ខ្ចីដីសាលាសង្កាត់ធ្វើដេប៉ូលក់ឈើ១៤ឆ្នាំ ពេលអាជ្ញាធរសាលាសង្កាត់ទារយកដី មកសាង់សាលាសង្កាត់វិញ មិនព្រមអោយទេ ថែមទាំងប្តឹងចៅសង្កាត់វិញទៀត ពិតជាធ្វើគុណបានទោសមែន
ខេត្តកំពង់ឆ្នាំង៖ លោកស្រីចៅសង្កាត់ផ្សារឆ្នាំង ក្រុងកំពង់ឆ្នាំង បានសំរេចដាក់ពាក្យបណ្តឹងទៅតុលាការខេត្ត ប្តឹងលោក សុខ សុភា ជាអាជីវករលក់ឈើក្នុងដេប៉ូមួយ ដែលបានធ្វើលិខិតខ្ចីដីសាលាសង្កាត់ យកសង់ ដេប៉ូលក់ឈើរយះពេល១៤ឆ្នាំ ហើយ ពេលសាលាសង្កាត់សុំយកដីនោះ មកសាងសង់សាលាសង្កាត់វិញ ដែលគេបានធ្វើ កិច្ចសន្យាជាមួយអាជ្ញាធរសង្កាត់ថាចេញ តែរយះពេល១១ឆ្នាំហើយនៅតែមិនព្រមចេញដដែល មិនតែប៉ុណ្ណោះ ពេលនេះបែរជាប្តឹង លោកស្រីចៅសង្កាត់វិញថាជាអ្នកផ្តល់សក្ខីកម្មក្លែងក្លាយទៅវិញ ពិតជាធ្វើគុណ បានទោស មែន។
នៅព្រឹកថ្ងៃទី០២ ខែមករា ឆ្នាំ២០១៥ លោកស្រី ភុន ឈុយអេង ចៅសង្កាត់ផ្សារឆ្នាំង ក្រុងកំពង់ឆ្នាំង បាន និយាយនិងផ្តល់ឯកសារពាក់ពន្ធ័រឿងខាងលើនេះអោយអ្នកយកព័ត៌មានយើងដឹងថា៖ នៅក្នុងឯសារកាល ពីថ្ងៃ ទី០៣ ខែកក្តដា ឆ្នាំ២០០០ លោក សុខ សុភា ជាអ្នកលក់ឈើ រស់នៅភូមិត្រពាំងបី ឃុំផ្សារឆ្នាំង បានធ្វើខិខិតសុំខ្ចី ដីមួយកន្លែងរបស់សាលាឃុំកំពង់ឆ្នាំងពីលោក មេឃុំ ឈ្មោះ លឹម ខុង នៅខាងជើងជាប់ និងសាលាសង្កាត់ បច្ចុប្បន្ន ក្នុងភូមិសំរោង មានទំហំ២៥មគុណនិង២០ម ដើម្បីសាងសង់ដេប៉ូលក់ឈើជាបណ្តោះអាសន្ន ដោយ សន្យា ថាពេលឃុំត្រូវការដីនេះវិញត្រូវជូនដំណឹងមួយខែមុន លោកនិងប្រគល់ដីនេះជូនឃុំវិញ ដោយគ្មានតវ៉ា អ្វីទាំងអស់។
លុះដល់ថ្ងៃទី០៦ ខែសីហា ឆ្នាំ២០០៣ អាជ្ញាធរឃុំបានហៅ លោក សុខ សុភា មកប្រជុំសំណូមពរអោយ លោក សុខ សុភា ប្រគល់ដេប៉ូលក់ឈើមកវិញនៅថ្ងៃទី៣០ ខែធ្នូ ឆ្នាំ២០០៣ ដើម្បីសាងសង់សាលាឃុំនៅឆ្នាំ២០ ០៤ នៅពេលនេះលោក សុខ សុភា ក៏បានផ្តិតមេដៃឯកភាពលើកិច្ចសន្យាក្នុងកំណត់ហេតុប្រជុំផងដែរ ប៉ុន្តែដល់ ថ្ងៃសន្យាលោក សុខ សុភា នៅតែមិនព្រមចេញដដែលរហូតមកដល់ពេលនេះ។
