាតយក្ស ដែលមានប្រវែង ១២ម៉ែត្រ ។ ហើយជាក់ ស្តែងនៅវេលាម៉ោង ៥រសៀលថ្ងៃ ទី១៧ ខែមករា ឆ្នាំ២០១៥ គេឃើញរថយន្ត ម៉ាកយីឌុបមួយគ្រឿង ពាក់ស្លាកលេខ កំពង់ចាម 3A- 2759 ដែលបានផ្ទុកឈើពេញប្រៀប ធ្វើដំណើរតាមផ្លូវជាតិលេខ PR ១៧៤ ចេញពីស្រុកត្រពាំងប្រាសាទ ឆ្ពោះទៅខេត្តឧត្តរមានជ័យ បន្តយកទៅ ចែកចាយ នៅខេត្តបន្ទាយមានជ័យ ដោយលោក យ៉េន ឆៃ និងលោក ភិន យ៉ាន អះអាងថា គាត់បានរត់ការ បង់លុយឲ្យ សមត្ថកិច្ច និងមន្ត្រីជំនាញ អស់ហើយ។
បើគិតពីបរិមាណឈើវិញ គឺមិនក្រោមពី ៤០០ម៉ែត្រគូបឡើយ ពីព្រោះក្នុងមួយរថយន្ត អាចផ្ទុកបាន ៥០ម៉ែត្រគូបឡើង ហើយសកម្មភាពទាំងអស់នេះ កើតមានជាច្រើនឆ្នាំមកហើយ មិនដែលឃើញ មន្ត្រីជំនាញរដ្ឋបាលព្រៃឈើ បង្ក្រាបឡើយ។ លោក ភិន យ៉ាន ដែលជាប្រធានពន្ធនាគារ ខេត្តឧត្តមានជ័យ បានឲ្យអ្នកយកព័ត៌មានដឹងថា គេបានឲ្យលោករត់ការផ្នែកសមត្ថកិច្ច ដើម្បីយកលុយ មកកសាងអង្គភាព ហើយចំណែកលោក យ៉េន ឆៃ រត់ការផ្នែក ស្ថាប័នសារព័ត៌មានដើម្បីបញ្ចៀសការផ្សាយពីសកម្មភាពមិនស្របច្បាប់ទាំងនោះ៕
