កម្ពុជា-ថៃព្រមព្រៀង បង្កើតច្រកព្រំដែន អន្តរជាតិ៤និងតំបន់ សេដ្ឋកិច្ចពិសេស២បន្ថែម
Monday 19/01/2015 Time : 07: 40 am
ភ្នំពេញ៖ រដ្ឋមន្ត្រីក្រសួងការបរទេសខ្មែរ លោក ហោ ណាំហុង និងរដ្ឋមន្ត្រីការបរទេសថៃ លោក ថាណាសក្តិ ប៉ាកទីម៉ា ប៉ាកន (Tha nasak Patima pakorn) បានដឹកនាំប្រតិភូទាំងពីរប្រទេស ជួបប្រជុំគណៈកម្មការចម្រុះលើកទី៩ សម្រាប់កិច្ចសហប្រតិបត្តិការទ្វេភាគីនៅខេត្តសៀមរាប កាលពីព្រឹកថ្ងៃសុក្រ ទី១៦ ខែមករា។
កិច្ចប្រជុំនេះ កម្ពុជា និងថៃ បានពិភាក្សាគ្នាលើបញ្ហាជាច្រើនដូចជារឿងពលករខ្មែរដែលទៅធ្វើការខុសច្បាប់នៅប្រទេសថៃ ជាង ៦៦ម៉ឺននាក់ គឺត្រូវចុះបញ្ជីឲ្យមានសិទ្ធិស្របច្បាប់ បញ្ហាតាមរកចាប់ខ្លួនមេខ្យល់ដែលនាំពលករចូលទៅក្នុងទឹកដីថៃ ខុសច្បាប់ បញ្ហាទទួលទិញកសិផលពីកសិករខ្មែរ និងការទាមទារឲ្យទាហានថៃ ឈប់បាញ់សម្លាប់ប្រជាពលរដ្ឋខ្មែរដែលឆ្លងដែនខុសច្បាប់ ព្រមទាំងបញ្ហាជាច្រើនទៀត។
មន្ត្រីក្រសួងការបរទេសកម្ពុជា ឲ្យដឹងថា រដ្ឋាភិបាលខ្មែរ និងថៃ បានស្រុះស្រួលគ្នាដាក់ច្រករបៀងព្រំដែនចំនួន៤ ថែមទៀត ឲ្យក្លាយទៅជាច្រកទ្វារអន្តរជាតិរវាងប្រទេសទាំងពីរនៅពេលខាងមុខ។ ការដំឡើងច្រករបៀងឲ្យក្លាយទៅជាច្រកទ្វារព្រំដែនអន្តរជាតិនេះ គឺដើម្បីសម្រួលដល់ដំណើរចេញចូលរបស់អ្នកទេសចរ និងការដឹកទំនិញនានាឲ្យកាន់តែប្រសើរ។
អ្នកនាំពាក្យក្រសួងការបរទេសកម្ពុជា គឺលោក កុយ គួងមានប្រសាសន៍ក្នុងសន្និសីទកាសែត បន្ទាប់ពីបញ្ចប់កិច្ចប្រជុំនៅឯខេត្តសៀមរាប កាលពីរសៀលថ្ងៃសុក្រ ទី១៦ ខែមករា ថា រដ្ឋាភិបាលកម្ពុជា និងថៃ បានព្រមព្រៀងជាមួយគ្នាដើម្បីឈានទៅរកការដំឡើងច្រករបៀងចំនួន៤ ឲ្យក្លាយទៅជាច្រកទ្វារព្រំដែនអន្តរជាតិថែមទៀត។ ច្រកទាំងបួននោះមានច្រកអានសេះ នៅស្រុកជាំក្សាន្ដ ខេត្តព្រះវិហារ ជាប់នឹងស្រុកណាំយឺន ខេត្តអ៊ូប៊ុនរ៉ាតថានី របស់ថៃ ច្រកភ្នំដី នៅខេត្តបាត់ដំបង ជាប់នឹងខេត្តស្រះកែវ របស់ថៃ ច្រកភ្នំដា ក្នុងខេត្តពោធិ៍សាត់ ជាប់នឹងខេត្តត្រាត របស់ថៃ និងទី៤ គឺច្រកជប់គគីរ ក្នុងស្រុកបន្ទាយអំពិល ខេត្តឧត្តរមានជ័យ ជាប់នឹងស្រុកបាងគ្រួត ខេត្តបុរីរ៉ាំ របស់ថៃ។ ទន្ទឹមការឈានទៅបើកច្រកព្រំដែនអន្តរជាតិ ៤ថែមទៀតនោះ គឺភាគីកម្ពុជា-ថៃ កំពុងជំរុញឲ្យច្រកព្រំដែនអន្តរជាតិឈ្មោះស្ទឹងបត់ ក្នុងខេត្តបន្ទាយមានជ័យ បើកដំណើរការនៅឆ្នាំ២០១៦-២០១៨ ខាងមុខ។
ក្រៅពីរដ្ឋាភិបាលកម្ពុជា-ថៃ ពិភាក្សាគ្នាលើការបើកច្រកព្រំដែននោះ រដ្ឋាភិបាលកម្ពុជា-ថៃ ក៏បានព្រមព្រៀងគ្នាបង្កើតឲ្យមានតំបន់សេដ្ឋកិច្ចពិសេសពីរកន្លែង គឺមួយកន្លែងនៅខេត្តបន្ទាយមានជ័យ ដែលជាប់នឹងខេត្តស្រះកែវ របស់ថៃ និងមួយកន្លែងទៀតនៅខេត្តកោះកុង ដែលជាប់នឹងខេត្តត្រាត របស់ថៃ។ បន្ថែមពីលើការជជែករឿងច្រកព្រំដែនអន្តរជាតិ និងតំបន់សេដ្ឋកិច្ចពិសេសនោះ កម្ពុជា-ថៃ ក៏បង្កើនកិច្ចសហការជាមួយគ្នាក្នុងការប្រឆាំងការជួញដូរមនុស្សឲ្យមានប្រសិទ្ធភាព។
រដ្ឋមន្ត្រីក្រសួងការបរទេសថៃ លោក ថាណាសក្តិ ប៉ាកទីម៉ា ប៉ាកន បានថ្លែងក្នុងកិច្ចប្រជុំថា ប្រទេសថៃ ក៏បានយល់ព្រមប្រគល់វត្ថុបុរាណចំនួន ១៦ដុំថែមទៀត ដែលជារបស់ខ្មែរ មកឲ្យខ្មែរវិញនៅពេលខាងមុខឆាប់ៗ។ ចំណែករឿងបាញ់សម្លាប់ប្រជាពលរដ្ឋខ្មែរដែលឆ្លងដែនខុសច្បាប់នោះ ប្រទេសថៃ សន្យាថានឹងដាក់បម្រាមទៅលើកងកម្លាំងប្រដាប់អាវុធ មិនឲ្យមានការបាញ់ប្រហារទៀតទេ ប្រសិនបើប្រជាពលរដ្ឋខ្មែរណាម្នាក់ឆ្លងដែនខុសច្បាប់ទៅកាប់ឈើ ឬក៏ធ្វើខុសអ្វីផ្សេងទៀត ត្រូវចាប់ខ្លួនទៅផ្ដន្ទាទោសតាមច្បាប់៕
ដោយៈ ករុណា
រៀបចំដោយៈ សុខុម
By: khmeronlinenews.com
http://ift.tt/17XUMNH
