យីឌុបបើកបុកឡានវីហ្គោក្រឡាប់ជាច្រើនត្រឡប់ មនុស្ស២នាក់ស្លាប់ ដោយកុមារីដាច់ក្បាលពីដងខ្លួន និង៥នាក់របួស
ខេត្តឧត្តរមានជ័យ ៖ គ្រោះថ្នាក់ចរាចរណ៍ដ៏សែនរន្ធត់បានឆក់យកជីវិតមនុស្ស ២នាក់ ដែលមានសភាពគូរឲ្យញាក់សាច់ ដោយម្នាក់ដាច់ក្បាល ចេញពីដងខ្លួន និងរងរបួសធ្ងន់ស្រាល ៥នាក់ ដោយសាររថយន្តធុនធំ ម៉ាកហ្វ៊ុយសូ(FUSO) បើកបុកជាមួយ រថយន្តម៉ាកវីហ្គោ(VIGO) កាលពីវេលាម៉ោង ០៩និង៣០ នាទី ព្រឹកថ្ងៃទី២៧ ខែកុម្ភៈ ឆ្នាំ២០១៥ នៅតាមបណ្តោយផ្លូវ ក្រាលគ្រួសក្រហម ក្រវ៉ាត់ក្រុង ស្ថិតក្នុងភូមិកំណប់ សង្កាត់បន្សាយរាក់ ក្រុងសំរោង ខេត្តឧត្តរមានជ័យ។ នៅក្នុងហេតុការណ៍ដ៏សែនតក់ស្លុតមានសភាព អណោចអធម្មពន់ពេក គឺឪពុកនិងម្តាយស្ទើរតែគ្មានព្រលឹងនៅជាប់នឹងខ្លួនដោយសោកសង្រេង ឪពុកបានរើសក្បាលកូនស្រីឈរឱប និងស្ត្រីជាម្តាយ បានអង្គុយឱបសពកំបុតក្បាលកូន ស្រែកទ្រហោយំបោក ខ្លួនអាសូរដល់កូន។
សមត្ថកិច្ចបានឲ្យដឹងថា គ្រោះថ្នាក់ដ៏អាក្រក់នេះ បង្កឡើងដោយរថយន្ត ធុនធំយីឌុប មួយគ្រឿងម៉ាក ហ្វ៊ុយសូ (FUSO) ពណ៌ត្រាវ ពាក់ផ្លាកលេខ ក្រចេះ 3A-0339 បើកបរដោយបុរសម្នាក់ មិនទាន់ស្គាល់អត្តសញ្ញាណ ធ្វើដំណើរក្នុងទិសដៅ ពីលិចទៅកើត មកដល់ផ្លូវបំបែក ទៅភូមិត្នោត ក៏ជ្រុលទៅបុករថយន្ត មួយគ្រឿង ម៉ាក វីហ្គោ(VIGO) ពណ៌ឆ្លូញ ពាក់ផ្លាកលេខ ភ្នំពេញ 2K-4066 ដែលបើកមក ពីទិសខាងជើង ចំពាក់កណ្តាលរថយន្ត បណ្តាលឲ្យក្រឡាប់ និងស្លាប់មនុស្សចំនួន ០២នាក់ និងរបួសធ្ងន់ស្រាល ចំនួន ០៥នាក់។ បន្ទាប់ពីបង្កហេតុ រថយន្តយីឌុប បានបើករត់ចម្ងាយ ៦០ម៉ែត្រ ក៏ឈប់នៅតាមផ្លូវក្រួសក្រហម ហើយអ្នកបើកបរ និងព្រូ ក៏បាននាំគ្នាចុះ រត់គេចខ្លួនបាត់ ។
សមត្ថកិច្ចបន្តថា ជនរងគ្រោះដែល ស្លាប់ និងរបួស រួមមាន ១–ឈ្មោះ សំរិទ្ធ មុន្នីសេត ភេទស្រី អាយុ ០៨ឆ្នាំ រស់នៅភ្នំពេញ បានស្លាប់ដោយដាច់ក្បាល ចេញពីដងខ្លួន ,២-ឈ្មោះ ទៀង ចាន់ដារ៉ា ភេទប្រុស អាយុ ៣០ឆ្នាំ រស់នៅភ្នំពេញ រងរបួសស្រាល, ៣-ឈ្មោះ ជួង ប៊ុននី ភេទប្រុស អាយុ ៣៦ឆ្នាំ រស់នៅភ្នំពេញ រងរបួសស្រាល, ៤-ឈ្មោះ សំ ពុទ្ធា ភេទស្រី អាយុ ៣០ឆ្នាំ រស់នៅភ្នំពេញ រងរបួសធ្ងន់, ៥-ឈ្មោះ គង់ យ៉េត ភេទស្រី អាយុ ៥០ឆ្នាំ រស់នៅភ្នំពេញ របួសធ្ងន់, ៦-ឈ្មោះ ឃ្លាំង ចាន្នី ភេទប្រុស អាយុ ៥៦ឆ្នាំ រស់នៅភូមិភ្នៀត សង្កាត់សំរោង បានស្លាប់ និង៧-ឈ្មោះ សំ វុទ្ធី ភេទស្រី អាយុ ៥៤ឆ្នាំ រស់នៅភូមិភ្នៀត សង្កាត់សំរោងបានរបួសធ្ងន់៕
http://ift.tt/1aK3sIM
