បក្ខពួកជនល្មើសនេសាទ បាចលិខិតអនាមឹក បង្ខូចឈ្មោះលោកព្រះរាជអាជ្ញាអមសាលាដំបូងខេត្ត២នាក់
ខេត្តកំពង់ឆ្នាំង៖ លិខិតអនាមឹករាប់រយសន្លឹក ត្រូវបានគេដើរបាចទាំងយប់នៅក្នុងស្ថាប័នមួយចំនួនទាំងយប់ ក្នុងក្រុងកំពង់ឆ្នាំង ដែលបានសរសេរចោទប្រកាន់ថា«លោកព្រះរាជអាជ្ញា យូ ទិត្យវឌ្ឍនៈ និងលោក ឯក ស៊ុនរស្មី បានរួមគ្នាចុះយកលុយតាមទូកបទល្មើស ក្នុងមួយទូក៥លានរៀល»។ ហេតុការណ៍នេះបានកើតឡើងនៅយប់ថ្ងៃ ទី០៧ មករា ឆ្នាំ២០១៥ នៅចំណុច៨កន្លែង ក្នុងក្រុងកំពង់ឆ្នាំង។
លោកអធិការរងនគរបាលក្រុងកំពង់ឆ្នាំងបានអោយដឹងថា៖ សមត្ថកិច្ចបានរកឃើញលិខិតអនាមឹកនេះនៅ ៨ចំណុចគឺ មុខក្លោងទ្វារសាលាដំបូងខេត្ត២កន្លែង មុខសាលាខេត្តកំពង់ឆ្នាំង៤កន្លែង មុខអធិការដ្ឋាននគរបាលក្រុង១កន្លែង និងសួនច្បារនាងកង្រីមុខមន្ទីរពេទ្យខេត្ត១កន្លែង។ លិខិតអនាមឹកដែលសមត្ថកិច្ចប្រមូលបានមានរាប់រយសន្លឹកដែលសមត្ថកិច្ចបានពិនិត្យ និងសន្និដ្ឋានថា មានមនុស្ស៣នាក់ដែលបានសរសេរលើលិខិតនេះអក្សរនៅក្នុងលិខិតទាំងអស់នេះមាន៣ប្រភេទដែលសរសេរដោយដៃ មិនមែនជាលិខិតថតចម្លងឡើយ។
ទាក់ទងនឹងខិលិតអនាមឹកខាងលើនេះត្រូវបានគេសង្ស័យថា៖ ជាទង្វើរបស់ក្រុមជនល្មើសនេសាទ ក្រុមអ្នកនៅក្រោយខ្នងជនល្មើសនេសាទ និងមន្ត្រីខិលខូចមួយចំនួនដែលកាងបទល្មើសនេសាទ ព្រោះថាកន្លងមកនៅក្នុងតំបន់អភិរក្សពូជត្រីឃុំកំពង់ព្រះគគីរ ត្រូវបានអ្នកកាសែតមួយក្រុមរិះគន់ជាបន្តបន្ទាប់យ៉ាងខ្លាំងក្លា អំពីបទ ល្មើសការកាប់បំផ្លាញព្រៃលិចទឹក ការដាក់សម្រាស់ ការដាក់របាំងលបសាច់អួនរហូតដល់រាប់ពាន់ម៉ែត្រ រហូតមានអ្នកនៅពីក្រោយខ្នងនៃបទល្មើសញុះញង់អោយគេប្តឹងអ្នកកាសែត២នាក់ទាំងបំពានទៀតផង ខណៈនៅក្នុង តំបន់អភិរក្សឃុំកំពង់ព្រះគគីរមានបទល្មើសរាប់រយករណីដែលគ្មានអ្នកណាធ្វើការបង្ក្រាបឡើយ។
