បន្ទាប់ពីមេព្រៃចាប់រថយន្តដឹកឈើលើសច្បាប់២គ្រឿងម្ចាស់ឈើបានអំពាវនាវឲ្យមេព្រៃមានការអនុវត្តចាប់ជាទូទៅ ព្រោះឧកញ៉ា (ទ្រី ភាព, លឹម ប៊ុណ្ណា, សឹង សំអុល…) សុទ្ធតែដឹកលើសច្បាប់មិនដែលបង្ក្រាប
ខេត្តក្រចេះ៖ មន្ត្រីជំនាញរដ្ឋបាលព្រៃឈើចាប់ឃាត់រថយន្តយីឌុបចំនួន ពីរគ្រឿង ពីគោលដៅចំនួនពីរផ្សេងគ្នាកាលពីវេលាម៉ោង១១ព្រឹកថ្ងៃទី៧ ខែមករា ឆ្នាំ២០១៥ បន្ទាប់ពីទទួលពត៌មានថារថយន្តទាំង២មានផ្ទុកឈើខុសពីច្បាប់អនុញ្ញាត។ ករណីនេះគេសង្ស័យថា ឈ្មួញសាកល្បងលោតឆ័ត្រ ដោយមិនបង់លាភសក្ការៈសែនព្រេនបិទបាំង ទើបខ្មោចព្រៃភ្នំធ្វើទុក្ខរាយការណ៍ឲ្យជំនាញចុះចាប់ទាំងថ្ងៃយ៉ាងតក់ក្រហល់។ តែចំពោះឧកញ៉ា (ទ្រី ភាព, លឹម ប៊ុណ្ណា, សឹង សំអុល…) ដឹកលើសម៉ាសេរី គេមិនដែលឃើញ សមត្ថកិច្ចជំនាញបង្ក្រាបទេ ទំនងទទួលសំណែនបាំងភ្នែកជិតអស់ទៅហើយ។
រថយន្តយីឌុប២គ្រឿងដែលមានផ្ទុកឈើអារប្រភេទលេខ២ពេញព្រៀបត្រូវបានមន្ត្រីជំនាញរដ្ឋបាលព្រៃឈើថ្មគ្រែឃាត់ឆែក កាលពីវេលាម៉ោង១១ព្រឹកថ្ងៃទី៧ ខែ មករា នៅលើកំណាត់ផ្លូវជាតិលេខ៧ ត្រង់ចំណុចភូមិកាប៉ូ សង្កាត់អូរឫស្សី ក្រុងក្រចេះ និងមួយគ្រឿងទៀតត្រូវបានមន្ត្រីសង្កាត់រដ្ឋបាលព្រៃឈើស្វាយជ្រះ ឃាត់បាននៅចំណុចភ្នំព្រិច ក្រោមការដឹកនាំសម្របសម្រួលពីលោក ហាក់ ហ៊ន ព្រះរាជអាជ្ញារងអមសាលាដំបូងខេត្តក្រចេះ ក្នុងនោះសមត្ថកិច្ចជំនាញរកឃើញមានភាពមិនប្រក្រតី ដោយរថយន្តទាំងពីដឹកផ្ទុកឈើលើសពីច្បាប់អនុញ្ញាត។
រថយន្តយីឌុបទាំង២គ្រឿងនេះ បានដឹកជញ្ជូនឈើចេញពីក្រុមហ៊ុន ដីព្រៃសម្បទាន(ជេស៊ីហ្វីកភើលយ៉ញស្តុកខមភេនីលីមីតធីត) ដែលមានទីតាំងនៅក្នុងស្រុកកោះញែក ខេត្តមណ្ឌលគិរី ដោយមានលិខិតអនុញ្ញាតដឹកជញ្ជូនផលអនុផលព្រៃឈើ ចេញដោយលោក ឈួន សេរីវឌ្ឍនៈ នាយផ្នែករដ្ឋបាលព្រៃឈើកោះញែក ដែលនៅក្នុងលិខិតនោះក្នុងមួយរថយន្តមានចំនួនត្រឹមតែ ១៨ ម៉ែត្រគូបតែប៉ុណ្ណោះ តែជាក់ស្តែងរថយន្តទាំង២ បើតាមការប៉ាន់ស្មានរបស់មន្ត្រីជំនាញអាចផ្ទុកឈើក្នុងចន្លោះពី២៥ទៅ ៣៥ ម៉ែត្រគូប ដែលករណីនេះមានការលើកឡើងថា លោក ឈួន សេរីវឌ្ឍនៈ ជាអ្នកដើមចម ដោយរួមដៃឃុបឃិត ជាថ្នូរនឹងលាភសក្ការៈ ដែលថ្នាក់លើរបស់ជំនាញរដ្ឋបាលព្រៃឈើគួរស៊ើបអង្កេតលុបបំបាត់អំពើពុករលួយនេះ។
