ពលរដ្ឋថា៖ អាជ្ញាធរ និងសមត្ថកិច្ចជំនាញស្រុកអូររាំងជួយសម្រួល និងបើកផ្លូវឲ្យឈ្មួញដឹកឈើប្រណីតល្មើសច្បាប់យ៉ាងអនាធិបតេយ្យឆ្លងកាត់១ថ្ងៃយ៉ាងតិច៦០ឡានទៅកាន់ទីផ្សារងងឹតវៀតណាម
ខេត្តមណ្ឌលគិរី៖ អាជ្ញាធរស្រុកអូររាំងបានចាត់វិធានការបោសសំអាតសមត្ថកិច្ចមកពីក្រៅមូលដ្ឋាន ដាក់រថយន្តសំកុកទាំងយប់ទាំងថ្ងៃតាមផ្លូវ ចាំបន្លាច ឈ្មួញដឹកឈើគ្មានច្បាប់យកលុយ ដែលពួកឈ្មួញបានដឹកចេញពីក្រុមរការ ភូមិពូហ្យាម ឃុំ សែនមនោរម្យ ស្រុកអូររាំង។ ករណីនេះក្រុមអ្នកតាមដានរឿងនោះបានចាត់ទុកថាជាការបង្កភាពងាយស្រួលឲ្យពួកឈ្មួញដឹកឈើកាន់តែមានភាពរលូនយ៉ាងប្រសើរជាងមុន និងមិនចង់ឲ្យមានការរំខានកាក់ឡានពួកឈ្មួញឈើ។ ជាក់ស្ដែងកាលពីថ្ងៃទី១៩ ខែកុម្ភៈឆ្នាំ២០១៥ កន្លងទៅនេះ មូលដ្ឋានអាវុធហត្ថស្រុកអូររាំង ឃាត់ខ្លួនមន្ត្រីយោធាបានម្នាក់បញ្ជូនទៅ ទីបញ្ជាការអាវុធហត្ថខេត្តមណ្ឌលគិរី ។
ប្រជាសហគមន៍ជនជាតិដើមភាគតិចនៅស្រុកអូររាំង បានឲ្យដឹងថា សកម្មភាពដឹកឈើប្រណីតចេញពីទីរួមស្រុកអូររាំងនាពេលបច្ចុប្បន្នកំពុងតែមានសកម្មភាពផុលផុស និងយ៉ាងរលូន ដោយមួយថ្ងៃៗមានរថយន្តដឹកឈើខុសច្បាប់ មិនតិចជាង៥០ ទៅ៦០គ្រឿងនោះឡើយ ដោយអាជ្ញាធរនិងសមត្ថកិច្ចស្រុកនេះ មិនត្រឹមតែមិនចាត់វិធានការចាប់បង្ក្រាបក្រុមឈ្មួញដឹកឈើខុសច្បាប់នោះទេ ផ្ទុយទៅវិញសមត្ថកិច្ច គ្រប់ជំនាញក្នុងស្រុកអូររាំងទាំងមូលកំពុងចែកជើងគ្នា ជិះរថយន្តដើរមើលផ្លូវអោយឈ្មួញ ខ្លាចមានសមត្ថកិច្ចក្រៅមូលដ្ឋានរំខានការដឹកឈើរបស់ក្រុមអ្នករកស៊ីឈើខុសច្បាប់ទៅវិញ ។
សេចក្តីរាយការណ៍បានបន្តថា ស្រុកអូររាំង មិនមែនកើតមានតែបទល្មើសព្រៃឈើតែពេលយប់នោះទេ សូម្បីតែ កណ្ដាលថ្ងៃចែសក៏មានរថយន្តដឹកឈើប្រណីតខុសច្បាប់ឆ្លង់កាត់ មូលដ្ឋានហើយសមត្ថកិច្ចគ្រប់ជំនាញក្នុងស្រុកអូររាំង មិនមានការទប់ស្កាត់ ឬបង្ក្រាបម្តងណាឡើយ។ ពាក់ព័ន្ធនឹងករណីនេះ ក្រុមឈ្មួញបានបោះសំដីចំអកឲ្យប្រជាសហគមន៍ថា ចង់មួយថ្ងៃដឹក១០ ទៅ២០ ជើងក៏បានដែរអោយតែមានឈើដឹក និងធ្វើទៅទាន់ រឿងចាប់គ្មានទេ ព្រោះពួកគេបានរត់ការបង់ក្បាលឡានបើកផ្លូវអស់ហើយ ។
ជុំវិញព័ត៌មានខាងលើ នាយផ្នែករដ្ឋបាលព្រៃឈើអូររាំង មិនអាចសុំការបំភ្លឺបានទេនៅថ្ងៃនេះ។ អភិបាល ស្រុកអូររាំង លោក នង ទុនរី បានឲ្យដឹងថា លោកចាត់វិធានការចំពោះតែសមត្ថកិច្ចណាដែលគ្មានលិខិតបេសកកម្មត្រឹមត្រូវនោះទេ ចំពោះព័ត៌មានថាមានរថយន្តដឹកឈើឆ្លងកាត់មូលដ្ឋាន សមត្ថកិច្ចគ្រប់ជំនាញក្នុងស្រុកអូររាំងនោះ លោកមិនបានដឹងទេ មកមើលខ្លួនឯងទៅ ៕ ដោយ ឦសាន២
http://ift.tt/1N8JZjL
