ឪពុកម្ដាយឧកញ៉ា ថោង សារ៉ាត់ ត្រូវតុលាការអនុញ្ញាតឲ្យនៅក្រៅឃុំ បណ្ដោះអាសន្ន
ភ្នំពេញ៖ បន្ទាប់ពីសាលាដំបូងរាជធានីភ្នំពេញ បើកសវនកាសាកសួរបពា្ចប់កាលពីកាលពីថ្ងៃទី៥ ខែកុម្ភៈ ឆ្នាំ២០១៥ ហើយនៅព្រលប់ថ្ងៃទី៦ ខែកុម្ភៈ ឆ្នាំ ២០១៥នេះ ចៅក្រមស៊ើបសួរលោក លី សុខលេង សម្រេច និងអនុញ្ញាតឲ្យថោង ចំរើន ភេទប្រុស អាយុ៦៣ឆ្នាំ និងឈ្មោះ កែវ សារី ភេទស្រី អាយុ៥៥ឆ្នាំ ដែល ត្រូវជាឪពុកម្ដាយ ឧកញ៉ា ថោង សារ៉ាត់ នៅក្រៅឃុំបណ្ដោះអាសន្ន បន្ទាប់ពីបើកការស៊ើបអងេ្កតចប់សព្វគ្រប់ក្នុងបទជាប់ចោទ«កាន់កាប់អាវុធដោយគ្មានការអនុញ្ញាត» តាមបញ្ញត្តិមាត្រា៤៩០ នៃក្រមព្រហ្មទណ្ឌ ប្រការនេះបានធ្វើឲ្យជនជាប់ចោទទាំងពីធូរស្បើយមួយគ្រា។
សូមរំលឹកថា លោក ថោង ចំរើន និង អ្នកស្រី កែវ សារី ត្រូវបានសមត្ថកិច្ច នគរបាលព្រហ្មទណ្ឌកម្រិតធ្ងន់នៃស្នងការ ដ្ឋាននគរបាលរាជធានីភ្នំពេញ ឃាត់ខ្លួន កាលពីថ្ងៃទី៤ ខែធ្នូ ឆ្នាំ២០១៤ នៅលំនៅដ្ឋានរបស់គាត់ ស្ថិតនៅសង្កាត់ចាក់ អង្រែលើ ខណ្ឌមានជ័យ រាជធានីភ្នំពេញ ជាមួយនឹងកូនប្រុសរួមទាំងកូនប្រសា ដែលត្រូវជាភរិយាឧកញ៉ា ថោង សារ៉ាត់ ជាមួយសន្ដិសុខជាច្រើននាក់ទៀត។ ប៉ុន្ដែក្រោយពីចៅក្រមស៊ើបសួរ សាលាដំបូងរាជធានីភ្នំពេញ លោក លី សុខលេង បើកការស៊ើបសួរទៅលើជន ត្រូវចោទចប់សព្វគ្រប់ ក៏បានសម្រេច អនុញ្ញាតឲ្យនៅក្រៅឃុំបណ្ដោះអាសន្ន ។
ប្រភពបានឲ្យដឹងថា នៅព្រលប់់ថ្ងៃទី៦ ខែកុម្ភៈ ឆ្នាំ ២០១៥ ចៅក្រមស៊ើបសួរលោក លី សុខលេង បានចេញដីកាលេខ៤២៧ត.ព្រ ចុះថ្ងៃទី៦ ខែកុម្ភៈ ឆ្នាំ២០១៥ បង្គាប់ឲ្យដោះលែងជនត្រូវចោទ ថោង ចំរើន និងដីកា លេខ៤២៤ ត.ព្រ ចុះថ្ងៃទី៦ ខែកុម្ភៈ ឆ្នាំ ២០១៥ បង្គាប់ឲ្យដោះលែងជនត្រូវចោទ កែវ សារី ដែលត្រូវជាឪពុកម្ដាយ ឧកញ៉ា ថោង សារ៉ាត់ ដោយយោងតាមដីកាសម្រេច ដាក់ជនត្រូវចោទស្ថិតក្រោមការត្រួត ពិនិត្យតាមផ្លូវតុលាការលេខ១៨៩៦ត.ព្រ ចុះថ្ងៃទី៦ ខែកុម្ភៈ ឆ្នាំ២០១៥ ដីកាសម្រេចដោះលែងឲ្យនៅក្រៅឃុំលេខ ៤២៤ត.ព្រនិងដីកាបង្គាប់ឲ្យដោះលែង ។
នៅព្រលប់ថ្ងៃដដែលនេះផងដែរ សាច់ញាតិនិងក្រុមគ្រួសាររបស់ជនត្រូវ ចោទ ថោង ចំរើន កែវ សារី ដែល ត្រូវជាឪពុកម្ដាយឧកញ៉ា ថោង សារ៉ាត់ ជាច្រើននាក់បាននាំគ្នាទៅទទួលជនត្រូវ ចោទនៅមណ្ឌលកែប្រែម១ និងម២ ដើម្បីនាំមកកាន់គេហដ្ឋានវិញ ក៏ប៉ុន្តែសម្រាប់ ឧកញ៉ា ថោង សារ៉ាត់ កំពុងស្ថិតនៅក្រោមការតាមចាប់ខ្លួន ពីនគរបាល នៅឡើយ៕