ការចាប់ឃាត់រថយន្តយីឌុបដឹកឈើខាងលើ ត្រូវបានបែកការបន្ទាប់ពីរថយន្តមួយ គ្រឿងបានខូចនៅ ចំណុចក្បែរហាងបាយ ហេងធំ ស្ថិតក្នុងឃុំគោលាប់ ស្រុកចិត្របុរី ហើយ ប្រភពពីសមត្ថកិច្ចបានអោយ រថយន្តនេះ មានផ្ទុកលើសច្បាប់អនុញ្ញាត ខណៈគេ បានរាយការណ៍ទៅមន្ត្រីជំនាញ លោក ប៊ួយ រតនា នាយផ្នែករដ្ឋបាលព្រៃឈើក្រចេះ ដើម្បីត្រួតពិនិត្យ តែលោកឆ្លើយថាគ្មាន កម្លាំងធ្វើការទេ ។ គេមិនដឹងថា លោក ប៊ួយ រតនា បានទទួលសំណែនពីឈ្មួញដឹកឈើនេះឬយ៉ាងណានោះទេទើបគាត់មិនចេញចាប់ ហើយបានធ្វើឲ្យមានការរិះគន់ថា មន្ត្រីយ៉ាងដូច លោក ប៊ួយ រតនា ពិតជាស៊ីបាយរដ្ឋហិនអស់អង្កររាស្ត្រមែន!។
ក្រោយមកគេរាយការណ៍ទៅ លោក ម៉ី វុទ្ឋី នាយសង្កាត់រដ្ឋបាលព្រៃឈើថ្មរគ្រែ ទើប បាន ចុះតាមឃាត់រថយន្តបានមួយគ្រឿង និងមួយគ្រឿងទៀតសង្កាត់ស្វាយជ្រះឃាត់ ជាបន្តបន្ទាប់នៅឃុំស្វាយជ្រះ ។
បុរស់ម្នាក់បើករថយន្ត ឡង់គ្រីសរ័ទំនងជាថៅកែឈើបាន និយាយថា រថយន្តរបស់គាត់ ដឹកចេញពេលថ្ងៃ មានច្បាប់អនុញ្ញាត ត្រឹមត្រូវ ខុសត្រង់ថាដាក់លើសច្បាប់បន្តិចបន្ទួចនេះគ្រាន់នឹងដោះស្រាយសមត្ថកិច្ចតាមផ្លូវ ព្រោះគាត់បានរត់ការជាមួយមេព្រៃ និងសមត្ថកិច្ចពាក់ជាច្រើនហើយ ក្នុងលោកបញ្ជាក់ទៀតថា បើសមត្ថកិច្ចចង់ចាប់ គឺគ្រប់រថយន្តដឹកឈើទាំងអស់ ក្នុងមួយយប់ៗរាប់សឹបគ្រឿង គឺបានដាក់ឈើលើសច្បាប់ច្រើនជាងរថយន្តរបស់គាត់ ទៅទៀត ហើយខ្លះទៀតគ្មានទាំងច្បាប់ផងគេអាចទៅបាន។ ម្ចាស់ឈើបានសុំអោយសមត្ថកិច្ចអនុវត្តបែបនេះជាមួយ រថយន្តដឹកជញ្ជូនឈើរបស់ក្រុមឧកញ៉ាទ្រី ភាព, ឧកញ៉ាលឹម ប៊ុនណ្ណា ហៅខ្នា, ឧកញ៉ា សឹង សំអុល…។ល។ ដែលកំពុងដឹកជញ្ជូនលើសច្បាប់អនុញ្ញាត និងគ្មានច្បាប់យ៉ាងកក្រើកផ្លូវនៅភូមិភាគឥឦានក្នុងមួយយប់ៗគ្មានអ្នកណាហ៊ានធ្វើអ៊ីផង ។
លោក ម៉ី វុទ្ធី នាយសង្កាត់រដ្ឋបាលព្រៃឈើថ្មគ្រែបានឲ្យដឹងថា រថយន្តយីឌុបនេះពិតជាមានច្បាប់អនុញ្ញាតដឹកជញ្ជូនផលអនុផលព្រៃឈើចេញពីខេត្តរតនៈគិរីប្រាកដមែន តែច្បាប់នោះគឺជំនាញបានអនុញ្ញាតឲ្យដឹកត្រឹមតែ១៨ ម៉ែត្រគូបប៉ុណ្ណោះ តែក្រុមឈ្មួញទាំងនេះបានដាក់ឈើលើសច្បាប់ជាច្រើនម៉ែត្រគូប។
មន្ត្រីជំនាញមិនដឹងពីចំនួនឈើដែលផ្ទុកនៅរថយន្តទាំង២នៅឡើយទេ ដោយ កម្លាំង កំពុងរើឈើដើម្បីវាស់ ដោយរថយន្តមួយគ្រឿងនាំទៅរក្សារទុកនៅ ស្នាក់ការ បណ្តុះកូនឈើខ្សារ និងមួយគ្រឿងទៀតរក្សាទុកនៅសង្កាត់រដ្ឋបាលព្រៃឈើស្វាយជ្រះ ហើយបើតាមការប៉ាន់ស្មាន ជំហានដំបូង រថយន្តយីឌុបនេះអាចផ្ទុកឈើ ក្នុង ចន្លោះពី២៥ទៅ ៣៥ ម៉ែត្រគូប ៕ ព្រាបស
