ប៉ូលិសខេត្តមណ្ឌលគិរី មិនទាន់ចាប់ខ្លួនខ្មាន់កាំភ្លើងបាន បន្ទាប់ពីបាញ់រះជាង១០គ្រាប់ចូលផ្ទះ បង្កឲ្យប្តីប្រពន្ធកំពុងដេកលង់លក់ របួសបាក់ភ្លៅទាំងពីរនាក់
ខេត្តមណ្ឌលគិរី៖ រយៈពេលជា៤ខែកន្លងទៅ ជនដៃដល់ក្នុងករណីបាញ់រះលើគ្រួសារមួយ នៅស្រុកអូររាំង បណ្តាលឲ្យប្តីប្រពន្ធពីរនាក់រងរបួសធ្ងន់។ ហេតុការណ៍នេះបានកើតឡើងនៅវេលាម៉ោង២៣ នឹង១៨នាទី កណ្តាលអធ្រាត្រកាលពីថ្ងៃទី១៥ វិច្ឆិកា ២០១៤ នៅភូមិពូរាំង ឃុំសែនមនោរម្យ ស្រុកអូររាំង នឹងបានបង្ករការភ្ញាក់ផ្អើលយ៉ាងខ្លាំងដល់ប្រជាពលរដ្ឋរស់នៅក្នុងមូលដ្ឋាន។ ហើយជនបង្កនៅមិនទាន់ចាប់ខ្លួនបាននៅឡើយទេ ខណៈដែលក្រុមសមត្ថកិច្ចកំពុងដុតដៃដុតជើងតាមស្វែងរកជនបង្កទាំងយប់ទាំងថ្ងៃដើម្បីចាប់ខ្លួនយកមកផ្តន្ទាទោស ។
អធិការរងនគរបាលអូររាំង លោក ខៃ វណ្ណៈ បានឲ្យដឹងថា តាំងពីថ្ងៃកើតហេតុរហូតមកដល់ពេលនេះកម្លាំងប្រចាំការនៅអធិការស្រុក នៅតែបន្តតាមរកជនដៃដល់ដែលកំពុងសម្ងំលាក់ខ្លួនក្នុងព្រៃ។ លោកបន្តថា កម្លាំងប៉ូលិសរបស់លោកមានការលំបាកណាស់ ព្រោះ ជនល្មើសបាន គេចពីកន្លែងមួយទៅកន្លែងមួយ ក្នុងព្រៃជ្រៅ ប៉ុន្តែទោះយ៉ាងណាមិនយូរទេចនល្មើសនឹងគេចមិនផុតពីសំណាញ់ច្បាប់ឡើយ។
លោកស្នងការនគរបាលខេត្តមណ្ឌលគិរីបានបញ្ជាក់ឲ្យដឹងថា បើទោះជាសមត្ថកិច្ចជួបការលំបាកក្នុងការតាមចាប់ជនល្មើសយ៉ាងណា ក៏កម្លាំងក្រោមឱវាទរបស់លោក បានបង្កើនសកម្មភាពរុករកជនល្មើស ដែលបានរត់គេចក្នុងព្រៃ អស់ជាច្រើនខែនោះ។ហើយក្នុងពេលឆាប់ៗលោកជឿជាក់ថា សមត្ថកិច្ចនឹងអាចចាប់បង្ក្រាបជនល្មើសបាន ព្រោះកម្លាំងសមត្ថកិច្ច បានកំណត់ទីកន្លែងលាក់ខ្លួនរបស់ជនល្មើសរួចហើយ។ ប៉ុន្តែបញ្ហាប្រឈមមួយរបស់សមត្ថកិច្ចកំពុងជួបប្រទះ ដោយសារជនដៃដល់មានកាំភ្លើងនៅនឹងខ្លួន។ ជាក់ស្តែងកាលពីពេលកន្លងមក សមត្ថកិច្ចបានឡោមព័ទ្ឋជនល្មើសខាងលើបានម្តង តែត្រូវជនល្មើសបាញ់រះមិនឲ្យចូលចាប់អស់ជាច្រើនគ្រាប់។
សមត្ថកិច្ចស្រុកបាននិយាយថា នៅវេលាកើតហេតុគេបានឮសម្លេងផ្ទុះអាវុធជាប់ៗគ្នាប្រមាណជាង១០គ្រាប់ដែលជនសង្ស័យបានបាញ់រះមិនប្រណីដៃចូលលំនៅដ្ឋានជនរងគ្រោះ។ ប្រភពបានបន្តថា បន្ទាប់ពីបានបាញ់អស់ចិត្តហើយ ខ្មាន់កាំភ្លើងបានគេចខ្លួនចូលក្នុងព្រៃបាត់។ ដោយឡែកជនរងគ្រោះ ដែលស្ថិតក្នុងហេតុការណ៍នឹង កំពុងសម្រាកលង់លក់ក្នុងដំណេកមានគ្នីគ្នាចំនួនប្រាំនាក់ រាប់ទាំងអ្នកត្រូវរបួសពីរនាក់ផងដែរ។
ជនរងគ្រោះក្នុងហេតុការណ៍ខាងលើមានឈ្មោះថា អ៊ិត ថុល ភេទប្រុស អាយុ៥៥ឆ្នាំជាប្តី រងរបួសពីរកន្លែង ត្រង់ភ្លៅខាងស្តាំ របួសមធ្យម ហើយម្នាក់ទៀតឈ្មោះធឿន គា ភេទស្រី អាយុ៥៣ឆ្នាំ ជាប្រពន្ឋ រងរបួសធ្ងន់ត្រង់ភ្លៅខាងស្តាំដែរ។ ចំពោះជនដៃដល់ប្រព្រឹត្តការបាញ់ប្រហារនោះ ត្រូវបានគេស្គាល់ឈ្មោះថា ចិ ហៅ សុក អាយុ៣៤ឆ្នាំ មានទីលំនៅ ភូមិពូទ្រូ ឃុំសែនមនោរម្យ ស្រុកអូររាំង ហើយបច្ចុប្បន្នសមត្ថកិច្ចកំពុងស្រាវជ្រាវស្វែងរកចាប់ខ្លួន៕ ដោយ ឦសាន២
http://ift.tt/1vRY8fC