នៅថ្ងៃទី២៥ ខែកក្តដា ឆ្នាំ២០១៤ កិច្ចប្រជុំដោះស្រាយរឿងនេះនៅសាលាក្រុងកំពង់ឆ្នាំងម្តងទៀត ក្រោម ការដឹកនាំរបស់លោក ហៃ មនោរម្យ អភិបាលក្រុងកំពង់ឆ្នាំង នៅពេលនោះ លោក សុខ សុភា បាននិយាយថា៖ ដីសាងសង់ស្តង់ឈើនេះ ជាដីសហគមន៍ដេប៉ូឈើតាំងពីឆ្នាំ១៩៨៣មកម្លេះ ដែលមានលោក កែវ លន់ ជាប្រធាន តែលោកស្លាប់បាត់ហើយ ដីសហគមន៍ដេប៉ូឈើនេះពុំមានឯកសារអ្វីទេតែចាស់បន្សល់ទុកអោយក្មេងជំនាន់ក្រោយតៗមក គឺដីនេះលោកមិនប្រគល់អោយសាលាសង្កាត់វិញឡើយ ចំណែកកំណត់ហេតុធ្វើនៅថ្ងៃទី០៦ ខែសីហា ឆ្នាំ២០០៣ មិនច្បាស់ទេព្រោះកាលនោះលោកមិនទាន់បានដឹងពីបញ្ហានេះ។
លោក ហៃ មនោរម្យ ប្រធាអង្គប្រជុំបានលើកឡើងថា៖ការសង់ដេប៉ូលក់ឈើរបស់លោក សុខ សុភា ពិតជានៅ លើដីរបស់សាលាសង្កាត់ ដែលមានលិតខិតខ្ចី និងកិច្ចសន្យាត្រឹមត្រូវ មិនមែនជាដីឯកជននោះ ឡើយ។ បើម្ចាស់ ដេប៉ូលក់ឈើរូបនេះ មិនប្រគល់ដីនេះឲ្យសាលាសង្កាត់វិញទេអាជ្ញាធរនិងដាក់ពាក្យ ប្តឹងទៅតុលាការដើម្បី ចាត់ការ តាមផ្លូវច្បាប់ហើយ។
នៅក្នុងពាក្យបណ្តឹងដាក់ជូនលោកប្រធានសាលាដំបូងខេត្តកំពង់ឆ្នាំង ចុះថ្ងៃទី០៥ ខែធ្នូ ឆ្នាំ២០១៤ លោកស្រី ភុន ឈួយអេង ចៅសង្កាត់ផ្សារឆ្នាំង បានប្តឹងលោក សុខ សុភា សុំសិទ្ធគ្រប់គ្រងដីទំហំ២៥មគុណ២០ម ដែលជាដី របស់ សាលាសង្កាត់ផ្សារឆ្នាំងវិញ និងប្តឹងសុំទាមទារសំណងថ្លៃខាតបង់ពេលវេលាចំនួន៥ពាន់ដុល្លារ ផងដែរ។
លោកស្រី ភុន ឈួយអេងបានអោយដឹងទៀតថា៖ទាក់ទងនិងការប្តឹងផ្តល់រឿងដីនេះ លោកស្រីបានទទួល ដីកាកោះ២ច្បាប់ពីសាលាដំបូងខេត្តកំពង់ឆ្នាំងគឺ ដីកាទី១ចុះថ្ងៃទី២៤ ខែធ្នូ ឆ្នាំ២០១៤ លោក ឯក ស៊ុនរស្មី ព្រះរាជ អាជ្ញារង បានកោះហៅអោយលោកស្រីចូលខ្លួននៅម៉ោង៨ព្រឹកថ្ងៃទី០៥ ខែមករា ឆ្នាំ២០១៥ ដើម្បីបំភ្លឺពីបទផ្តល់ សក្ខី កម្មក្លែងក្លាយ ដែលលោក សុខ សុភា ប្តឹងចោទវិញ (ពិតជាធ្វើបុណ្យបានទោសទៅវិញ)។ដីកាកោះ ទី២ចុះថ្ងៃ ទី២៥ ខែធ្នូ ឆ្នាំ២០១៤ របស់លោកស្រី គឹម លុយ អនុប្រធានសាលាដំបូងខេត្ត អោយលោកស្រីចៅសង្កាត់ចូលខ្លួ ននៅថ្ងៃទី០៦ ខែមករា ឆ្នាំ២០១៥ ដើម្បីបំភ្លឺទាញហេតុផលរឿងសុំសិទ្ធគ្រប់គ្រងដី និងសុំទាមទារសំណងថ្លៃខាត បង់ ពេល វេលាពីលោកសុខ សុភា។ប្រជាពលរដ្ឋ អាជ្ញាធរក្រុងនិងខេត្ត រង់ចាំមើលថាតើរឿងក្តីខាងលើនេះ លោកតុលាការខេត្តនិងផ្តល់យុត្តិធម៌យ៉ាងណាដែរទៅសុំរង់ចាំតាមដាន!!៕ ដោយ រិទ្ធិ ជ័យ
