ស្រវឹងធ្លាក់ភ្នែក បើករថយន្តស៊េរីទំនើប បោះពួយលឿនគ្រប់គ្រងលែងបាន ជ្រុលទៅបុករះតូប ក្នុងផ្សារពាណិជ្ជកម្ម ទៅមុខលែងរួច បើកទ្វាររថយន្តដាក់មេផាយគេចខ្លួនបាត់
ខេត្តព្រះសីហនុ៖ រថយន្តស៊េរីទំនើប១គ្រឿងបានបោះពួយលឿនគ្រប់គ្រងលែងបាន ទំនងជាអ្នកបើកបរទាំងស្រវឹង បានជ្រុលទៅបុកតូបតូចៗនៅក្នុងផ្សារពាណិជ្ជកម្ម បណ្តាលឲ្យខូចខាត់អស់ចំនួន១០តូប តែជាសំណាងណាស់មិនបណ្តាលឲ្យមានមនុស្សគ្រោះថ្នាក់រងរបួសនោះទេ ។ ភ្លាមៗនោះអ្នកបើកបររថយន្តបានបើកទ្វាររថយន្ត ដាក់មេផាយគេចខ្លួនបាត់ស្រមោល ។ហេតុការណ៍នេះបានកើតឡើងនៅវេលាម៉ោង៣ទៀបភ្លឺ ឈានចូលថ្ងៃទី១៣ ខែកុម្ភៈ ឆ្នាំ២០១៥ ក្នុងភូមិ៣ សង្កាត់លេខ២ ក្រុងព្រះសីហនុ ។
យោងតាមសមត្ថកិច្ចចរាចរណ៍បានបញ្ជាក់ថា គ្រោះថ្នាក់ចរាចរណ៍នេះ បង្កឡើងដោយ សារតែអ្នកបើកបរមានសារជាតិស្រវឹង ហើយបើកបរហួសល្បឿនកំណត់ នៅពេលមកដល់ចំណុចកើតហេតុ (ផ្សារពាណិជ្ជកម្ម) ដែលជាចំណុចផ្លូវកោង អ្នកបើកបរពុំបានបត់នោះទេ ទើបបានបុកខឿនផ្លោងចូលក្នុងផ្សារ បុករះគ្រែ និងតូបអស់ប្រមាណជិត១០តូប ប៉ើងទាំងត្រីដែលអាជីវករទុកលក់ព្រឹកឡើងរាយប៉ាយ តែសំណាងល្អពុំមានមនុស្សណាម្នាក់រងគ្រោះថ្នាក់នោះទេ។ រថយន្តបង្កមានម៉ាក តូយូតាហាយព្រិតពណ៌ស្ករ ពាក់ស្លាកលេខ ភ្នំពេញ 2Q ៣៤១៥ បើកបរដោយយុវជនម្នាក់អាយុប្រហែល២០ឆ្នាំជាង រត់គេចខ្លួនក្រោយកើតហេតុ ទុកអោយមិត្តភក្តិស្រវឹងដូចគ្នាមកហាមប៉ូលិស និង អ្នកការសែតកុំឲ្យមកប៉ះពាល់រថយន្តរបស់ពួកគេ។
ដោយឡែកយោងតាមប្រភពសន្តិសុខយាមផ្សារបានអោយដឹងថា នៅវេលាកើតហេតុខណៈពេលពួកគាត់កំពុងល្បាតផ្សារ និង សន្តិសុខខ្លះទៀត កំពុងសំរាកនៅក្បែនោះ ស្រាប់តែមានរថយន្តមួយគ្រឿងជិះគ្នា២នាក់ បើកបរក្នុងទិសដៅពីកើតទៅលិច (ពីសួនច្បារអតីតៈមហោស្របមកសំដៅផ្សារពាណិជ្ជកម្ម) ក្នុងល្បឿនដូចហោះ បានមកចូលក្នុងផ្សារទាំងកំរោល បង្កអោយមានការភ្ញាក់ផ្អើលយ៉ាងខ្លាំងទាំងកណ្តាលយប់។ ក្រោយបុករួចគេបានឃើញ យុវជនចំនួន២នាក់បើកទ្វារថយន្តចេញមកក្រៅរថយន្តក្នុងស្ថានភាពស្រវឹងជោគជាំ បន្ទាប់មកក៏បានដើរចេញបាត់ទៅ បន្សល់ទុករថយន្តនៅកន្លែងកើតហេតុ។
ក្រោយកើតហេតុ រថយន្តត្រូវបានសមត្ថកិច្ចស្ទូចយកទៅរក្សាទុកនៅការិយាល័យចរាចរណ៍ផ្លូវគោកខេត្តរងចាំការដោះស្រាយការខូចខាតជាមួយម្ចាស់ផ្សារ និង ម្ចាស់តូប។
គួបញ្ជាក់ផងដែរថា បន្ទាប់អ្នក់បើកបរគេចខ្លួនបានមួយសន្ទុះគេសង្កេតឃើញយុវជន២នាក់ ស្រវឹងជោគជាំដូចគ្នាបានមកស្រែកឡូឡាមិនអោយអ្នកឈមើល រួមជាមួយអ្នកសារព័ត៌មានថតយករូបភាព មិនត្រឹមតែប៉ុណ្ណោះថែមស្រែកគំរាមសមត្ថកិច្ចថា មិនបាច់យកទៅទេ បើយកទៅក៏មិនលើសពី១ថ្ងៃគេនឹងយកចេញវិញហើយ បើមិនបានគេកោសក់មួយចំហៀង ព្រោះពួកគេជាខ្សែរអ្នកធំ សមត្ថកិច្ចមិនអាចធ្វើអ្វីគេបានទេ៕ ដោយកោះត្រល់
