ត្រាក់ទ័រវៀតណាម ចេញចូលមកដឹកឈើប្រណីត លើទឹកដីខ្មែរតាមច្រករបៀងប៉ុស្តិ៍៥ តាមអំពើចិត្ត ដោយមេការ លោក ហ៊ុន ជា កាងពីក្រោយ និងមានការឃុបឃិតពីលោកមេប៉ុស្តិ៍
ខេត្តមណ្ឌលគិរី៖ ត្រាក់ទ័រវៀតណាម ច្រើនសិបគ្រឿងឆ្លង់ដែនចូលដីខ្មែរ ត្រង់ចំណុចអូរដៃព្រះ ស្ថិតក្នុងស្រុកពេជ្រាដា ខេត្តមណ្ឌលគិរី ត្រូវបានកម្លាំងសមត្ថកិច្ចជំនាញចាប់បាន៥គ្រឿង នឹងជនជាតិវៀតណាម៤នាក់ កាលថ្ងៃទី៧ គុម្ភៈ ឆ្នាំ២០១៥ ហើយច្រើនគ្រឿងទៀតកំពុងលាក់ក្នុងព្រៃជ្រៅ ជំនាញកំពុងរុករកតែមិនទាន់មានតម្រុយនៅឡើយ។ តែគេដឹងថា ត្រាក់ទ័រទាំងនោះ បានចូលមកដឹកឈើក្នុងទឹកដីខ្មែរ ដោយមានមេការ លោក ហ៊ុន ជា ជាខ្នងបង្អែកសម្រួលចេញចូលគ្រប់បែបយ៉ាង។
ករណីការនាំគ្រឿងចក្របរទេសចូលដឹកឈើខុសច្បាប់ ត្រូវបានប្រជាសហគមន៍រាយការណ៍ថា កើតមានច្រើនឆ្នាំមកហើយនៅ ស្រុកពេជ្រាដា តែការបង្ក្រាប់របស់អាជ្ញាធរ ហាក់បីដូចនៅមានកម្រឹត ពីព្រោះក្រុមឈ្មួញខ្មែររកស៊ីឈើ ភាគច្រើនជាមន្ត្រីមានសមត្ថកិច្ច និងមានខ្នងបង្អែកធំៗទៅពីភ្នំពេញ កន្លងមកគ្មានមន្ត្រីជំនាញហ៊ានចាប់ ឬបង្ក្រាបនោះទេព្រោះខ្លាចអំណាចអ្នកការបទល្មើសនោះ។
បើតាមប្រភពបានឲ្យដឹងថា មានអ្នកមានអំណាចម្នាក់ចេញមុខទៅកាងឲ្យជនជាតិ វៀតណាម យកអាត្រាក់ទ័រចំនួនជាង៣០គ្រឿង ចូលមកទឹកដីខ្មែរតាមច្រករបៀង ឈ្មោះប៉ុស្តិ៍៥ ស្ថិតក្នុង ទឹកដីស្រុកពេជ្រាដា មកកាប់និងដឹកជញ្ជូនឈើប្រណីតប្រភេទសុក្រំ និង កកោះដែលឡាំងជាជ្រុងមានប្រវែង ២ទៅ៥ម៉ែត្រ ដើម្បីដឹកចេញទៅប្រទេសវៀតណាម។ នៅល្ងាចថ្ងៃទី៧កុម្ភៈ នេះអ្នកយក ព័ត៌មានយើងមិនអាចទំនាក់ទំនងសុំការភ្លឺពីលោកនាយប៉ុស្តិ៍៥ដែល ជាច្រករបៀងនោះបានទេ ដើម្បីបញ្ជាក់ ការចូលត្រាក់ទ័រទាំងនោះ បាន អនុញាត ឬយ៉ាងណា។
លោកកែវ សុភ័ក្រ នាយរងផ្នែករដ្ឋបាលព្រៃឈើកោះញែក ដែលគ្រប់គ្រងដែនព្រៃការពារបានឲ្យដឹងថា ការចុះបង្រា្កបនេះជំនាញសហការជាមួយ សមត្ថកិច្ចនគរបាលរួមនឹងព្រះរាជអាជ្ញារង មួយរូបផងដែរ។ ការចុះបង្ក្រាបសមត្ថកិច្ចបានចាប់បានត្រាក់ទ័រចំនួន៥គ្រឿង និងឃាត់ខ្លួន ជនជាតិវៀតណាមបានប្រាំនាក់ផងដែរ ។ លោកបានបន្តថា ត្រាក់ទ័រដឹកឈើល្មើសច្បាប់ រួមនិងមនុស្សនោះ សមត្ថកិច្ចនិងជំនាញរដ្ឋបាលព្រៃឈើកំពុង អូសនិងដឹកជញ្ជូនយកមករក្សាទុកនៅខណ្ឌរដ្ឋបាល ព្រៃឈើដើម្បីកសាងសំណុំរឿងចាត់ការតាមនិតិវិធីច្បាប់ ៕ ដោយ ផ្កាច័ន្ទ
