មនុស្សស្លាប់ម្នាក់ របួសធ្ងន់និងស្រាល៥នាក់ រយៈពេលតែមួយម៉ោងដោយសារគ្រោះថ្នាក់ចរាចរណ៍ កើតឡើង២ករណីនៅក្នុងស្រុកបរិបូណ៌
ខេត្តកំពង់ឆ្នាំង៖ មនុស្សម្នាក់បានស្លាប់ និង៥នាក់ទៀតរងរបួសធ្ងន់ និងស្រាល នៅក្នុងគ្រោះថ្នាក់ចរាចរណ៍២ករណីនៅកន្លែងផ្សេងគ្នានៅក្នុងចន្លោះពេលតែមួយម៉ោងប៉ុណ្ណោះ នៅយប់ថ្ងែទី១៦ ខែមករា ឆ្នាំ២០១៤ក្នុងឃុំ២ នៅស្រុកបរិបូណ៌ ខេត្តកំពង់ឆ្នាំង។
សមត្ថកិច្ចនគរបាលស្រុកបរិបូណ៌បានអោយដឹងថា៖ ករណីទី១បានកើតឡើងនៅវេលាម៉ោង៧ និង៣០នាទីយប់នៅលើកំណាត់ផ្លូវជាតិលេខ៥២អា ចំណុចមុខវត្តអណ្តូងរវាង ក្នុងភូមិអញ្ចាញរូង ឃុំអញ្ចាញរូង រវាងម៉ូតូលក់ការ៉េមកីកង់បី និងរថយន្តមិនស្គាល់ម៉ាក ។
ដោយមុនពេលកើតហេតុមានម៉ូតូលក់ការ៉េម កីកង់បីមួយគ្រឿង បើកបរដោយបុរសឈ្មោះ សៀម ថុលអាយុ៣៣ឆ្នាំ មានស្រុកកំណើតនៅខេត្ត កណ្តាល មកស្នាក់នៅភូមិផ្សារ ឃុំផ្សារ ស្រុកបរិបូណ៌ បានបើកតាមបណ្តោយផ្លូវជាតិលេខ៥៣( ជាផ្លូវក្រាលគ្រួសក្រហម) ពីលិចមកកើតស្រាប់ តែមកដល់ ចំណុច កើតហេតុ មានរថយន្តទំនើប៣គ្រឿងមិនស្គាល់ម៉ាក បានបើកមកពីក្រោយក្នុងដំណើរ ស្របទិស គ្នា លុះពេលមកដល់រថយន្តទី១បើកគេចម៉ូតូកង់បីផុតទៅ ចំណែករថយន្តទី២ដោយសារដីហុយ ខ្លាំង ពេក មើលគ្នាមិន ឃើញក៏ទៅបុកម៉ូតូកង់បីបណ្តាលអោយធ្លាក់ចូលប្រឡាយ ចំណែករថយន្តបង្កបានជ្រុលទៅបុកនឹងម៉ូតូម៉ាកឌ្រីមមួយគ្រឿងទៀតដែលមាន មនុស្សជិៈ៣នាក់ រងរបួសស្រាល។
ក្រោយពេលកើតហេតុរថយន្តបង្កមិនបានឈប់ទេគឺបើកគេចមកលើផ្លូវជាតិលេខ៥បាត់ស្រមោលតែម្តង ក្នុងហេតុការណ៏នេះអ្នកបើកម៉ូតូកង់បីលក់ការ៉ែមកីរងរបួសធ្ងន់ និងដាច់ប្រដាប់ភេទទៀតផង ត្រូវបានដឹកមកសង្គ្រោះនៅមន្ទីពេទ្យខេត្តចំណែកអ្នកជិៈម៉ូតូ៣នាក់រងរបួសស្រាល មាន១ឈ្មោះ ផាន់ សុជាតិ អាយុ២២ឆ្នាំ ២.ឈ្មោះ លី ចាន់ អាយុ២៤ ឆ្នាំ និង៣.ឈ្មោះ ហោង វិជ្ជា អាយុ៣៣ឆ្នាំបុរសទាំង៣នាក់មានទីលំនៅភូមិអញ្ចាញរូង។
ករណីទី២ បានកើតឡើងនៅវេលាម៉ោង៨និង៣០នាទីយប់ថ្ងៃដដែល នៅលើផ្លូវលំក្នុងភូមិអូរ ឃុំ ពន្លៃ ខណៈដែលបុរសម្នាក់ឈ្មោះ ស៊ុយ សុខុម អាយុ៣៣ឆ្នាំ មានទីលំនៅភូមិអូរ ឃុំពន្លៃ បានត្រឡប់ពីបើករថយន្តអោយគេវិញ បានជិៈម៉ូតូរបស់ខ្លួនម៉ាកសង់កូរ៉េ គ្មានស្លាកលេខ គ្មានភ្លើង ត្រឡប់មកផ្ទះវិញ ពេលមកដល់ចំណុចកើតហេតុដោយសារគ្មានភ្លើងបំភ្លឺ បានទៅបុកបុរសម្នាក់ឈ្មោះ សៀន សរ អាយុ៦៨ឆ្នាំ កំពុងជិះកង់បណ្តាលអោយរងរបួសស្រាល ចំណែកអ្នកបើកម៉ូតូបានបោកក្បាលទៅថ្នល់ក្រាលគ្រួសក្រហមបណ្តាលអោយរងរបួសធ្ងន់ហើយបានស្លាប់ពេលបញ្ជូនទៅសង្គ្រោះនៅមន្ទីរខេត្ត។
ករណីទាំង២ខាងលើនេះ សមត្ថកិច្ចនគរបាលស្រុកបរិបូណ៌បានយកមធ្យោបាយ ទាំងអស់ទៅរក្សាទុក នៅ អធិការដ្ឋាននគរបាលស្រុកដើម្បីស្រាវជ្រាវដោះស្រាយការតាមនិតិវិធីច្បាប់៕ ដោយ រិទ្ធិ ជ័យ
