សមត្ថកិច្ចគយ និងកាំកុងត្រូលនៅច្រកអាកាសយានដ្ឋានអន្តរជាតិភ្នំពេញ បន្តប្រព្រឹត្តអំពើពុករលួយយ៉ាងចំហ មិនដែលខ្វល់នឹងច្បាប់ប្រឆាំងអំពើពុករលួយ ឬកំណែទម្រង់ស៊ីជម្រៅរបស់ សម្តេចតេជោ ហ៊ុន សែន ឡើយ
ភ្នំពេញ៖ តាមប្រភពពីអ្នករត់ការឯកសារប្រតិវេទគយបានទម្លាយឲ្យដឹងថា មានអំពើគាបសង្កត់ និងបង្ខំឲ្យការរត់ការនាំទំនិញចេញ យ៉ាងតិចណាស់សម្រាប់ឯកសារ១ច្បាប់ ត្រូវបង្គាប់បង់ឲ្យអង្គភាពគយ ដែលគ្រប់គ្រងដោយលោក ខៀវ សំអាន ចំនួន៤០ដុល្លារ ចំណែកឯកសារនាំចូលវិញត្រូវបង់ប្រាក់ចំនួន៧៥ដុល្លារ។ ក្នុងនោះឯកសារនាំចេញត្រូវចំណាយទៅលើមន្ត្រីគយទទួលផ្នែកខាងចុះលេខ ចំនួន៥ដុល្លារ ផ្នែកត្រួតពិនិត្យ១០ដុល្លារ ផ្នែកបង្កាន់ដៃ១៥ដុល្លារ និងអនុប្រធានចំនួន៥ដុល្លារ។ រីឯឯកសារនាំទំនិញចូល អ្នករត់ការត្រូវបង់ប្រាក់ឲ្យមន្ត្រីគយផ្នែកចុះលេខចំនួន៥ដុល្លារ ផ្នែកបង្កាន់ដៃចំនួន២០ដុល្លារ ផ្នែកប័ណ្ណបញ្ចេញទំនិញ៥ដុល្លារ ផ្នែកត្រួតពិនិត្យ១០ដុល្លារ អនុប្រធានផ្នែកត្រួតពិនិត្យ១៥ដុល្លារ និងផ្នែកកាន់ស្តុក២០ដុល្លារ។ ក្នុងមួយថ្ងៃៗមានឯកសារឆ្លងកាត់សមត្ថកិច្ចគយមិនក្រោមពពី១៥០ច្បាប់នោះទេ។ ករណីនេះបានប្រព្រឹត្តយូរយារមកហើយតាំពីជំនាន់ លោក ប៉ែន ស៊ីម៉ន ជាអគ្គនាយកគយ និង រដ្ឋាករកម្ពុជារហូតមកដល់សព្វថ្ងៃ ហើយបើទោះជាអង្គភាពប្រឆាំងអំពើពុករលួយធ្លាប់ធ្វើការណែនាំ និងព្រមាន រួចហើយក៏ដោយ ក៏ក្រុមអ្នករត់ការថាគ្មានការកែប្រែអ្វីបន្តិចឡើយ។
ស្របពេលជាមួយគ្នានោះដែរ សមត្ថកិច្ចកាំកុងត្រូលច្រកព្រលានយន្តហោះអន្តរជាតិភ្នំពេញ ដែលប្រចាំការអនុវត្តការងារសម្រួលជាមួយការងារគយនោះ ក្រោមការគ្រប់គ្រងរបស់លោក សៀង ពុទ្ធា ក៏កំពុងប្រព្រឹត្តអំពើពុករលួយយ៉ាងពេញបន្ទុកដែរ ដែលជាហេតុធ្វើឲ្យប៉ះពាល់អារម្មណ៍អ្នកវិនិយោគ និងក្រុមអ្នកជំនួញ យ៉ាងខ្លាំង។ ប្រភពពីអ្នករត់ការឯកសារបានឲ្យដឹងថា រាល់ឯកសារទំនិញឆ្លងកាត់ខាងមន្ត្រីកាំកុងត្រូលតម្រូវឲ្យបង់លុយ១ ម៉ឺនរៀល ថ្លៃការងាររដ្ឋបាលចំណាយទៅលើក្រដាស បេទ្បា និងចុះលេខ។ ប្រភពបានបញ្ជាក់ថា ដោយគោលការបង់ពន្ធ០.