គ្រូបង្រៀនម្នាក់ផឹកស្រាស្រវឹង បង្ករឿងជេរប្រមាថ ត្រូវគេព្រួតវាយ និងកាប់ក្បាល២កាំបិតប៉័ងតោរបួសធ្ងន់ដង្ហើមចង្រិត
ខេត្ដកណ្ដាល ៖ នៅក្នុងជម្លោះជេរប្រមាថឈានដល់ផ្ទុហិង្សា បុរសជាជនសង្ស័យ ៤នាក់ ត្រូវជាឪពុកកូន និងកូនប្រសា បានព្រួត គ្នាវាយ ដោយមានទាំងកាំបិតប៉័ងតោ កាប់ប្រហារ ទៅលើភាគីម្ខាងទៀតជា ដែលត្រូវជាប្អូនថ្លៃក្នុងសភាពស្រវឹង បណ្ដាលឲ្យ រងរបួសក្បាលជាទម្ងន់កាលពីវេលាម៉ោង ១០និង១០ នាទីយប់ ថ្ងៃទី១១ ខែកុម្ភៈ ឆ្នាំ២០១៥ នៅភូមិស្លាបតាឱន ឃុំគគីរ ស្រុកកៀន ស្វាយ ខេត្ដកណ្ដាល ប៉ុន្តែក្រោយពីកើតហេតុជនជនសង្ស័យ ៣ត្រូវសមត្ថកិច្ចឃាត់ខ្លួន និងម្នាក់ទៀតរត់គេចខ្លួន។
សមត្ថកិច្ចឲ្យដឹងថា៖ ជនរងគ្រោះ ឈ្មោះ ចាន់ សុខដា ភេទប្រុស អាយុ ៣៣ឆ្នាំ មុខរបរជាគ្រូបង្រៀន និងត្រូវជាប្អូនថ្លៃរបស់គ្រួសារជនសង្ស័យ។ ចំណែកជនសង្ស័យទាំង ៣នាក់ ក្នុងចំណោម ៤ នាក់ ត្រូវបានសមត្ថកិច្ចឃាត់ខ្លួន ១-ឈ្មោះ តូ ធឹម ភេទប្រុស អាយុ ៤៥ឆ្នាំ មុខរបរជាគ្រូបង្រៀន និងត្រូវជាបងថ្លៃ ជនរងគ្រោះ ២-ឈ្មោះ ខៃ សារាម ភេទ ប្រុស អាយុ ៣២ឆ្នាំ ជាបុគ្គលិកធនាគារ អេស៊ីលីដា ៣-ឈ្មោះ តូ ប៊ុនណា ភេទ ប្រុស អាយុ ១៥ឆ្នាំ ជាសិស្សថ្នាក់ទី១០ វិទ្យាល័យជ័យវរ្ម័នទី៧ និងម្នាក់ទៀត ដែលរត់គេចខ្លួន មានឈ្មោះ តូ ចាន់រិទី្ធ ភេទប្រុស អាយុ ២៤ឆ្នាំ មុខរបរលក់ដូរ។
សាក្សីបានឲ្យដឹងថា៖ ក្រុមគ្រួសារជនរងគ្រោះ បានផឹកស៊ីសប្បាយ ជាមួយមិត្ដភក្តិរហូតដល់ស្រវឹង ហើយក៏នឹកឃើញរឿងចាស់ ពាក់ព័ន្ធទៅនឹងដីកេរ្តិ៍ ហើយជនរងគ្រោះ បានប្រើពាក្យសម្ដីមិនសមរម្យ ទៅលើក្រុមគ្រួសារជនសង្ស័យ ធើ្វឲ្យភាគីជនសង្ស័យ ទ្រាំមិនបាន ក៏តបតពាក្យសម្ដីវិញ រហូតក្លាយជាអំពើហិង្សា ហើយជនរងគ្រោះ បានទាញស្នួរហាលខោអាវ វាយទៅលើក្រុមជនសង្ស័យ ។ ភ្លាមនោះអំពើហិង្សាបានផ្ទុះឡើង ដោយក្រុមជនសង្ស័យ ទាំងបួនអ្នកព្រួតគ្នាវាយ ដោយម្នាក់ស្ទុះយកកាំបិតប៉័ងតោ កាប់ប្រហារមកលើ ជនរងគ្រោះចំក្បាល និងក ដួលសន្លប់ក្នុងថ្លុកឈាម នៅផ្លូវចូលមុខផ្ទះរបស់ខ្លួន ត្រូវបានសាច់ញាតិ ដឹកយកមកសង្គ្រោះ នៅមន្ទីរពេទ្យកាល់ម៉ែត។
ជនសង្ស័យឈ្មោះ តួ ធឹម ដែលត្រូវសមត្ថកិច្ចឃាត់ខ្លួន បានឲ្យដឹងថា ជនរងគ្រោះត្រូវជាប្អូនថ្លៃ ហើយករណីកាប់ប្រហារនេះ គឺដោយសារតែ ជនរងគ្រោះផឹកស៊ីស្រវឹង ហើយមករករឿងជេរដៀមដាម និងទាញដំបង វាយមកលើគាត់ ទើបគាត់ចេញមកអន្ដរាគមន៍ ទាញកាំបិតកាប់ប្រហារ បណ្តាលឲ្យរងរបួសតែម្តង៕