ក្រោយពីក្រុមសារព័ព៌មានបានចុះផ្សាយបង្ហាញបទល្មើសជាបន្តបន្ទាប់រួចមក លោក ឯក ស៊ុនរស្មី ព្រះរាជអាជ្ញារង ដោយបានការឯកភាពពីលោក យូ ទិត្យវឌ្ឍនៈ ព្រះរាជអាជ្ញាសាលាដំបូងខេត្តកំពង់ឆ្នាំង បានដឹកនាំ សមត្ថកិច្ច និងប្រជានេសាទស្ម័គចិត្តក្នុងសហគមន៍ចុះឆ្មក់បង្ក្រាបបទល្មើសនេសាទ និងកាប់បំផ្លាញឧបករណ៍នេសាទនៅក្នុងតំបន់អភិរក្សជាបន្តបន្ទាប់។ ជាក់ស្តែងពេលចុងក្រោយនៅវេលាម៉ោង១និង១៥នាទីយប់ថ្ងៃ ទី០២ ខែមករា ឆ្នាំ២០១៥ កន្លងមកនេះ លោក ឯក ស៊ុន រស្មី បានដឹកនាំកំលាំងប្រជានេសាទស្ម័គចិត្ត និងសមត្ថកិច្ចចរាចរណ៍ជើងទឹក ចុះព័ទ្ធចាប់បានទូករុញជនធុនធំ២គ្រឿង និងជនល្មើសជនជាតិវៀតណាមចំនួន១២នាក់ នៅចំណុចកោះកញ្ឆា និងចុងតាគង់ ស្ថិតក្នុងតំបន់អភិរក្សឃុំកំពង់ព្រះគគីរ ស្រុកបរិបូណ៌។ ករណីនេះ ម្ចាស់កាណូត ឈ្មោះ ចាំង យ៉ាំងជ្រីវ អាយុ៤៥ឆ្នាំ និងឈ្មោះ ង្វៀង យ៉ាំងលី អាយុ៥១ឆ្នាំ រស់នៅក្នុងភូមិចុងកោះ សង្កាត់ ផ្សារឆ្នាំង ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ឯកម្មករ១០នាក់ បាន ដោះលែង។
នៅព្រឹកថ្ងៃទី០៨ ខែមករា ឆ្នាំ២០១៥នេះ លោក ឯក ស៊ុនរស្មី ព្រះរាជអាជ្ញារង បានអោយដឹងថា៖មេក្លោងជនល្មើស២នាក់ខាងលើនេះ ត្រូវបានចោទប្រកាន់ និងឃុំខ្លួននៅក្នុងពន្ធនាគាខេត្តកាលពីថ្ងៃទី០៤ មករា ឆ្នាំ២០១៥ ដែលពួកគេត្រូវប្រឈមមុខនឹងការផ្តន្ទាទោសដាក់គុក ពី១ឆ្នាំទៅ៣ឆ្នាំ ពិន័យជា ប្រាក់ពី១លាន ទៅ៥លានរៀល និងត្រូវរឹបអូសឧបករណ៍ល្មើសច្បាប់ជាសម្បត្តិរដ្ឋ។
ព្រោះតែករណីចុះលបឆ្មក់បង្ក្រាបបទល្មើសនេសាទជាបន្តបន្ទាប់ នៅក្នុងតំបន់អភិរក្សឃុំកំពង់ព្រះគគីរនេះ និងធ្វើអោយខូចខាតដល់ផលប្រយោជន៍របស់ក្រុមជនល្មើស ទើបក្រុមជនល្មើស និងអ្នកនៅពី ក្រោយ ខ្នងជនល្មើសខាងលើនេះ បានប្រឌិតរឿងធ្វើលិខិតអនាមឹកសំអុយឈ្មោះលោកព្រះរាជអាជ្ញាទាំង២ខាងលើ មិនខុសពីការញុះញង់អោយគេប្តឹងអ្នកកាសែតទាំង២នាក់ខាងលើនោះដែរ ក្នុងបំណងធ្វើអោយខូចកិត្តិយស និងបំបាក់ស្មារតីដល់ស្ថាប័នអយ្យការ និងអ្នកសារព័ត៌មាន ដើម្បីតែផលប្រយោជន៍ក្រុមពួកគេដែលកំពុងតែរារាំងបង្ក្រាបជាបន្តបន្ទាប់ពីលោកព្រះរាជអាជ្ញាទាំង២នាក់ដែលកំពុងតែជម្រុញសមត្ថកិច្ចជំនាញបង្ក្រាបដូចភ្លៀងរលឹម៕ ដោយ រិទ្ធិ ជ័យ
