ក្រសួងពាណិជ្ជកម្ម ជំរុញឲ្យក្រុមហ៊ុន ប្រេងឥន្ធនៈបញ្ចុះថ្លៃប្រេងសាំង តែក្រុមហ៊ុនប្រេងខ្លះនៅពិចារណានៅឡើយ
ភ្នំពេញ៖ ទោះបីជាតម្លៃលក់ប្រេងសាំងបច្ចុប្បន្ន ឋិតនៅក្រោម ៤ពាន់រៀលក៏ដោយ តែក្រសួងពាណិជ្ជកម្មកម្ពុជា នៅតែបន្តស្នើឲ្យក្រុមហ៊ុនប្រេងឥន្ធនៈទាំងអស់ ស្វែងរកលទ្ធភាពបញ្ចុះតម្លៃបន្ថែមទៀត ស្របតាមតម្លៃប្រេងឆៅអន្តរជាតិធ្លាក់ថ្លៃយ៉ាងគំហុក។
បច្ចុប្បន្ន ការស្នើសុំរបស់រដ្ឋាភិបាល គឺជារឿងល្អសម្រាប់ប្រជាពលរដ្ឋ ប៉ុន្តែអ្នកវិភាគសេដ្ឋកិច្ចវិញ បានស្នើឲ្យរដ្ឋាភិបាលកុំឲ្យលូកដៃចូលកិច្ចការផ្ទៃក្នុងរបស់ក្រុមហ៊ុនឯកជនខ្លាំងពេក ដើម្បីជៀសវាងបរាជ័យទីផ្សារ។
កិច្ចប្រជុំចុងក្រោយរវាងក្រសួងពាណិជ្ជកម្ម និងក្រុមហ៊ុនប្រេងឥន្ធនៈ ដែលទើបបញ្ចប់នៅថ្ងៃទី៣១ មករា បានកំណត់ឲ្យក្រុមហ៊ុនផ្គត់ផ្គង់ប្រេងឥន្ធនៈទាំងអស់ បញ្ចុះតម្លៃលក់របស់ខ្លួនបន្ថែមទៀត។
លទ្ធផលនៃកិច្ចប្រជុំដែលមានតំណាងក្រុមហ៊ុនប្រេងឥន្ធនៈចូលរួមចំនួន ៨ក្រុមហ៊ុននោះ ភាគច្រើនមិនបានឆ្លើយតបទៅតាមការស្នើសុំរបស់ក្រសួងពាណិជ្ជកម្ម ភ្លាមនោះទេ គឺមានតែក្រុមហ៊ុនពីរប៉ុណ្ណោះ ដែលទំនងស្និទ្ធនឹងរដ្ឋាភិបាលកម្ពុជា គឺក្រុមហ៊ុនកម្ពុជាតេលា និងសូគីម៉ិច បានប្រកាសបញ្ចុះតម្លៃលក់ប្រេងសាំងរបស់ខ្លួនបន្ថែមទៀត គិតត្រឹមថ្ងៃទី១ កុម្ភៈ ក្នុងចន្លោះតម្លៃ ៣.៨០០រៀល ទៅ ៣.៩០០រៀលក្នុងមួយលីត្រ។ ចំណែកក្រុមហ៊ុនប្រេងឥន្ធនៈផ្សេងទៀតអះអាងថា នឹងពិភាក្សាជាមួយថ្នាក់ដឹកនាំសិន មុននឹងបញ្ចុះតម្លៃលក់ប្រេងសាំង ដែលទំនងចោទប្រកាន់រដ្ឋាភិបាលថាលូកដៃចូលកិច្ចការផ្ទៃក្នុងរបស់ក្រុមហ៊ុនឯកជន ស្របពេលដែលកម្ពុជា ប្រកាន់យករបបសេដ្ឋកិច្ចទីផ្សារសេរី។
អ្នកនាំពាក្យក្រសួងពាណិជ្ជកម្ម លោក កែន រដ្ឋា បានឲ្យដឹងថា កិច្ចប្រជុំរវាងក្រុមហ៊ុនប្រេងឥន្ធនៈនេះ គឺជាការពិភាក្សាគ្នាស្វែងរកលទ្ធភាពបញ្ចុះថ្លៃ មិនមែនជាការដាក់កំហិតរបស់ក្រសួង ថាត្រូវតែបញ្ចុះតម្លៃនោះទេ។ កិច្ចប្រជុំនោះ គឺធ្វើឡើងរៀងរាល់ ១០ថ្ងៃម្ដង ដោយឈរលើមូលដ្ឋានតម្លៃប្រេងឆៅនៅលើទីផ្សារអន្តរជាតិ។
ទោះជាយ៉ាងណាក៏ដោយ បញ្ហានេះ អ្នកសេដ្ឋកិច្ចយល់ឃើញថា ការសម្របសម្រួលរវាងក្រសួងពាណិជ្ជកម្ម និងក្រុមហ៊ុនប្រេងឥន្ធនៈ គឺជារឿងត្រឹមត្រូវ ដើម្បីកុំឲ្យក្រុមហ៊ុនប្រេងឥន្ធនៈទាំងអស់រួមគ្នាផ្ដាច់មុខ នៅពេលដែលតម្លៃនៅលើទីផ្សារអន្តរជាតិធ្លាក់ថ្លៃ។ ប៉ុន្តែការដែលរដ្ឋាភិបាលលូកដៃចូលកិច្ចការផ្ទៃក្នុងរបស់ក្រុមហ៊ុនប្រេងឥន្ធនៈខ្លាំងពេក នឹងធ្វើឲ្យទីផ្សារប្រេងឥន្ធនៈបរាជ័យ។
ទោះជាយ៉ាងណាក៏ដោយ បញ្ហានេះ រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល បានស្នើឲ្យក្រុមហ៊ុនប្រេងឥន្ធនៈដែលប្រកាសបញ្ចុះថ្លៃរួចហើយនោះ ត្រូវតែធានាគុណភាព និងបរិមាណលក់ឲ្យបានត្រឹមត្រូវ៕
http://ift.tt/1yrV85m