១ភាគរយ ទៅក្រសួងពាណិជ្ជកម្ម លោក សៀង ពុទ្ធា បានឆ្លៀតឱកាសទាញយកផលប្រយោជន៍ ហើយបានកំណត់ឲ្យអ្នករត់ការបង់ប្រាក់ បើឯកសារដែលមានទំនិញក្រោម៥កាតុង ត្រូវបង់ប្រាក់ចំនួន២៦ដុល្លារ ហើយបើលើសពី៥កាតុង ទៅរាប់ពាន់រាប់ម៉ឺនកាតុងត្រូវបង់១ឯកសារ ៣០ម៉ឺនដុល្លារ ដែល១ថ្ងៃៗ ជាង១០០ ឯកសារ ។ អំពើពុករលួយរបស់សមត្ថកិច្ចគយ និងកាំកុងត្រូលប្រចាំច្រកអាកាសយានដ្ឋាន អន្តរជាតិភ្នំពេញបែបនេះមានតែអង្គភាពប្រឆាំងអំពើពុករលួយទេ ទើបអាចចាត់វិធានការលុបបំបាត់បាន ដើម្បីឆ្លើយតបនឹងគោលនយោបាយកំណែទម្រង់ស៊ីជម្រៅ។
ក្រុមអ្នករត់ការបានលើកឡើងថា អំពើពុករលួយដែលកើតចេញពីការប្រើអំណាចបង្ខំរបស់សមត្ថកិច្ចគយ និងសមត្ថកិច្ចកាំកុងត្រូលនៅច្រក ព្រលានយន្តហោះអន្តរជាតិភ្នំពេញនោះបានប្រព្រឹត្តឡើង មិនដែលកោតញញើតនឹងច្បាប់អ្វីឡើយ ហើយកំពុងធ្វើឲ្យប៉ះពាល់យ៉ាងខ្លាំងដល់ក្រុមហ៊ុន វិនិយោគទុន និងអាជីវករមួយចំនួន ហេតុនេះ លោក គុណ ញឹម អគ្គនាយកដ្ឋានគយ និងរដ្ឋាករ ក៏ដូចជា លោក ម៉ក់ ពេជ្ជរិទ្ធ អគ្គនាយក នៃអគ្គនាយកដ្ឋានកាំកុងត្រូល សមគួរដល់ពេលចាត់វិធានការទប់ស្កាត់បញ្ហានេះហើយ ព្រោះរឿងអាស្រួវនេះ ក្រុមហ៊ុនវិនិយោគផ្នែកវាយនភ័ណ្ឌ ក៏ដូចជាក្រុមហ៊ុននាំទិនិញបង់ពន្ធចូលតាមច្រកអាកាសយានដ្ឋាន អន្តរជាតិភ្នំពេញបានលើកទ្បើងពីវប្បធម៌ នៃអំពើពុករលួយដោយសមត្ថកិច្ច គយនិងកាំកុងត្រូល ធ្វើឲ្យប៉ះពាល់ដល់មុខជំនួញរបស់ពួកគេយ៉ាង គួរឲ្យធុញទ្រាន់។ ជាមួយគ្នាននេះ ពួកគេក៏អំពាវនាវឲ្យលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុក៏ដូចជាលោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មត្រូវចាត់វិធានការលុបបំបាត់អំពើពុករលួយ របស់សមត្ថកិច្ចក្រោមឱវាទជាបន្ទាន់។៕ ដោយ កញ្ញា សុភាព
http://ift.tt/1GWjqtS
