កូនខ្មែរតូចៗ៩នាក់ ចេះជក់គ្រឿងញៀន តែប៉ូលិសទើបចាប់ខ្លួន
ខេត្តកណ្តាល ៖ កូនក្មេងជនជាតិខ្មែរ៩នាក់ កំពុងសំងំជក់ថ្នាំញៀនក្នុងបន្ទប់ផ្ទះជួល ត្រូវសមត្ថកិច្ចក្រុងតាខ្មៅ ព័ទ្ធចាប់ឃាត់ខ្លួនបានកាលពីវេលាម៉ោង១៤ និង៣០នាទី ថ្ងៃទី៦ ខែកុម្ភៈ ឆ្នាំ២០១៥ ស្ថិតក្នុងភូមិដើមគ សង្កាត់ដើមមៀន ក្រុងតាខ្មៅ ខេត្តកណ្តាល។ សមត្ថកិច្ចបានធ្វើការដកហូត ឧបករណ៍សម្រាប់ជក់គ្រឿងញៀនមួយចំនួន តែពុំបានដកហូតថ្នាំញៀនឡើយ ព្រោះក្រុមក្មេងតូចៗទាំងនោះ ជក់អស់ទៅហើយ ។ ស្ត្រីម្ចាស់ ផ្ទះឈ្មោះ សុខ ហ៊ួយ អាយុ៤៧ឆ្នាំ នៅភូមិដើមគរ សង្កាត់ដើមមៀន ក្រុងតាខ្មៅ មុខរបរ បោកគក់ខោអាវ។
សមត្ថកិច្ចបានបានឲ្យដឹងថា៖ ក្រុមក្មេងទាំង៩នាក់មាន ទី១-ឈ្មោះ ឡេង សេងហួ ភេទប្រុស អាយុ១៤ឆ្នាំ មុខរបរ បុគ្គលិកក្លឹបបា សាក់ផាលេស ទី២-ឈ្មោះ សំអាត សុខសោភា ភេទប្រុស អាយុ១៧ឆ្នាំ មុខរបរ សិស្សទី១០ នៃវិទ្យាល័យហ៊ុនសែនចាក់ អង្រែ ទី៣-ឈ្មោះ សំអាត សោភ័ណ្ឌ ភេទប្រុស អាយុ១៤ឆ្នាំ មុខរបរ នៅផ្ទះ ទី៤-ឈ្មោះ គុជ ប៉ាក់ស័រ ភេទប្រុស អាយុ១៧ឆ្នាំ មុខរបរ សិស្សទី១១នៃវិទ្យាល័យហ៊ុនសែនចាក់អង្រែ ទី៥-ឈ្មោះ តុង លី ភេទប្រុស អាយុ១៧ឆ្នាំ សិស្សទី១១នៃវិទ្យាល័យហ៊ុនសែនចាក់អង្រែ ទី៦-ឈ្មោះ ហេង ទីសិច ភេទប្រុស អាយុ១៧ឆ្នាំ សិស្សទី១១នៃវិទ្យាល័យហ៊ុនសែនចាក់អង្រែ ទី៧- ឈ្មោះ ធី ប៊ុនឈូ ភេទប្រុស អាយុ២០ឆ្នាំ មុខរបរ កម្មករសំណង់ ។ (យុវជនទាំង៧នាក់ ខាងលើនេះបច្ចុប្បន្នស្នាក់នៅបន្ទប់ផ្ទះជួលចំណុចចាប់ខ្លួនខាងលើ) ទី៨-ឈ្មោះសុំ ផាន់ណា ភេទស្រី អាយុ១៤ឆ្នាំ មុខរបរ នៅផ្ទះ រស់នៅភូមិព្រែហូរលិច១ សង្កាត់ព្រែកហូរ ក្រុងតាខ្មៅ និងទី៩-ឈ្មោះ អេម ប្រាសា្នរីតា ភេទស្រី អាយុ១៧ឆ្នាំ មុខរបរ នៅផ្ទះ រស់នៅភូមិអំពៅព្រៃ ឃុំអំពៅព្រៃ ស្រុកកណ្តាលស្ទឹង ខេត្តកណ្តាល ។
លោកស័ក្តិ២ ស៊ឹម ប៊ុតបណ្ឌិត អធិការនគរបាលក្រុងតាខ្មៅបានឲ្យដឹងថា នៅមុនពេល បង្ក្រាបសមត្ថកិច្ចជំនាញបានធ្វើ ការស្រាវជ្រាវ និងពិនិត្យមើលសកម្មភាពរបស់ក្រុមជនសង្ស័យ។ បន្ទាប់មកកម្លាំង សមត្ថកិច្ចក្រុងតាខ្មៅ សហការជាមួយ នគរបាលប៉ុស្តិ៍រដ្ឋបាលដើមមៀន ចុះធ្វើការ ព័ទ្ធចាប់ជនសង្ស័យដល់ក្នុងបន្ទប់ផ្ទះជួល ឆែកឆេររកឃើញមាន ឧបករណ៍សម្រាប់សេពគ្រឿងញៀនមួយចំនួន ដែលក្រុមជនសង្ស័យទើបប្រើប្រាស់ហើយថ្មីៗ ។ ដោយឡែកសមត្ថកិច្ច ពុំបានធ្វើការដកហូតថ្នាំញៀនទេ ពោលគឺក្រុមជនសង្ស័យបាននាំគ្នាប្រើប្រាស់អស់បាត់ទៅហើយ ។
ក្រោយឃាត់ខ្លួនយុវវ័យទាំង៩ នាក់សមត្ថកិច្ចបាន បញ្ជូនខ្លួនទៅកាន់អធិការដ្ឋាន នគរ បាលក្រុងតាខ្មៅ ដើម្បីធ្វើការសាកសួរ តែមិនទាន់ច្បាស់ថាត្រូវបញ្ជូនទៅតុលាការឬក៍ធ្វើការអប់រំនោះទេ រងចាំការសម្រេចពីលោកស្នងការនគរបាលខេត្តកណ្តាល និងពីស្ថាប័នអយ្យការអម សាលាដំបូងខេត្តសម្រេច ព្រោះជនទាំង៩នាក់អាច និយាយបានថា ជាជនរងគ្រោះដោយ សារថ្នាំញៀន ៕
